ރައީސް ޑރ. މުހައްމަދު މުއިއްޒު ހުޅުމާލެއިން ރޭސިން އަދި ޑްރިފްޓް ކުރުމަށް ދީފައިވާ ސަރަހައްދުގެ ހުއްދަ ބާތިލުކޮށް، މަގުތަކުގެ ރައްކާތެރިކަން އިތުރުކުރުމަށް ހަރުކަށި ފިޔަވަޅުތަކެއް އަޅަން އަންގަވައިފިއެވެ. މިރޭ އެކްސްގައި ކުރެއްވި ޕޯސްޓެއްގައި ރައީސް ވަނީ މަގުތައް ރައްކާތެރި ތަނެއްގެ ގޮތުގައި ހެދުމަށްޓަކައި ކަމާ ގުޅޭ މުއައްސަސާތަކަށް އެންގި އެންގުންތައް އާންމުކުރައްވާފައެވެ.
މި އެންގުންތަކުގެ ތެރޭގައި، 2023 އޮކްޓޫބަރު 19 ގައި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ދީފައިވާ ރޭސިން އަދި ޑްރިފްޓިންގ ސަރަހައްދުގެ ހުއްދަ ވަގުތުން ބާތިލުކުރުން ހިމެނެއެވެ. އަދި ކަނޑައެޅިފައިވާ ސްޕީޑަށްވުރެ ބާރަށް ދުއްވާ އުޅަނދުތައް ވަގުތުން ހުއްޓުވައި، އުޅަނދު ދުއްވާ ފަރާތުގެ ލައިސަންސާއި އުޅަނދު ފުލުހުންގެ ބެލުމުގެ ދަށަށް ގެންދިއުމަށްވެސް އަންގަވާފައިވެއެވެ.
މީގެއިތުރުން، ވަކި ސީސީ (ހޯސްޕަވަރ) އަކުން ފެށިގެން މަތީގެ އެއްގަމު އުޅަނދުތައް ދުއްވުން ހުއްޓުވުމަށާއި، ސައިލެންސަރު ބަދަލުކޮށްގެން އަޑުގަދަކޮށް ދުއްވުން ހުއްޓުވުމަށް، އެފަދަ އާލާތްތައް އެތެރެކުރުން މަނާކުރުމަށް ޤާނޫނާއި ގަވާއިދަށް ބަދަލު ގެނައުމަށްވެސް ރައީސް އަންގަވާފައިވެއެވެ.
ރައީސް އަދި އަންގަވާފައިވަނީ، ފުލުހުން ހުށަހަޅާފައިވާ ޕްލޭނާ އެއްގޮތަށް ހުޅުމާލޭގެ 150 ސަރަހައްދެއްގައި ސްޕީޑް ބްރޭކަރާއި ސްޕީޑް ޑިޓެކްޓިންގ ކެމެރާ ހަރުކުރުމަށެވެ. އަދި ގްރެޖުއޭޓިންގ ލައިސަންސް ސިސްޓަމެއް ތަޢާރަފުކުރުމަށާއި، ގަވާއިދާ ޚިލާފަށް ވެހިކަލް ދުއްވާ ފަރާތްތަކުގެ ލައިސަންސުން ޕޮއިންޓް ކެނޑުމަށްވެސް އަންގަވާފައިވެއެވެ. ޓްރެފިކް ގަވާއިދުތައް ތަންފީޒުކުރުމަށް ފުލުހުން މިހާރު ކުރަމުންދާ މަސައްކަތް އިތުރަށް ފުޅާކުރުމަށްވެސް ރައީސް އަންގަވާފައިވެއެވެ.
މި ފިޔަވަޅުތައް އެޅުމަށް ރައީސް އަންގަވާފައިވަނީ، ރޭ ދަންވަރު ހުޅުމާލޭގައި ހިނގި އެކްސިޑެންޓެއްގައި ޒުވާނަކު މަރުވުމާ ގުޅިގެންނެވެ. އެ އެކްސިޑެންޓުގައި ބާރު ސްޕީޑުގައި ދުއްވާފައިދިޔަ ސްޕޯޓްސް ކާރެއް ސައިކަލެއްގައި ޖެހި، ސައިކަލް ދުއްވަން އިން ޒުވާނާ މަރުވިއެވެ.
މި ހާދިސާއާ ގުޅިގެން މަގުތަކުގެ ރައްކާތެރިކަން އިތުރުކުރުމަށް ފިޔަވަޅުތަކެއް އަޅުއްވާނެ ކަމަށް ރައީސް މިއަދު ވިދާޅުވެފައިވެއެވެ.
