މާލޭ ސިޓީ ކައުންސިލުން އާސަހަރާ މިސްކިތުގެ ތިރީ ބައި ހުކުރު ނަމާދަށް ހުޅުވާލަން ނިންމައިފިއެވެ. އާސަހަރާ ހުޅުވުމުގެ ތައްޔާރީތައް ބެލުމަށް ޒިޔާރަތްކުރުމަށްފަހު އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައި މާލޭ ސިޓީ މޭޔަރު އާދަމް ޢާޒިމް ވިދާޅުވީ މަހުގެ ނިޔަލަށް ޖަނާޒާތަކަށް އާސަހަރާ ހުޅުވާލެވޭނެ ކަމަށެވެ.
"މާލެއިން ހުޅުމާލެއަށް މީހުން ވަޅުލުމަށް ދަތުރުކުރަންޖެހުމުގެ ސަބަބުން ދިމާވާ ދަތިތަކަށް މިއާއެކު ނިމުމެއް އަންނާނެކަމަށް އުއްމީދުކުރަން،" އާޒިމް ވިދާޅުވިއެވެ.
އާސަހަރާ ބަންދުކޮށްފައިވަނީ މަރާމާތުކުރުމަށް ޓަކައި މިދިޔަ އަހަރުގެ މެއި މަހުގައެވެ.
އާސަހަރާ މިސްކިތުގެ މަރާމާތުގެ މަސައްކަތާ ބެހޭގޮތުން މީޑިއާއަށް މަޢުލޫމާތު ދެއްވަމުން އާޒިމް ކުރިން ވިދާޅުވެފައިވަނީ، ސްޓްރަކްޗަރގެ މަސައްކަތް ރަނގަޅަށް ނުކުރެވޭތީ އެ މަސައްކަތް ފުރަތަމަ ހަވާލުކުރެވުނު ކުންފުނިން ވަކިކުރަން ޖެހުނު ކަމަށެވެ. އޭގެ ފަހުން، އާސަހަރާ މިސްކިތުގެ ކުލަ ލުމުގައި އެކި ބަދަލުތައް އައުމުގެ ސަބަބުން މަސައްކަތް ލަސްވެފައިވާ ކަމަށް އޭނާ ވިދާޅުވިއެވެ.
އާސަހަރާ މިސްކިތް މަރާމާތުކުރުމަށް ޖުމުލަ 71.7 މިލިއަން ރުފިޔާ ހޭދަކުރެވިފައިވާ ކަމަށް އާޒިމް ވިދާޅުވިއެވެ.
