ޑޮލަރުގެ ބްލެކް މާކެޓް ވިޔަފާރި ހުއްޓުވުމަށްޓަކައި، ބޭންކުތަކުން ޑޮލަރު މާރުކުރަން މަޖުބޫރުވާނެ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވާއިދުތައް ބަދަލުކުރުމަށް ނިންމާފައިވާ ކަން ރައީސް ޑރ. މުޙައްމަދު މުޢިއްޒު ހާމަކުރައްވައިފިއެވެ.
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ހަރުގޭގައިމިރޭ ބޭއްވުނު ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ކުރިއަށް އޮތް ހަފުތާއެއްހާ ދުވަހުގެ ތެރޭގައި އެމްއެމްއޭގެ ގަވާއިދުތަކަށް ބައެއް ބަދަލުތައް ގެނެވޭނެ ކަމަށެވެ. މީގެ ތެރޭގައި މަނިޓަރީ ރެގިއުލޭޝަނާއި މަނީ ޗޭންޖަރސް ރެގިއުލޭޝަން ހިމެނެއެވެ.
ރާއްޖެއަށް އަންނަ ފޮރިން ޑައިރެކްޓް އިންވެސްޓްމަންޓްތަކުގެ ނަފާ ރާއްޖޭގެ ބޭންކުތަކުގައި ހިފެހެއްޓުމަށް ހިތްވަރު ދިނުމުގެ ގޮތުން، ފޮރިން ޑައިރެކްޓް އިންވެސްޓްމަންޓް އަދި ބިޒްނަސް ޕްރޮފިޓް ޓެކްސްއާ ގުޅޭ އެމްއެމްއޭގެ ގަވާއިދުތައް ވެސް ބަދަލުކުރެވޭނެ ކަމަށް ރައީސް ވިދާޅުވިއެވެ.
މީގެ އިތުރުން، ޑޮލަރުން އާމްދަނީ ލިބޭ ވިޔަފާރިތަކުން ކޯޕަރޭޓް އިންކަމް ޓެކްސް ދެއްކުމުގައި މިހާރު ރުފިޔާއިން ދައްކަން ޖެހޭ ގޮތް ބަދަލުކޮށް، ޑޮލަރުން ދެއްކޭނެ ގޮތް ހަމަޖައްސާނެ ކަމަށާއި، މިފަދަ ވިޔަފާރިތަކުން އިމްޕޯޓްކުރާ ތަކެއްޗަށް ވެސް އިމްޕޯޓް ޑިއުޓީ ޑޮލަރުން ދެއްކޭނެ ގޮތަށް ބަދަލުކުރާނެ ކަމަށް ރައީސް ވިދާޅުވިއެވެ.
އަދި ޑޮލަރުން މުސާރަ ދޭ ތަންތަނުން މިހާރު ރުފިޔާއިން ދައްކަމުންދާ ޕެންޝަން ފައިސާ، ޑޮލަރުން ޖަމާކުރެވޭނެ ގޮތަށް ޕެންޝަން ގާނޫނަށް ބަދަލު ގެނެވޭނެ ކަމަށް ވެސް ރައީސް ވިދާޅުވިއެވެ.
މި ބަދަލުތަކުގެ ސަބަބުން ރާއްޖޭގައި ޑޮލަރު ހިފެހެއްޓި، ބްލެކް މާކެޓް ހަމައަކަށް އަޅުވައި، ބޭންކުތަކުގެ ޑޮލަރު ރިޒާވް އިތުރުވެގެންދާނެ ކަމަށް ރައީސް ވިދާޅުވިއެވެ. އަދި މި ބަދަލުތަކުގެ ސަބަބުން ރައްޔިތުންނަށް އެއްވެސް ދަތިކަމެއް ނުވާނެ ކަމުގެ ޔަގީންކަން ވެސް ރައީސް ދެއްވިއެވެ.
