ރާއްޖޭގެ ޑޮމެސްޓިކް އެއަރޕޯޓުތަކުގެ އެމަރޖެންސީ ހާލަތްތަކުގައި އެހީތެރިކަން ފޯރުކޮށްދިނުމަށް ރީޖަނަލް އެއަރޕޯޓްސް ކޮމްޕެނީ (އާރް.އޭ.ސީ.އެލް) އާއި މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އާ ދެމެދު އެއްބަސްވުމެއްގައި ސޮއިކުރެވިއްޖެއެވެ.
މިއަދު ދެ ކުންފުނީގެ މެދުގައި ސޮއިކުރެވުނު މެމޮރަންޑަމް އޮފް އަންޑަސްޓޭންޑިންގ (އެމް.ޔޫ.އޯ) ގެ ދަށުން، އެއަރޕޯޓްތަކަށް ދިމާވެދާނެ ކުއްލި ހާލަތްތަކުގައި އެމް.ޕީ.އެލްގެ އެހީތެރިކަން އާރް.އޭ.ސީ.އެލް އަށް ލިބިގެންދާނެއެވެ. މިއީ އެއަރޕޯޓްތަކުގެ ޚިދުމަތްތައް މުޅި ރާއްޖެއަށް އަވަހަށް އަދި ހަރުދަނާކޮށް ފޯރުކޮށްދިނުމަށް މަގުފަހިކުރާނެ އެއްބަސްވުމެކެވެ.
އެއްބަސްވުމުގައި އާރް.އޭ.ސީ.އެލްގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ އަޙްމަދު މުބީނެވެ. އެމް.ޕީ.އެލްގެ ފަރާތުން ސޮއިކުރެއްވީ އެ ކުންފުނީގެ ޗީފް އެގްޒެކެޓިވް އޮފިސަރ މުޙައްމަދު ވަޖީހު އަބްރާހީމެވެ.
މި އެއްބަސްވުމުގެ ސަބަބުން، ރާއްޖޭގެ އެކި ކަންކޮޅުތަކުގައި ހުރި އެއަރޕޯޓްތަކަށް ދިމާވެދާނެ އެމަރޖެންސީ ހާލަތްތަކުގައި އަވަސް އަދި ހަރުދަނާ ގޮތެއްގައި އެހީތެރިކަން ފޯރުކޮށްދެވޭނެއެވެ. މިއީ ރާއްޖޭގެ ވައިގެ ދަތުރުފަތުރުގެ ނިޒާމު އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ.
އާރް.އޭ.ސީ.އެލް އަކީ ރާއްޖޭގައި އެންމެ ގިނަ ޑޮމެސްޓިކް އެއަރޕޯޓް އޮޕަރޭޓްކުރާ ކުންފުންޏެވެ.
ކޮމެންޓު ފޮނުވާ