އަލްއަޤްޞާ މިސްކިތުގައި ޔަހޫދީންގެ ފައްޅިއެއް އެޅުމަށް އިސްރާއީލުގެ ވަޒީރަކު ގޮވާލުމާ ގުޅިގެން ދިވެހި ސަރުކާރުން ހަރުކަށި އިބާރާތުން އެކަން ކުށްވެރިކޮށްފިއެވެ. މިކަމާ ގުޅޭގޮތުން ދިވެހިރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި، އަލްއަޤްޞާ މިސްކިތުގެ މުހިންމުކަމާއި އޭގެ ތާރީޚީ އަދި ޤާނޫނީ ހައިސިއްޔަތު ހިމާޔަތްކުރުމުގެ މުހިންމުކަން ފާހަގަކޮށްފައިވެއެވެ.
ފޮރިން މިނިސްޓްރީގެ ބަޔާނުގައި ބަޔާންކޮށްފައިވާ ގޮތުގައި، އަލްއަޤްޞާ މިސްކިތަކީ 1.8 ބިލިއަނަށްވުރެ ގިނަ މުސްލިމުންނަށް ރޫޙާނީ އަދި ތާރީޚީ ގޮތުން މުހިންމު، އިސްލާމީ ތަރިކައިގެ ރަމްޒެކެވެ. މި ބަޔާނުގައި އިސްރާއީލު ސަރުކާރަށް ގޮވާލާފައިވަނީ އަލްއަޤްޞާ މިސްކިތުގެ ތާރީޚީ އަދި ޤާނޫނީ ހައިސިއްޔަތަށް ބައިނަލްއަޤްވާމީ ޤާނޫނުތަކާއި އދ.ގެ ކަމާބެހޭ ޤަރާރުތަކާ އެއްގޮތްވާ ގޮތުގެ މަތިން އިޙްތިރާމްކުރުމަށެވެ.
ދިވެހި ސަރުކާރުން ފާޅުކުރި ކަންބޮޑުވުމުގެ ތެރޭގައި، މިފަދަ ހަރުކަށި ވާހަކަތަކުގެ ސަބަބުން ޣައްޒާގައި ހަނގުރާމަ ހުއްޓާލުމަށް ކުރަމުންދާ މަސައްކަތަށް ހުރަސްއެޅި، މެދުއިރުމަތީގައި އިތުރު ހަމަނުޖެހުންތަކެއް އުފެދިދާނެކަން ހިމެނެއެވެ. މީގެ އިތުރުން، ގުދުސްގެ ޤާނޫނީ ހައިސިއްޔަތު ބަދަލުކުރުމަށް އަޅާ ފިޔަވަޅުތައް ހުއްޓުވުމަށާއި، ފަލަސްތީނުގެ ރައްޔިތުންގެ ޙައްޤުތައް ޙިމާޔަތްކުރުމަށް ބައިނަލްއަޤްވާމީ މުޖުތަމަޢުއިން މަސައްކަތްކުރުމަށްވެސް ދިވެހި ސަރުކާރުން ގޮވާލާފައިވެއެވެ.
ބަޔާނުގެ ނިމުމުގައި، ފަލަސްޠީނުގެ މިނިވަން ދައުލަތެއް ޤާއިމްކުރުމަށް ކުރާ މަސައްކަތުގައި ދިވެހިރާއްޖެ ދެމިއޮންނާނެކަން އިތުރަށް ފާހަގަކޮށްފައިވެއެވެ.
