ސްޕެޝަލް އިކޮނޮމިކް ޒޯން (އެސްއީޒެޑް)ގެ ފުރަތަމަ މަޝްރޫޢު ކަމުގައިވާ ސޯލާ ސިޓީ ޕްރޮޖެކްޓް ނޮވެމްބަރު މަހު ފެށޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ. މިނިސްޓަރު މި މަޢުލޫމާތު ހާމަކުރެއްވީ ރޭ ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަ ދައްކަވަމުންނެވެ.
މި މަޝްރޫޢުގެ މުހިންމުކަން ފާހަގަކުރައްވަމުން، މިނިސްޓަރު ވިދާޅުވީ ރާއްޖޭގައި ބޭރު ފައިސާގެ ބޭނުން އެންމެ ބޮޑަށް ކުރެވެނީ އިމްޕޯޓް ކުރާ ތެލަށް ކަމަށެވެ. އެގޮތުން ކޮންމެ އަހަރަކު 500 އިން 600 މިލިއަން ޑޮލަރު ދައުލަތުން ތެޔޮ ގަތުމަށް ޚަރަދުކުރާ ކަމަށް އޭނާ ވިދާޅުވިއެވެ.
ސޯލާ ސިޓީ ޕްރޮޖެކްޓުން 100 މެގަވޯޓުގެ ކަރަންޓް އުފައްދާނެ ކަމަށާއި، މިއީ ތެލަށް ކުރާ ޚަރަދު ބޮޑުތަން ކުޑަކުރެވޭނެ ގޮތެއް ކަމަށް މިނިސްޓަރު ފާހަގަކުރެއްވިއެވެ. މަޝްރޫޢުގެ ތައްޔާރީތައް ނިމެމުންދާ ކަމަށާއި، ކޮމާޝަލް ކޮންޓްރެކްޓް، ޓެކްނިކަލް ކޮންޓްރެކްޓް، އަދި އީއައިއޭއާއި އެންވަޔަރަންމަންޓަލް މަސައްކަތްތައް ނިމުމާ ކައިރިވެފައިވާ ކަމަށްވެސް އޭނާ ވިދާޅުވިއެވެ.
މިނިސްޓަރު ސައީދު ވިދާޅުވީ އަމާޒަކީ އޮކްޓޫބަރު މަހު ފުލް ލައިސަންސް ދިނުމަށްފަހު، ނޮވެމްބަރު މަހު މަސައްކަތް ފެށުން ކަމެގައެވެ. އަދި 3 އަހަރުގެ ތެރޭގައި 100 މެގަވޯޓުގެ ކަރަންޓު އުފެއްދުން ކަމުގައިވެސް މިނިސްޓަރ ސައީދު ވިދާޅޫވިއެވެ.
މި މަޝްރޫޢު ހަވާލުކޮށްފައިވަނީ ކެނެޑާގެ ކުންފުންޏެއް ކަމަށްވާ އަބްރަކްސަސް ޕަވާ ކޯޕަރޭޝަނާއެވެ. އޭގެ ޓެކްނިކަލް ޕާޓްނަރަކީ ސަންގްރޯ ޕަވާ ސަޕްލައި ކޮމްޕެނީ ލިމިޓެޑެވެ.
މަޝްރޫޢުގެ ދަށުން މާލެ ސަރަހައްދުގައި 150 މެގަވޮޓްގެ ފްލޯޓިން ފޮޓޯ ވޮލްޓައިކް (ޕީވީ) އިންޖީނުގެއަކާއި، އެއާ ގުޅުންހުރި ސިވިލް އަދި އިލެކްޓްރިކަލް އިންފްރާސްޓްރަކްޗާ ގާއިމުކުރެވޭނެއެވެ. މީގެ އިތުރުން ލީ އޮން ބެޓެރީ ސިސްޓަމަކާއި އެނާޖީ މެނޭޖްމަންޓް ސިސްޓަމަކާއި މައި ޕަވާ ގްރިޑާ އިންޓަކަނެކްޝަނަށް ބޭނުންވާ އިންވެސްޓްމަންޓްތަކާ އެކު ގުޅާލެވޭނެ ކަމަށް މިނިސްޓްރީން މަޢުލޫމާތު ދީފައިވެއެވެ.
