ފިނޮޅަކަށް ދަތުރުކޮށް އުޅެނިކޮށް ގެއްލުނު ޒުވާނާ ހޯދުމުގެ މަސައްކަތް އެމްއެންޑީއެފުން ފުޅާ ދާއިރާއެއްގައި ކުރިއަށް ގެންގޮސްފިއެވެ.
ފުލުހުންވެސް މި މަސައްކަތުގައި އާންމުންގެ އެހީތެރިކަން ހޯދުމަށް ގެއްލުނު ފަރާތުގެ މަޢުލޫމާތު ވަނީ ހާމަކޮށްފައެވެ. ގެއްލިގެން ހޯދަމުންދަނީ 43 އަހަރުގެ ތަސްލީމް މުހައްމަދު (މ. އަސަރީ ހަނދާން) އެވެ.
ތަސްލީމް އުޅުނީ ކ. ހުވަފެންފުށި ދެކުނުން ހިއްކާފައިވާ ސަރަހައްދުގައެވެ. އެމްއެންޑީއެފްގެ ފަރާތުން މަޢުލޫމާތު ދެއްވިގޮތުގައި، އޭނާ ހޯދުމަށް ފިނޮޅުގެ ވަށައިގެން 5,000 އަކަފޫޓުގެ ސަރަހައްދެއް ސްނޯކަލްކޮށް، އަދި 3,000 އަކަފޫޓުގެ ސަރަހައްދެއް ކަނޑުއަޑިން ޑައިވްކޮށްގެން ކޯސްޓްގާޑުގެ ޑައިވަރުން ބަލާފައިވެއެވެ.
ފުލުހުން ދެއްވި މަޢުލޫމާތުގައިވާ ގޮތުން، ތަސްލީމް އެންމެ ފަހުން ފެނިފައިވަނީ ބުދަ ދުވަހުގެ ހެނދުނު 10:00 އާއި 11:00 އާ ދެމެދުގެ ވަގުތެއްގައެވެ.
ތަސްލީމާ ބެހޭ އެއްވެސް މަޢުލޫމާތެއް ލިބިފައިވާނަމަ، ނުވަތަ އެ ސަރަހައްދަށް ދަތުރުކުރި އެހެން ފަރާތްތަކެއްގެ މަޢުލޫމާތު އެނގޭނަމަ، ހިންމަފުށި ޕޮލިސް ސްޓޭޝަނަށް (9794639) އެންގުމަށް ފުލުހުން އެދިފައިވެއެވެ.
މާލޭ ސިޓީ ކައުންސިލުގެ މޭޔަރ އާދަމް އާޒިމް ވިދާޅުވެފައިވަނީ ކައުންސިލުގެ މުވައްޒަފެއް ކަމަށްވާ ތަސްލީމް ހޯދުމަށް ކަމާބެހޭ އިދާރާތަކާ ގުޅިގެން މަސައްކަތްކުރަމުންދާ ކަމަށެވެ. އަދި މި މައްސަލައިގައި ކައުންސިލުން ކުރެވެން ހުރި ހުރިހާ ކަމެއް ކުރިއަށް ގެންދާނެ ކަމަށްވެސް މޭޔަރ ފާހަގަކުރެއްވިއެވެ.
