ރައީސުލްޖުމްހުރިޔާ ޑރ. މުހައްމަދު މުއިއްޒު މިއަދު 5 ބިލެއް ތަސްދީގު ކުރައްވައިފިއެވެ.
އެ ބިލްތަކަކީ:
1. ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނަށް 3 ވަނަ އިޞްލާޙު ގެނައުމުގެ ބިލު
މި ބިލަކީ، 2024 އޯގަސްޓު 22 ވީ ބުރާސްފަތި ދުވަހު ބޭއްވެވި ރައްޔިތުންގެ މަޖިލީހުގެ 2024 ވަނަ އަހަރުގެ ދެވަނަ ދައުރުގެ 32 ވަނަ ޖަލްސާއިން ފާސްކުރެއްވި ބިލެކެވެ.
މި ބިލަށް މައިގަނޑު ގޮތެއްގައި އިޞްލާޙު ގެނެސްފައިވަނީ، ޤާނޫނު ނަންބަރު 18/2014 (ދިވެހިރާއްޖޭގެ ވިޔަފާރި ރަޖިސްޓަރީކުރުމުގެ ޤާނޫނު) އަށް ގެނެވުނު އިޞްލާޙާ ގުޅިގެންނެވެ. އެގޮތުން ވިޔަފާރި ރަޖިސްޓަރީކުރުމާބެހޭ ޤާނޫނާ އެއްގޮތްވާގޮތުގެމަތީން ބޭރުގެ ފަރާތްތަކަށް ދިވެހިރާއްޖޭގައި ހުއްދަކުރެވޭ ސެކިއުރިޓީޒްގެ ބާވަތްތަކުގައި އިންވެސްޓްކުރެވޭނެ އުސޫލުތައް ކަނޑައެޅިދާނެކަމަށާއި، މިގޮތަށް މާލީ ސެކިއުރިޓީޒްއާބެހޭ ޤާނޫނުން ހުއްދަކުރާ ބާވަތެއްގެ ސެކިއުރިޓީޒްގައި ބޭރުގެ ފަރާތްތަކަށް އިންވެސްޓްކުރެވޭނެ ގޮތްތައް ކަނޑައެޅުމަކީ ކެޕިޓަލް މާރކެޓް ޑިވެލޮޕްމަންޓް އޮތޯރިޓީ (ސީ.އެމް.ޑީ.އޭ.) ގެ މަސްއޫލިއްޔަތުތަކާއި ވާޖިބުތަކުގެ ތެރޭގައި ހިމެނޭކަމެއްކަމުގައި މި ބިލުން ވަނީ ކަނޑައަޅައިފައެވެ. އަދި ސްޓޮކް އެކްސްޗޭންޖްގައި ސެކިއުރިޓީޒް ގަނެވިއްކުމުގެ މުޢާމަލާތްތައް ހިންގަނީ ކަނޑައަޅައިފައިވާ އުސޫލުތަކާ އެއްގޮތަށްތޯ ބެލުމަށް މޮނިޓަރިންގ އަދި ކޮމްޕްލަޔަންސް މެކޭނިޒަމެއް ޤާއިމުކުރުމަށް ވެސް ސީ.އެމް.ޑީ.އޭ. ގެ މައްޗަށް މި ބިލުން ލާޒިމުކޮށްފައިވެއެވެ.
އޭގެ އިތުރުން، މި ބިލުގެ ދަށުން ބޭރުގެ އިންވެސްޓަރުންނަށް ސެކިއުރިޓީޒްގައި އިންވެސްޓްކުރުމާބެހޭ ގަވާއިދެއް މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 6 (ހައެއް) މަސްދުވަހުގެ ތެރޭގައި ހަދައި، އެ ގަވާއިދަށް ޢަމަލުކުރަން ލާޒިމުކޮށްފައިވެއެވެ.
