ބީއެމްއެލްގެ ޑެބިޓް ކާޑުތަކުން ޑޮލަރިގެ މުއާމަލާތް ނުކުރެވޭ ގޮތަށް ގެނައި ބަދަލަކަކީ އިދިކޮޅު ފަރާތްތަކާ ބައިއަތު ހިފައިގެން ގެންނަން އުޅުނު މާލީ ބަޢާވާތެއްގެ ގޮތުގައި ސިފަކޮށް، ބޭންކުގެ ސީއީއޯ އިސްތިއުފާ ދިނުމަށް މަސްވެރިކަމާބެހޭ ވަޒީރު އަހުމަދު ޝިޔާމު ގޮވާލައްވައިފިއެވެ.
މިރޭ ޕީއެންސީގެ ޖަގަހާގައި އޮތް ޖަލްސާގައި ވާހަކަދައްކަވަމުން ޝިޔާމް ވިދާޅުވީ ބޭންކް އޮފް މޯލްޑިވްސް (ބީއެމްއެލް) އާ ގުޅިގެން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މާލީ ބަޣާވާތެއް ގެންނަން މަސައްކަތްކުރި ކަމަށާއި، ބީއެމްއެލްގެ މި ނިންމުމަކީ ރޭވިގެން، އިންތިޒާމުވެގެން ހިންގަން އުޅުނު ބަޣާވާތެއް ކަމަށެވެ.
ޝިޔާމް ވިދާޅުވީ، އެހެންނަމަވެސް އެ ބަޢާވާތް ނާކާމިޔާބު ވީ ރައީސް ޑރ. މުޙައްމަދު މުޢިއްޒުގެ ހިކުމަތްތެރިކަމުގެ ސަބަބުން ކަމުގައެވެ. އަދި ޝިޔާމްވަނި ބޭންކުގެ ސީއީއޯގެ އިސްތިއުފާއަށްވެސް ގޮވާލައްވާފައެވެ.
މިއަދު ބޭންކް އޮފް މޯލްޑިވްސް މި ޑިޒިޝަން ނެގުމުގައި އެންމެ އިސްކޮށް މަސައްކަތް ކުރެއްވި ބޭފުޅުންނަކީ ސީދާ މި މާލީ ބަޣާވާތް ގެންނަން މަސައްކަތް ކުރެއްވި ބޭފުޅުންނާ އެކީގައި އެންމެ ކުރީ ސަފުގައި ތިއްބެވި ބޭފުޅުން. މިއަދު އެ ބޭފުޅުން ބޯޑުތަކުގައި ތިއްބަވާނެ ކަމެއް ނެތް. އަޅުގަނޑު ދެކޭ ގޮތުގައި ބީއެމްލްގެ ސީއީއޯ ޖެހޭނީ މިއަދު އިސްތިއުފާދޭން.
ޝިޔާމް ވިދާޅުވިއެވެ.
ޝިޔާމް ވިދާޅުވީ ސަރުކާރުގެ މައި ހިއްސާ އޮންނަ ބޭންކަކުން، ސަރުކާރުގެ ލަފަޔާއި އިރުޝާދާ ޚިލާފަށް، ރައްޔިތުންގެ "ކަރުގައި ހިފުން" ބަލައިނުގަނެވޭނެ ކަމަށެވެ.
މި މައްސަލައާ ގުޅިގެން، ރައްޔިތުން އިންތިޚާބުކޮށްފައިވާ ޤާނޫނީ ސަރުކާރެއް، ޣައިރު ޤާނޫނީކޮށް ވައްޓާލަން މަސައްކަތްކޮށްފައިވާ ކަމަށް ބުނެ، ދިވެހި ފުލުހުންގެ ޚިދުމަތުން ވަނީ މައްސަލަ ބެލުމަށް ފަށާފައިވާ ކަމަށްވެސް ބުނެފައެވެ.
