މާލެ ސަރަހައްދުގައި ޤަވާއިދާ ޚިލާފަށް ދިރިއުޅޭ ބިދޭސީން ދެނެގަތުމަށް މޯލްޑިވްސް އިމިގްރޭޝަނުން ހިންގި ޚާއްޞަ އޮޕަރޭޝަންގައި، ވިސާ ފުރިހަމަނުވާ 273 ބިދޭސީންނަށް ނޯޓިސް ދީފައިވާކަމަށް އެ އިދާރާއިން ހާމަކޮށްފިއެވެ.
މިދިޔަ ބުދަ ދުވަހު ދެ ގަޑިއިރުގެ މުއްދަތަށް ކުރިއަށްގެންދިޔަ މި ހަރަކާތުގައި މާލޭގެ 582 ތަނެއް ބަލައި ފާސްކޮށް، 1,025 ބިދޭސީންނާ ސުވާލުކުރެވުނުކަމަށް އިމިގްރޭޝަންއިން ބުނެފައި ވެއެވެ. މީގެ އިތުރުން، މި އޮޕަރޭޝަންގައި ގަވާއިދާ ޚިލާފަށް ބިދޭސީންލައްވާ މަސައްކަތްކުރުވި 120 ދިވެހިންނަށް ލިޔުމުން ނަސޭހަތް ދެވުނުއިރު، ރާއްޖޭގައި ފިލައިގެން އުޅޭކަމަށް ރިޕޯޓުކޮށްފައިވާ 10 ބިދޭސީން ހޯދައި، އިމިގްރޭޝަންގެ ބެލުމުގެ ދަށަށް ގެނެވިފައި ވެއެވެ.
މި އޮޕަރޭޝަންގައި 211 އިމިގްރޭޝަން އޮފިސަރުން 52 ގްރޫޕަކަށް ބަހާލައި، މާލޭގެ 26 ތަނެއް ބަލައި ފާސްކޮށްފައި ވެއެވެ. މިއީ ދިވެހިރާއްޖޭގައި ޤާނޫނާ ޚިލާފަށް ދިރިއުޅޭ ބިދޭސީންގެ މައްސަލަ ޙައްލުކުރުމަށް ސަރުކާރުން ކުރަމުންދާ ފުޅާ ދާއިރާގެ މަސައްކަތުގެ ބައެކެވެ.
މާލޭގައި ކުރިއަށްގެންދާ މި އޮޕަރޭޝަންގެ އިތުރުން، "އޮޕަރޭޝަން ކުރަނގި" ގެ ނަމުގައި އިތުރު އޮޕަރޭޝަނެއްވެސް ފަށާފައިވެއެވެ. މި އޮޕަރޭޝަންގެ ދަށުން، މީހުން ދިރިއުޅޭ ރަށްރަށާއި، ޓޫރިސްޓް ރިސޯޓުތަކާއި، ސިނާޢީ ރަށްތަކާއި އަދި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މަޢުލޫމާތު އެއްކުރުމުގެ މަސައްކަތް ކުރިއަށްދެއެވެ.