މި ގަވާއިދުގައި ހިމެނުމަށް ބަޔާންކޮށްފައިވާ ކަންކަމުގެ ތެރޭގައި އިންވެސްޓްކުރެވޭނެ ބާވަތުގެ ސެކިއުރިޓީޒްއާއި، އެފަރާތްތަކުގެ ކިބައިގައި ފުރިހަމަވާންޖެހޭ ޝަރުޠުތަކާއި، ސްޓްކް އެކްސްޗޭންޖުގައި ސެކިއުރިޓީޒް ގަނެވިއްކުމުގައި ފުރިހަމަކުރަންޖެހޭ އިޖުރާތުތައް ބަޔާންކުރުން ހިމެނެއެވެ.
ޤާނޫނު ނަންބަރު 2/2006 (ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނު) އަށް 3 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ މިއަދު ތަޞްދީޤުކުރެއްވުމާ ގުޅިގެން މި ޤާނޫނު މިއަދު ވަނީ ދިވެހި ސަރުކާރުގެ ގެޒެޓުގައި ޝާއިޢު ކުރައްވައިފައެވެ. މި ޤާނޫނަށް ޢަމަލުކުރަން ފެށުމަށް ހަމަޖެހިފައިވަނީ މި ޤާނޫނު ތަޞްދީޤުކުރައްވައި، ދިވެހިސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެން 3 މަސްދުވަސް ހަމަވާ ތާރީޚުގައެވެ.
2. ދިވެހިރާއްޖޭގެ ޤާނޫނީ ފަންނުގެ ޤާނޫނަށް 3 ވަނަ އިޞްލާޙު ގެނައުމުގެ ބިލު
މި ބިލަކީ، 2024 އޯގަސްޓު 22 ވީ ބުރާސްފަތި ދުވަހު ބޭއްވެވި ރައްޔިތުންގެ މަޖިލީހުގެ 2024 ވަނަ އަހަރުގެ ދެވަނަ ދައުރުގެ 32 ވަނަ ޖަލްސާއިން ފާސްކުރެއްވި ބިލެކެވެ.
މި ބިލުގައި، ބަންޑާރަނައިބަކީ މަޤާމުގެ ހައިސިއްޔަތުން ބާ ކައުންސިލުގެ އެގްޒެކެޓިވް ކޮމިޓީގެ މެންބަރެއް ކަމުގައި ޤާނޫނުގެ 6 ވަނަ މާއްދާގެ (ނ) ގެ ދަށުން ކަނޑައަޅައިފައި އޮތް އޮތުން ބަދަލުކޮށް، ބާ ކައުންސިލުގެ އެގްޒެކްޓިވް ކޮމިޓީއަކީ ހަމައެކަނި ޤާނޫނީ ވަކީލުން އިންތިޚާބުކުރާ ރައީސަކާއި، ނައިބުރައީސަކާއި، މެންބަރުންގެ މައްޗަށް އެކުލެވޭ ކޮމިޓީއެއް ކަމުގައި ވަނީ ކަނޑައަޅައިފައެވެ. މިކަމަށް މަގުފަހިކުރުމުގެ ގޮތުން އެ މާއްދާގައި އެގްޒެކްޓިވް ކޮމިޓީގައި ހިމެނުމަށް ޤާނޫނީ ވަކީލުންގެ ތެރެއިން އިންތިޚާބުކުރެވޭ ވަކީލުންގެ ޢަދަދު 6 އިން 7 އަށް ބަދަލުކޮށް، ޤާނޫނުގައި ބަންޑާރަނައިބާ ގުޅޭގޮތުން ހުރި ބައިތައް ވަނީ އުނިކޮށްފައެވެ. އެގޮތުން މި ބަދަލާ ގުޅިގެން ބާ ކައުންސިލުގެ އެގްޒެކްޓިވް ކޮމިޓީއަށް އިންތިޚާބުކުރަންޖެހޭ މެންބަރު، މި ޤާނޫނަށް ޢަމަލުކުރަން ފަށާތާ 60 ދުވަހުގެ ތެރޭގައި އިންތިޚާބުކޮށް ނިންމަންވާނެކަމަށް ބިލުގައި ބަޔާންކޮށްފައިވެއެވެ.
