ޗީފް ޖުޑީޝަލް އެޑްމިނިސްޓްރޭޓާގެ މަގާމުން އައިޝަތު ރިޒްނާ އިސްތިއުފާ ދެއްވައިފިއެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ ރައީސް ހުސައިން ރިޒާއަށް ފޮނުއްވި ސިޓީއެއްގައި ރިޒްނާ ވިދާޅުވީ މިދިޔަ ޖޫން މަހުން ފެށިގެން ޑީޖޭއޭ ހިންގުމަށް ތަންފީޒުކުރެވިފައިވާ ގާނޫނީ އޮނިގަނޑާއި ސިޔާސަތުތަކާއި އުސޫލުތަކުގެ ސަބަބުން ޖުޑިޝަލް ސާވިސް ކޮމިޝަނާއެކު މަސައްކަތް ކުރެވޭނެ އެއްވެސް މާހައުލެއް ނެތް ކަމަށެވެ.
ޝަރުއީ ދާއިރާގައި އިދާރީ ހިންގުމާ ގުޅޭ ގޮތުން ޕޮލިސީ ލެވެލެއްގައި ޖުޑިޝަލް ސާވިސް ކޮމިޝަނުގެ އިޖާބީ ތަސައްވުރެއް ހާމަކޮށްފައިނުވާ ކަމަށާއި މާނަވީ ގޮތެއްގައި އިރުޝާދެއް ނުވަތަ ލަފައެއް ވެސް މިހާތަނަށް ލިބިފައި ނުވާ ކަމަށް ރިޒްނާގެ ސިޓީގައިވެއެވެ.
މައްސަލަތައް ހައްލު ކުރުމަށް މިހާތަނަށް ކުރެވުނު މަސައްކަތްތަކުގެ އެކަށީގެންވާ ނަތީޖާއެއް ލިބިފައިނުވާތީ ޖުޑިޝަރީގެ އިދާރީ ހިންގުމާ ގުޅޭ މުހިންމު ކަންތައް ހިންގުމަށް ހުރަސް އެޅިފައިވާ ކަމަށް ވެސް އެ ސިޓީގައިވެއެވެ.
ރިޒްނާ އިސްތިއުފާ ދެއްވިއިރު އޭނާއާ ގުޅޭ ގޮތުން ހުށަހަޅާފައިވާ މައްސަލަތަކެއް ޖޭއެސްސީން އަންނަނީ ބަލަމުންނެވެ. ރިޒްނާއާ ގުޅޭ ގޮތުން ޖޭއެސްސީން ބަލަމުންދަނީ ފަނޑިޔާރުންގެ ހެލްތު އިންޝުއަރެންސާ ގުޅޭ މައްސަލައަކާއި މުވައްޒަފުން ނެގުމުގައި އަމަލުކޮށްފައިވާ ގޮތުގެ މައްސަލަތަކެކެވެ.
ރިޒުނާ ވަނީ މީގެކުރިން ސިވިލް ކޯޓާއި ސުޕްރީމް ކޯޓުގެ ރެޖިސްޓްރާގެ މަގާމު އަދާކުރައްވައިފައެވެ. އަދި ޔޫއެންޑީޕީގެ އެސިސްޓަންޓް ރެޕްރެޒެންޓޭޓިވްގެ މަގާމު އަދާކުރެއްވިއެވެ.
ޗީފް ޖުޑީޝަލް އެޑްމިނިސްޓްރޭޓަރުގެ މަގާމަށް ރިޒްނާ އައްޔަން ކުރީ ސެޕްޓެމްބަރު 27، 2020 ގައެވެ.
