މުހީތު މަރާލި މައްސަލައިގައި މަރުގެ ޙުކުމް އިއްވާފައިވާ ކުޑަކުއްޖެއްގެ މައްސަލަ ސުޕްރިމް ކޯޓަށް ހުށަހަޅައިފި

މުހީތު މަރާލި މައްސަލައިގައި މަރުގެ ޙުކުމް އިއްވާފައިވާ ކުއްޖެއްގެ މައްސަލަ ސުޕްރީމް ކޯޓަށް ހުށަހަޅައިފިއެވެ.

2012 ވަނަ އަހަރު ފެބްރުއަރީ މަހު ފިނޭންސް މިނިސްޓްރީ ކުރިމަތީގައި ގ. ވޭރު އަބްދުލްމުހީތު މަރާލި މައްސަލައިގައި ދައުލަތުން ދަޢުވާކުރީ އޭރު 18 އަހަރު ނުފުރޭ ދެ ކުއްޖެއްގެ މައްޗަށެވެ. އެއީ އަލީ އަތޫފާއި މުޙައްމަދު މާހިން ޝާފީއެވެ. މިހާރު ސުޕްރީމް ކޯޓަށް ހުށަހަޅާފައިވަނީ އަލީ އަތޫފުގެ މައްސަލައެވެ.

ޖުވެނައިލް ކޯޓުން އަތޫފު މަރަން ނިންމި ނިންމުމަކީ ހައިކޯޓުން ތާއީދުކޮށްފައިވާ މައްސަލައެވެ. ހައިކޯޓުން މި މައްސަލައިގައި ޙުކުމްކުރީ 2016 ގައެވެ.

ދެ ހެކިވެރިންގެ ބަހުންނާއި، ފޯނު ކޯލަކުން އެ ދެ ކުދިން ދައްކާފައިވާ ވާހަކަތަކުން ކުށް ސާބިތުވާކަމަށް ކޯޓުތަކުން ނިންމާފައިވެއެވެ. އަދި ހާދިސާއަށްފަހު އެ ކުދިން އޭޑީކޭގައި އުޅުނު މަންޒަރު ފެންނަ ވީޑިއޯ ފުޓޭޖެއްވެސް ހެކީގެ ގޮތުގައި ހުށަހެޅުނެވެ.

މުހީތަށް ހަމަލާދިން ގޮތުގެ ތަފްސީލު އެ ދެ ކުދިން ފޯނުން ކިޔައިދިން ކަމަށް ބުނާ ރެކޯޑިންގއެއްވެސް ހެކީގެ ގޮތުގައި ހުށަހެޅުނެވެ. ފޯނު ކޯލް އެނަލިސިސް ހެދިއިރު، އެ ދެ ކުއްޖާގެ އަޑާ ފޯނު ކޯލުގައި ހުރި އަޑު ދިމާވިއެވެ.

އިސްލާމީ ޝަރީޢަތުގައި 15 އަހަރުވުމުން ފިރިހެން ކުއްޖަކު ބާލިޣުވެއްޖެ ކަމަށް ބެލެވޭނެ ކަމަށާއި، ގާނޫނުގައިވެސް ގަސްދުގައި މީހަކު މެރުމުގެ ކުށުގެ ޒިންމާ ކުޑަކުއްޖަކުވެސް އުފުލަންޖެހޭނެ ކަމަށް ބަޔާންކޮށްފައިވާކަން ޙުކުމުގައި ފާހަގަކޮށްފައިވެއެވެ.

މުހީތުގެ ހުރިހާ ވާރިސުންވެސް ބޭނުންވަނީ ގާތިލުންގެ ކިބައިން މަރަށް މަރު ހިފުމަށް ކަމަށްވާތީ، މި ސަބަބުތަކަށް ރިޢާޔަތްކޮށް ހައިކޯޓުންވެސް އެ ދެ ކުދިން މަރަން ޙުކުމްކުރިކަމަށް ބަޔާންކޮށްފައިވެއެވެ.