އޭގެއިތުރުން ރަސްމީ އިދާރާތަކުންނާއި ރަޖިސްޓަރީކޮށްފައިވާ ކިޔަވައިދޭ މަރުކަޒުތަކުން ދޫކުރާ ލިޔުންތަކުގައި އަސްލާ އެއްގޮތްކަމުގެ ތައްގަނޑު ޖަހައިދިނުމާއި، ބޭރު ޤައުމުތަކުގައި ބޭނުންކުރުމަށްޓަކައި ދިވެހިރައްޔިތުންނަށް ބައެއް ބާވަތުގެ ލިޔެކިޔުންތަކުގައި ޑިޕްލޮމެޓިކް މިޝަންތަކުން އަސްލާ އެއްގޮތްކަމުގެ ތައްގަނޑު ޖަހައިދިނުމުގެ ހުއްދަ ލިބިދެވޭގޮތަށް ޕަބްލިކް ނޯޓަރީންގެ ގޮތުގައި މަސައްކަތްކުރުމުގެ ހުއްދަ ދެވޭ ތަންތަނާ ގުޅޭ މާއްދާއަށްވެސް މި ބިލުން އިޞްލާޙު ގެނެސްފައިވެއެވެ.
ޤާނޫނު ނަންބަރު 5/2019 (ދިވެހިރާއްޖޭގެ ޤާނޫނީ ފަންނުގެ ޤާނޫނު) އަށް 3 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ މިއަދު ތަޞްދީޤުކުރެއްވުމާ ގުޅިގެން މި ޤާނޫނު މިއަދު ވަނީ ދިވެހި ސަރުކާރުގެ ގެޒެޓުގައި ޝާއިޢު ކުރައްވައިފައެވެ. މި ޤާނޫނަށް ޢަމަލުކުރަން ފެށުމަށް ހަމަޖެހިފައިވަނީ މި ޤާނޫނު ތަޞްދީޤުކުރައްވައި، ދިވެހިސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެންނެވެ.
3. ޞިއްޙީ ޚިދުމަތް ދިނުމުގެ ޤާނޫނަށް 1 ވަނަ އިޞްލާޙު ގެނައުމުގެ ބިލު
މި ބިލަކީ، 2024 އޯގަސްޓު 22 ވީ ބުރާސްފަތި ދުވަހު ބޭއްވެވި ރައްޔިތުންގެ މަޖިލީހުގެ 2024 ވަނަ އަހަރުގެ ދެވަނަ ދައުރުގެ 32 ވަނަ ޖަލްސާއިން ފާސްކުރެއްވި ބިލެކެވެ.
މި ބިލުން، ކުރީގެ ޤާނޫނުގައި ބަޔާންކުރާ ޞިއްޙީ ޚިދުމަތް ދިނުމުގެ ޤައުމީ ނިޒާމު ޤާއިމުކުރުމުގެ މަޤްސަދު އިތުރަށް ފުޅާކޮށް، މި ނިޒާމުގެ މަޤްޞަދަކީ، ދިވެހިރާއްޖޭގައި ދިރިއުޅޭ މީހުންނަށް ޖިސްމާނީގޮތުންނާއި ނަފްސާނީގޮތުން ދުޅަހެޔޮ ޞިއްޙަތަކަށް ވާސިލުވެ ދެމިތިބުމަށް ބޭނުންވާ ޞިއްޙީ ޚިދުމަތާއި ވަސީލަތްތައް ރައްކައުތެރި ގޮތެއްގައި، އަދި އެކަށީގެންވާ ރަނގަޅު ފެންވަރެއްގައި ފޯރުކޮށްދެވޭނެ ޞިއްޙީ ޚިދުމަތް ދިނުމުގެ ޤައުމީ ނިޒާމެއް ޤާއިމުކުރުން ކަމުގައި ވަނީ ކަނޑައަޅައިފައެވެ.
