މުދަލު ޒަކާތުގެ ގޮތުގައި ޖުލައި މަހުގައި 73.8 މިލިއަން ރުފިޔާ ދައުލަތަށް ލިބިފައިވާ ކަމަށް މީރާ އިން ހާމަކޮށްފިއެވެ.
މީރާއިން އާންމުކޮށްފައިވާ ތަފާސްހިސާބުތައް ދައްކާ ގޮތުން މިދިޔަ ޖުލައި މަހުގެ ނިޔަލަަށް ދައުލަތަށް މުދަލު ޒަކާތުގެ ގޮތުގައި ލިބުނު އަދަދު 2023 ވަނަ އަހަރުގެ އެ މުއްދަތާ އަޅާބާލައިރު މިއީ 9.8 އިންސައްތަ ކުރިއެރުމެކެވެ. މިދިޔަ އަހަރުގެ އޮގަސްޓު މަހު މީރާއަށް ޒަކާތުގެ ގޮތުގައި ލިބުނީ 6.7 މިލިއަން ރުފިޔާއެވެ. މި އަހަރު ލިބިފައިވަނީ 73.8 މިލިއަން ރުފިޔާއެވެ.
މުދަލު ޒަކާތުގެ އަދަދު އެންމެ މަތިވެފައިވަނީ މިއަހަރުގެ ޖުލައި މަހުގައެވެ. އެ މަހު 5 މިލިއަން ރުފިޔާ ލިބުނެވެ.
މުދަލުގެ ޒަކާތަކީ އެމީހެއްގެ މުދަލުގައި ނިސޯބު ހަމަވާތާ އަހަރެއް ފުރިފައިވާ ކޮންމެ މީހެއްގެ މައްޗަށް އޮތް ފަރުޟެކެވެ. އަހަރުގެ ކޮންމެ ދުވަސްވަރެއްގައި ވެސް މުދަލުގެ ޒަކާތް ދެއްކޭނެއެވެ.
މުދަލު ޒަކާތުގެ ނިސޯބަށް އެންމެ ފަހުން ބަދަލު ގެނެސްފައި ވަނީ މިދިޔަ މަހެވެ. މިހާރުގެ ނިސާބަކީ 9،353.4 ރުފިޔާއެވެ.
