އެމްޑީޕީން ޤައުމު އަޑި ނޭނގޭ އަނދަވަޅަކަށް ވައްޓާލައި، ސަތޭކަ އަހަރާ ނުބައްދަލު ދަރަނި ނަގާފައިވާ ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
ސައީދު މިހެން ވިދާޅުވީ، ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއަރޕާސަން ފައްޔާޟް އިސްމާޢީލް ކުރެއްވި އެކްސް ޕޯސްޓަކަށް ޖަވާބު ދެއްވުމުގެ ގޮތުންނެވެ.
ބޭންކް އޮފް މޯލްޑިވްސްގެ ޑެޕިއުޓީ ސީއީއޯ އައިޝަތު ނޫރައްދީން އެ ބޭންކުގެ ބޯޑު މެންބަރުކަމުން ވަކިކުރެއްވުމާ ގުޅިގެން ފައްޔާޟް އެކްސްގައި ޕޯސްޓެއްގައި ވިދާޅުވީ، ދައުލަތުގެ މާލީ ނިޒާމުގެ ނަޒާހަތްތެރިކަން ދެމެހެއްޓުމަށްޓަކައި ބޭންކް އޮފް މޯލްޑިވްސްއަށް ސަރުކާރުގެ ނުފޫޒު ފޯރުވުން ހުއްޓާލަންޖެހޭ ކަމަށެވެ. އަދި ބީއެމްއެލްއަކީ އިޤްތިޞާދުގެ މުހިންމު ބައެއްކަމަށާއި، އެ ބޭންކަށް މިނިވަންކަމާއެކު ހިންގުމުގެ ފުރުޞަތު އޮންނަންވާނެ ކަމަށްވެސް ފައްޔާޟް ވިދާޅުވިއެވެ.
ފައްޔާޟް އިތުރަށް ވިދާޅުވެފައިވަނީ، އައިޝަތު ނޫރައްދީންފަދަ ބޭފުޅަކު ބީއެމްއެލްގެ ބޯޑުން ވަކިކުރުމަކީ މޮޔަ ކަމެއް ކަމަށާއި، އެކަމުގެ ސަބަބުން ބައިނަލްއަޤްވާމީ މުޖުތަމަޢުގެ މެދުގައި ރާއްޖޭގެ މާލީ ނިޒާމާމެދު ނޭދެވޭ ވިސްނުމެއް އުފެދިގެންދާނެ ކަމަށެވެ.
ފައްޔާޟްގެ މި ޕޯސްޓާ ގުޅިގެން ސަޢީދު ވިދާޅުވެފައިވަނީ، 100 އަހަރާ ނުބައްދަލު ދަރަނި ނަގައި، އަޑި ނޭނގޭ ފުންމިނަކަށް ރާއްޖޭގެ އިޤްތިޞާދު ވައްޓާލި ފަސް އަހަރުގެ މިނިސްޓަރަކު އެފަދަ ވާހަކައެއް ދެއްކުމަކީ ލަދުވެތި ކަމެއް ކަމަށެވެ. ސަޢީދު އިތުރަށް ވިދާޅުވެފައިވަނީ، މުޅި ނިޒާމު އެ ފުށް މި ފުށަށް ޖަހައި، ޤައުމުގެ މާލިއްޔަތު އަނދަވަޅަކަށް ވައްޓާލީ އެމްޑީޕީން ކަމަށާއި، ވަކި މީހަކަށްވުރެ ޤައުމުގެ މަޞްލަޙަތު މާ މުހިންމު ކަމަށެވެ.