މި ބިލުގައި ޞިއްޙީ ޚިދުމަތް ދިނުމުގެ ޤައުމީ ނިޒާމުގެ ކަންކަން ވިލަރެސްކޮށް ހިންގާނީ މިނިސްޓަރުގެ ލަފާގެ މަތީން ޑިރެކްޓަރ ޖެނެރަލް އޮފް ހެލްތު ސަރވިސަސްކަމުގައި ބަޔާންކޮށްފައިވެއެވެ. އަދި، ޑިރެކްޓަރ ޖެނެރަލް އޮފް ހެލްތު ސަރވިސްގެ މަޤާމަށް ޢައްޔަނުކުރެވޭ މީހެއްގެ ކިބައިގައި ހުންނަންޖެހޭ ޝަރުޠުތަކާއި، އެ މަޤާމުގެ ބާރުތަކާއި މަސްއޫލިއްޔަތުތަކާއި، އެނޫންވެސް އެ މަޤާމާ ގުޅޭ އިޖުރާޢީ ކަންކަން މި ބިލުގައި ބަޔާންކޮށްފައިވެއެވެ. އެގޮތުން، ޞިއްޙީ ޚިދުމަތުގެ ޤައުމީ ނިޒާމަކީ ވަށާޖެހޭ ޞިއްޙީ ފަރުވާގެ ނިޒާމަކަށް ހެދުމަށްޓަކައި އެ ނިޒާމުގައި ފުރިހަމަވާންޖެހޭ ކަންކަމާއި، މި ނިޒާމު ބިނާކޮށް ތަރައްޤީކުރެވިގެންދާނެ ގޮތާއި، އެ ނިޒާމުގެ ދަށުން ލިބިދެވޭ ފަރުވާއާއި ޚިދުމަތްތަކާއި ވަސީލަތްތައް އެދެވޭ ގޮތެއްގައި ފޯރުކޮށްދިނުމަށްޓަކައި އެކަމާ ގުޅޭ އުސޫލުތަކާއި މިންގަނޑުތައް ބަޔާންކޮށް ޤަވާޢިދެއް ހެދުމަށް މި ބިލުގައި ބަޔާންކޮށްފައިވެއެވެ.
އަދި، ޞިއްޙީ ޚިދުމަތް ދިނުމުގެ ޤައުމީ ނިޒާމުން ފޯރުކޮށްދެވޭ ޕްރިވެންޓިވް ކެއަރގެ ޚިދުމަތުގެ ތެރޭގައި ޢާންމު ޞިއްޙީ ނިޒާމުގެ ތެރޭގައި ހިމެނޭ ޕްރައިމަރީ، ސެކަންޑަރީ އަދި ޓަރޝަރީ ފަރުވާ ހިމެނޭކަމަށާއި، އޭގެ ދަށުން ފޯރުކޮށްދެވެނޭ ޚިދުމަތްތަކާއި އެ ޚިދުމަތްތައް ފޯރުކޮށްދިނުމުގައި ބަލަންޖެހޭ އަސާސްތައް ބިލުގައި ބަޔާންކޮށްފައިވެއެވެ. އަދި، މި ޚިދުމަތް ފޯރުކޮށްދިނުމުގައި ވަކި މިންގަނޑުތަކެއް ހުންނަންޖެހޭނެކަމަށާއި، މި މިންގަނޑުތައް ކަނޑައަޅައި، ކޮންމެ އަހަރަކު އެއްފަހަރު މުރާޖަޢާކޮށް، ދިވެހިސަރުކާރުގެ ގެޒެޓުގައި ޝާއިޢުކުރުމަށް ހެލްތު ޕްރޮޓެކްޝަން އޭޖެންސީގެ މައްޗަށް މި ބިލުން ވަނީ ލާޒިމުކޮށްފައެވެ.
