ރެކޯޑު އަދަދަކަށް ބޮޑު 45 ބިލިއަން ރުފިޔާގެ ބަޖެޓަކުން އެންމެ 215 މިލިއަން މަސްވެރިކަމަށް ކަނޑައެޅުމަކީ ލަދުވެތިކަމެއް ކަމަށް މާވަށު ދާއިރާގެ މެމްބަރު މުޙައްމަދު ސަޢީދު ވިދާޅުވެއްޖެ އެވެ.

އިހަވަންދޫގައި މަސްވެރިން މިހާރު ކުރަމުންދާ އިހްތިޖާޖާއި ގުޅޭގޮތުން ކުރެއްވި ޓްވީޓެއްގައި ކުރީ ސަރުކާރުގެ އިކޮނޮމިކް މިނިސްޓަރުކަން ވެސް ކުރެއްވި ސަޢީދު ވިދާޅުވީ، ރައީސުން ޗުއްޓީ ހައްދަވަން ނުތިއްބަވާ މަސްވެރިންގެ އަޑު އައްސަވަންޖެހޭ ކަމަށެވެ. އަދި މަސްވެރިން ބާނާ މަހަށް ވަގުތުން ފައިސާ ދިނުމަށްވެސް ސަޢީދު ވަނީ ގޮވާލައްވާފައެވެ.

މީގެ އިތުރުން ސަޢީދު ވިދާޅުވީ އަންނަ އަހަރަށް ކަނޑައެޅީ ރެކޯޑު މިންވަރަކަށް ބޮޑު ބަޖެޓަކަށް ވާއިރު، އެ ބަޖެޓުގައިވެސް މަސްވެރިކަމަށް ކަނޑައަޅާފައިވާ އަދަށްވުރެ ސިޔާސީ ހަރަދަށް ކަނޑައަޅާފައިވާ އަދަދު ބޮޑު ކަމަށެވެ.

Raeesun chuttee ga nuthibe masveringe adu ahaa, vaguthun faisaadhinumah govaalan. Record 45B rf ge budget akun emme 215m maverikamah kandaelhumakee ladhuvethikameh. Siyaasee haradhu e’ah vure bodu https://t.co/5DAWKVoiPF

— Mohamed Saeed (@em_saeed) December 25, 2020

މި ސަރުކާރުގެ ނޫ އިޤްތިސާދުގެ ސިޔާސަތަށް ފާޑުވިދާޅުވަމުން މީގެ ކުރިންވެސް ސަޢީދު ވަނީ، 2021 ބަޖެޓްގައި މަސްވެރިންގެ ދަތިތައް ފިލުވުމަށް ފައިސާ ނުދީ، ހޯމް މިނިސްޓްރީއާއި، އިކޮނޮމިކް މިނިސްޓްރީއާއި، ބަންޑާރަ ނާއިބުގެ އޮފީހާއި، ފޮރިން މިނިސްޓްރީއާއި ރައީސުލްޖުމްހޫރިއްޔާގެ އޮފީސް ފަދަ ތަންތަނަށް، އާމްދަނީ ރަނގަޅު އަހަރަކަށްވުރެ ބޮޑު އަދަދެއް ބަޖެޓްގައި ހިމަނާފައި ވާކަމަށެވެ.

އިހަވަންދޫގެ މަސްވެރިން މިއަދު އެރަށުގެ ބަނދަރު ސަރަހައްދުގައި އިހުތިޖާޖް ކުރަމުންދާއިރު، މި ދިޔަ އިންގާރަ ދުވަހު ގިނައަދަދެއްގެ މަސްވެރިން، މިފްކޯގެ މަސްފެކްޓްރީ ހިމެނޭ ފެލިވަރުގައިވެސް ވަނީ އިހްތިޖާޖް ކޮށްފައެވެ. އެމީހުން މައިގަނޑު ގޮތެއްގައި ގޮވާލަނީ ބާނާ މަސްކޮޅު ހަލާކުނުވަނިސް ކިރުވޭނެ ގޮތެއް ހަމަޖައްސައި ދިނުމަށާއި، މަސްވެރިންނަށް ހޯދައިދޭން މި ސަރުކާރު ވަޢުދުވެފައިވާ ހަމަ އަގު ހޯދައި ދިނުމަށެވެ.

ރައީސް އިބްރާހީމް މުޙައްމަދު ޞާލިޙް ވެރިކަމަށް ވަޑައިގަތުމަށް އެމްޑީޕީން ރިޔާސީ އިންތިޚާބުގެ ކެމްޕެއިންގައި ބޭނުންކުރި ނޫ އިގްތިސާދުގެ ވަޢުދަކީ، އަމިއްލަ ވިޔަފާރިތައް ކުރިއަރުވަން އިސްކަން ދިނުމާއި، މަސްވެރިކަމާއި އެނޫންވެސް ކަނޑުގެ ދިރުންތަކާއި ގުޅުންހުރި ދާއިރާތައް ކުރިއެރުވުމަށް ވީ ވަޢުދެކެވެ. ނަމަވެސް މަސްވެރިކަން ކުރިއަރުވައި މަސްވެރިކަމުން ލިބޭ މަންފާ އިތުރުކުރުމަށް ސަރުކާރުން ވީ ވަޢުދު ނުފުއްދި އިޤްތިޞާދަށް އައި ހީނަރުކަމާއެކު މަސްވެރިކަން އިތުރަށް ހީނަރުވެފައިވާކަމަށް ބުނެ ގިނަ މަސްވެރިން ދަނީ ކަންބޮޑުވުން ފާޅުކުރަމުންނެވެ.