ސިނަމާލެ ބްރިޖަކީ ރާއްޖެ އާއި ޗައިނާގެ އެއްބައިވަންތަ ކަމުގެ އަލިގަދަ ހެއްކެއް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ބްރިޖަށް ހަ އަހަރު ފުރުމުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ރައީސް ވިދޅުވީ ސިނަމާލެ ބްރިޖަކީ ރާއްޖޭގައި އިންޖިނިއަރިންގެ ދާއިރާގައި ފާހަގަކޮށްލެވޭ ބިނާއެއް ކަމަށެވެ.
ރައީސް އިތުރަށް ވިދާޅުވީ ސިނަމާލެ ބްރިޖަކީ ހަމައެކަނި ދެ ރަށެއް ގުޅައިލަދޭ ބްރިޖެއް ނޫން ކަމަށާއި، އެ ބްރިޖުން ރާއްޖެ-ޗައިނާ އާއި ދެމެދުގައި އޮތް އިތުބާރާއި ރަހުމަތްތެރިކަން ރަމްޒުކޮށްދޭ ކަމަށެވެ. މީގެ އިތުރުން، ރައީސް ވިދާޅުވީ ސިނަމާލެ ބްރިޖަކީ ދެ ގައުމުގެ ދެމެދުގައި އޮތް އެއްބައިވަންތަކާއި ކުރިއެރުމުގެ އަލިގަދަ ހެއްކެއް ކަމަށާއި، ބްރިޖުން ކުރިއަށް އޮތް ޖީލުތަކަށް ވެސް ފައިދާ ވެގެންދާނެ ކަމަށެވެ.
"ޗައިނާ މޯލްޑިވްސް ފްރެންޑްޝިޕް ބްރިޖް" ގެ ނަމުން މަޝްހޫރު މި ބްރިޖު ހުޅުވުނީ 2018 ވަނަ އަހަރުގެ އޮގަސްޓް މަހުގެ 30 ވަނަ ދުވަހުއެވެ. މި ބްރިޖު އެޅުމަށް ޖުމްލަ 200 މިލިއަން ޑޮލަރު ހަރަދުވިއެވެ. މީގެ ތެރޭގައި ހިމެނެނީ ޗައިނާ ސަރުކާރުން ދިން ހިލޭ އެހީގެ 116 މިލިއަން ޑޮލަރާއި ލޯނު އެހީގެ ގޮތުގައި އެގައުމުން ދިން 72 މިލިއަން ޑޮލަރެވެ. އަދި ދިވެހި ސަރުކާރުން މި މަޝްރޫއުއަށް 12 މިލިއަން ޑޮލަރު ހަރަދުކޮށްފައިވެއެވެ.
މި މަޝްރޫއު ކުރިއަށްގެންދެވުނު އިރު، ގެދޮރުވެރިކަމާއި ބެހޭ ވުޒާރާގެ ވަޒީރަކަށް ހުންނެވީ މިހާރުގެ ރައީސް ޑރ. މުއިއްޒެވެ.