އޭގެއިތުރުން، އާބާދީގެ ނިސްބަތުން ކަމާބެހޭ ބައިނަލްއަޤްވާމީ މިންގަނޑުތަކަށް ފެތޭ މިންވަރަށް، ދިވެހިރާއްޖޭގެ ސިޓީތަކުގައި މިނިސްޓްރީން ޕްރިވެންޓިވް ކެއަރގެ ޚިދުމަތް ފޯރުކޮށްދެވޭނެ ފަންނީ މީހުން ހިމެނޭ ޕްރައިމަރީ ކެއަރގެ ޚިދުމަތް ދެވޭނެ މަރުކަޒުތައް ޤާއިމުކުރަންވާނެކަމަށާއި، މި ޚިދުމަތް މެދުނުކެނޑި ދެމުންގެންދާކަން ކަށަވަރުކުރެވޭނެ ގޮތްތަކާއި، ޚިދުމަތުގެ ފެންވަރާއި ރައްކައުތެރިކަން ދެމެހެއްޓުމަށް މި ނިޒާމު ހިނގާނުހިނގާ ގޮތް މޮނިޓަރކުރުމުގެ ޒިންމާ ކޮމިޝަނަރ އޮފް ކޮލިޓީ އެޝުއަރަންސަށް މި ބިލުން މަތިކޮށްފައިވެއެވެ.
މި ޤާނޫނަށް ޢަމަލުކުރަން ފަށާއިރު ޑިރެކްޓަރ ޖެނެރަލް އޮފް ހެލްތު ސަރވިސަސްގެ މަޤާމަށް މީހަކު ޢައްޔަނުކޮށްފައިވާނަމަ، އަދި އެއީ މި ޤާނޫނުގައި ބަޔާންކުރާ ޝަރުޠުތައް ފުރިހަމަވާ ފަރާތެއްނަމަ، މި ޤާނޫނުގެ ބޭނުމަށް ޓަކައި އެފަރާތަކީ މި ޤާނޫނަށް ޢަމަލުކުރަން ފަށާ ތާރީޚުން ފެށިގެން އެ މަޤާމަށް އައްޔަނުކުރެވިފައިވާ ފަރާތެއްކަމުގައި ބެލެވޭނެކަމަށް މި ބިލުގައި ބަޔާންކޮށްފައިވެއެވެ.
ޤާނޫނު ނަންބަރު 2015/29 (ޞިއްޙީ ޚިދުމަތް ދިނުމުގެ ޤާނޫނު) އަށް 1 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ މިއަދު ތަޞްދީޤުކުރެއްވުމާ ގުޅިގެން މި ޤާނޫނުގެ ދަށުން އެކުލަވާލާފައިވާ ޤަވާޢިދުތަކަށް ގެންނަންޖެހޭ އިޞްލާޙުތައް، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 3 މަސްދުވަހުގެ ތެރޭގައި އެކުލަވާލައި، ދިވެހި ސަރުކާރުގެ ގެޒެޓުގައި ޝާއިޢުކުރަންވާނެކަމުގައި ބަޔާންކުރައްވާފައިވެއެވެ.
މި ޤާނޫނަށް ޢަމަލުކުރަން ފަށާނީ، މި ޤާނޫނު ފާސްވެ، ތަޞްދީޤުކޮށް، ދިވެހިސަރުކާރުގެ ގެޒެޓުގައި ޝާއިޢުކުރާ ތާރީޚުން ފެށިގެން 6 (ހައެއް) މަސް ދުވަސް ހަމަވާ ތާރީޚުން ފެށިގެންނެވެ
4. ވިޔަފާރި ރަޖިސްޓަރީކުރުމުގެ ޤާނޫނަށް 2 ވަނަ އިޞްލާޙު ގެނައުމުގެ ބިލު
މި ބިލަކީ، 2024 އޯގަސްޓު 22 ވީ ބުރާސްފަތި ދުވަހު ބޭއްވެވި ރައްޔިތުންގެ މަޖިލީހުގެ 2024 ވަނަ އަހަރުގެ ދެވަނަ ދައުރުގެ 32 ވަނަ ޖަލްސާއިން ފާސްކުރެއްވި ބިލެކެވެ.
