މާލޭގެ މ. އެކިފަރުގޭގައި ބިދޭސީން ގަވާއިދާ ޚިލާފަށް ހިންގަމުންދިޔަ ކާބޯތަކެތީގެ ވިޔަފާރިއެއް ޓާސްކު ފޯސްއިން ހުއްޓުވާއިފިއެވެ. މި ތަނުގައި އެއްވެސް ސާފުތާހިރުކަމެއް ނެތި ކާބޯތަކެތި ތައްޔާރުކޮށް ވިއްކަމުންދިޔަ ކަމުގެ މަޢުލޫމާތު ލިބުމާ ގުޅިގެން، 2024 އޮގަސްޓު 24 ވަނަ ދުވަހު އިމިގްރޭޝަންގެ ޓާސްކު ފޯސްއިން ވަނީ އެ ތަން ބަލައި ފާސްކޮށްފައެވެ.
މި ތަނުގައި ގަވާއިދާ ޚިލާފަށް ދިރިއުޅެމުންދިޔަ ތިން ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ. އަދި ކަމާ ގުޅުންހުރި އިދާރާތަކުގެ އެހީތެރިކަމާއެކު، މި ތަނުގައި ކުރަމުންދިޔަ ވިޔަފާރި ހުއްޓުވުމަށް ނޯޓިސްއެއް ދީފައިވާ ކަމަށް ޓާސްކު ފޯސްއިން މަޢުލޫމާތު ދީފައިވެއެވެ.
އިމިގްރޭޝަންއިން ކުރި އެކްސް ޕޯސްޓެއްގައި ބުނެފައިވަނީ، މިފަދަ ގަވާއިދާ ޚިލާފު ޢަމަލުތައް ހުއްޓުވުމަށް އެ ފަރާތުން ގަވާއިދުން މޮނިޓަރކޮށް، ބަލައި ފާސްކުރުމުގެ މަސައްކަތް ކުރިޔަށް ގެންދާނެ ކަމުގައެވެ. އަދި މިފަދަ ޢަމަލުތަކާ ގުޅޭ މަޢުލޫމާތު ލިބިއްޖެނަމަ، ވީ އެންމެ އަވަހަކަށް ޓާސްކު ފޯސްއަށް އެންގުމަށްވެސް އިލްތިމާސްކޮށްފައިވެއެވެ.
ގަވާއިދާ ޚިލާފަށް ކާބޯތަކެތި ތައްޔާރުކޮށް ވިއްކުމުގެ ސަބަބުން ޢާންމު ޞިއްޙަތަށް ކުރިމަތިވެދާނެ ނުރައްކާތަކާ ގުޅޭގޮތުން ސަމާލުކަން އިތުރުކުރުމަށް ކަމާބެހޭ އިދާރާތަކުން ގޮވާލާފައިވެއެވެ.
ކޮމެންޓު ފޮނުވާ