މި ބިލުން ބޭރުގެ ފަރާތްތަކުން ދިވެހިރާއްޖޭގައި ވިޔަފާރިކުރެވޭ އުސޫލު ބަދަލުކޮށް، ބޭރު ކުންފުނިތަކާއި ރާއްޖޭގައި އިންވެސްޓުކުރާ ފަރާތްތަކަށް، ވަކިކަންތައްތަކެއް ފުރިހަމަކުރުމުން ވިޔަފާރިކުރެވޭގޮތަށް އިޞްލާޙު ގެނެސްފައިވެއެވެ. އެގޮތުން، ބޭރުގެ ފަރާތަކީ ކުންފުންޏެއްނަމަ، ކުންފުނި ރާއްޖޭގައި ރީ-ރަޖިސްޓަރީކުރުމާއި، ކުންފުންޏަކަށްނުވާނަމަ، ކުންފުންޏާބެހޭ ޤާނޫނު ނުވަތަ ޕާޓްނަރޝިޕް ޤާނޫނުގެ ދަށުން ކުންފުންޏެއްގެ ނުވަތަ ޕާރޓްނަރޝިޕެއްގެ ގޮތުގައި ރާއްޖޭގައި ރަޖިސްޓަރީކުރުމާއި، ފޮރިން އިންވެސްޓްމަންޓު ޤާނޫނުގެ ދަށުން ރާއްޖޭގައި އިންވެސްޓްކުރުމުގެ ހުއްދަ ހޯދުންފަދަ ކަންކަން ފުރިހަމަކުރުމަށް ލާޒިމުކޮށްފައިވެއެވެ.
އޭގެ އިތުރުން އިސްވެދެންނެވުނު ކަންކަން ފުރިހަމަކުރުމަކާނުލައިވެސް، ޤާނޫނު ނަންބަރު 2/2006 (ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނު) ގެ ދަށުން ހުއްދަކުރާ ބާވަތެއްގެ ސެކިއުރިޓީޒްގައި ބޭރުގެ ފަރާތްތަކުން އިންވެސްޓްކުރެވޭނޭ މަގު ފަހިކޮށްދީފައިވެއެވެ. އަދި މި ސެކިއުރިޓީޒްގައި އިންވެސްޓްކުރަން އެދޭ ބޭރުގެ ފަރާތަކީ، އެކުއިޓީގައި އިންވެސްޓްކުރަން އެދޭ ފަރާތެއްނަމަ، ސެކިއުރިޓީޒް މުޢާމަލާތެއްގައި އެފަރާތަކުން ގަންނަ ޙިއްޞާގެ މިލްކުވެރިކަން 10 އިންސައްތައަށްވުރެ އިތުރުވެގެންނުވާނެކަމަށް ބަޔާންކޮށްފައިވެއެވެ.
ޤާނޫނު ނަންބަރު 18/2014 (ވިޔަފާރި ރަޖިސްޓަރީކުރުމުގެ ޤާނޫނު) އަށް 2 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ މިއަދު ތަޞްދީޤުކުރެއްވުމާ ގުޅިގެން މި ޤާނޫނު މިއަދު ވަނީ ދިވެހި ސަރުކާރުގެ ގެޒެޓުގައި ޝާއިޢު ކުރައްވައިފައެވެ. މި ޤާނޫނަށް ޢަމަލުކުރަން ފެށުމަށް ހަމަޖެހިފައިވަނީ މި ޤާނޫނު ތަޞްދީޤުކުރައްވައި، ދިވެހިސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެންނެވެ.
5. ފޮރިން އިންވެސްޓްމަންޓްގެ ބިލު
މި ބިލަކީ، 2024 އޯގަސްޓު 22 ވީ ބުރާސްފަތި ދުވަހު ބޭއްވެވި ރައްޔިތުންގެ މަޖިލީހުގެ 2024 ވަނަ އަހަރުގެ ދެވަނަ ދައުރުގެ 32 ވަނަ ޖަލްސާއިން ފާސްކުރެއްވި ބިލެކެވެ.
މި ޤާނޫނުގެ މަޤުޞަދަކީ ދިވެހިރާއްޖޭގައި ކުރެވޭ ބޭރުގެ އިންވެސްޓްމަންޓްތައް އިތުރުކޮށް، އިންވެސްޓްމަންޓްތައް މެދުވެރިކޮށް ފޮރިން ކެޕިޓަލާއި، ޓެކްނޯލޮޖީ އާއި، ޢިލްމާއި ހުނަރު ގެނައުމަށް ފަހި މާޙައުލެއް އުފައްދައި، ދިވެހިރާއްޖޭގެ އިޤްޠިޞާދު ތަރައްޤީކުރުމަށްޓަކައި ހަރުދަނާ އުޞޫލުތަކެއް ކަނޑައެޅުމެވެ.
މި ބިލުގައި، ދިވެހިރާއްޖޭގައި ބޭރުގެ ފަރާތްތަކަށް އިންވެސްޓްކުރެވޭނެ ދާއިރާތައް ކަނޑައެޅުމާގުޅޭ އުސޫލުތަކާއި، އެފަދަ ފަރާތްތަކަށް ދިވެހިރާއްޖޭގައި އިންވެސްޓްކުރުމުގެ ހުއްދަ ދޫކުރުމާގުޅޭ އުސޫލުތަކާއި، އެފަދަ އިންވެސްޓަރުންނަށް ލިބިދެވޭނެ ޙިމާޔަތާއި ރައްކާތެރިކަމާގުޅޭ އުސޫލުތަކާއި، އެފަދަ އިންވެސްޓްމަންޓްތައް ދައުލަތަށް ނެގޭނެ ޚާއްޞަ ޙާލަތްތަކާއި އެފަދައިން ނެގޭ އިންވެސްޓްމަންޓްތަކަށް ބަދަލުދެވޭނެ އުސޫލުތަކާއި، އެނޫންވެސް ކަމާގުޅޭ އުސޫލުތައް ބަޔާންކުރައްވާފައިވެއެވެ.
ހަމައެހެންމެ މި ބިލުގައި، ބޭރުގެ އެއްވެސް ފަރާތަކަށް ދިވެހިރާއްޖޭގައި ފޮރިން އިންވެސްޓްމަންޓެއް ކުރެވޭނީ، އިންވެސްޓްކުރުމުގެ ހުއްދައަށް އެދި މިނިސްޓްރީއަށް ހުށަހަޅައި، ފޮރިން އިންވެސްޓްމަންޓް އެޕްރޫވަލް އަދި ލައިސަންސް ހޯދުމަށްފަހުގައިކަންވެސް ބަޔާންކޮށްފައިވެއެވެ. އަދި ފޮރިން އިންވެސްޓްމަންޓްގެ ހުއްދަ ދިނުމުގައި ފުރިހަމަކުރަންޖެހޭ މަރުޙަލާތަކާއި، ފޮރިން އިންވެސްޓްމަންޓް ލައިސަންސް ދިނުމުގެ އިޖުރާއަތުތަކާއި، އިންވެސްޓަރުންގެ ޒިންމާތަކާއި، އިންވެސްޓަރުންނަށް މި ޤާނޫނުން ލިބިދެވޭ ޙިމާޔަތާއި ރައްކާތެރިކަމާ ގުޅޭ މާއްދާތައް މި ބިލުގައި ހިމަނައިފައިވެއެވެ.
އޭގެއިތުރުން، މި ބިލުގައި އިންވެސްޓްމަންޓް ދައުލަތަށް ނެގިދާނެ ޚާއްޞަ ޙާލަތްތަކާއި، ޤާނޫނާ ޚިލާފުވާނެ ޢަމަލުތައް ކަނޑައަޅައިފައިވެއެވެ. އަދި، ޤާނޫނު ނަންބަރު 24/2014 (ސްޕެޝަލް އިކޮނޮމިކް ޒޯނުގެ ޤާނޫނު) ފިޔަވައި ފޮރިން އިންވެސްޓްމަންޓާ ގުޅޭގޮތުން އެހެން ޤާނޫނެއްގައި ބަޔާންކޮށްފައިވާ އުސޫލެއް މި ޤާނޫނާ ފުށުއަރާނަމަ، އިސްކަންދޭނީ މި ޤާނޫނަށް ކަމުގައި މި ބިލުގައި ބަޔާންކޮށްފައިވެއެވެ.
މި ބިލާ ގުޅޭގޮތުން އިތުރު މަޢުލޫމަތު މީޑިއާއަށް ދެއްވުމުގެ ގޮތުން ރައީސުލްޖުމްހޫރިއްޔާގެ އޮފީހުގައި މިއަދު ވަނީ ނޫސްވެރިންގެ ބައްދަލުވުމެއް ބާއްވައިފައެވެ. މި ނޫސްވެރިންގެ ބައްދަލުވުމުގައި މި ބިލާ ގުޅޭ މަޢުލޫމާތުތައް ޙިއްޞާކުރެއްވީ ކަމާ ގުޅޭ ސަރުކާރުގެ އިދާރާތަކުގެ އެންމެ އިސްވެރިންނެވެ. އޭގެ ތެރޭގައި މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑާއި، އެޓަރނީ ޖެނެރަލް ހިމެނެއެވެ.
01 މޭ 1979 ގައި ޤާނޫނު ނަންބަރު 25/79 (ދިވެހިރާއްޖޭގައި ކުރެވޭ ފޮރިން އިންވެސްޓްމަންޓާބެހޭ ޤާނޫނު) ވުޖޫދަށް އައިތާ 45 އަހަރު ފަހުން، މިއީ މި ޤާނޫނަށް ޒަމާނީ ބަދަލެއް ގެނެވުނު ފުރަތަމަ ފަހަރެވެ.
ފޮރިން އިންވެސްޓްމަންޓްގެ ބިލު ރައީސުލްޖުމްހޫރިއްޔާ މިއަދު ތަސްދީޤުކުރެއްވުމާއި ގުޅިގެން މި ޤާނޫނު މިއަދު ވަނީ ދިވެހި ސަރުކާރުގެ ގެޒެޓުގައި ޝާއިޢު ކުރައްވައިފައެވެ. މި ޤާނޫނަށް ޢަމަލުކުރަން ފަށާނީ މި ޤާނޫނު ފާސްވެ ތަޞްދީޤުކޮށް، ދިވެހިސަރުކާރުގެ ގެޒެޓުގައި ޝާއިޢުކުރާ ތާރީޚުން ފެށިގެން 3 މަސްދުވަސް ފަހުންނެވެ. އަދި މި ބިލުގެ ދަށުން ހެދުމަށް ބަޔާންކޮށްފައިވާ ގަވާއިދުތައް، ޤާނޫނަށް ޢަމަލުކުރަން ފަށާތާ 3 މަސްދުވަހުގެ ތެރޭގައި އެކުލަވައިލައި ގެޒެޓުގައި ޝާއިޢުކުރަން ޖެހެއެވެ.
މި ޤާނޫނަށް ޢަމަލުކުރަން ފެށުމާއެކު، ޤާނޫނު ނަންބަރު 25/79 (ދިވެހިރާއްޖޭގައި ކުރެވޭ ފޮރިން އިންވެސްޓްމަންޓާބެހޭ ޤާނޫނު) އުވުނީއެވެ.
