އަމިއްލަ ފަރާތްތަކުން ފިހާރަތަކާއި އެހެނިހެން ތަންތަނުގައި ވިއްކާ ކާބޯތަކެތި ކަނޑައެޅިފައިވާ މިންގަނޑުތަކަށް ފެތޭތޯ ބަލަމުންދާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ.
މި މަހުގެ 23 ވަނަ ދުވަހުން ފެށިގެން ކާބޯތަކެތީގެ ޤާނޫނަށް އަމަލުކުރަން ފަށާނެއެވެ. މި ޤާނޫނުގެ ދަށުން އެމްއެފްޑީއޭއަށް ލިބިދޭ ބާރުތަކުގެ ތެރޭގައި މިންގަނޑުތަކާ ޚިލާފުވާ ފަރާތްތަކާއި ތަންތަން ޖޫރިމަނާކުރުމާއި، ލައިސަންސް ހިފެހެއްޓުމާއި، އެފަދަ ތަންތަނުގެ މައުލޫމާތު އާންމުކުރުން ހިމެނެއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަމުން ފުޑް ކޮލިޓީ އެޝުއަރެންސް ކޯޑިނޭޓަރު ހާލިސާ މުހައްމަދު ވިދާޅުވެފައިވަނީ ޤާނޫނަށް އަމަލުކުރަން ފެށުމާއެކު ކާބޯތަކެތީގެ ރައްކާތެރިކަން ކަށަވަރުކޮށް ބެލެހެއްޓުމުގެ މަސައްކަތްތައް ކުރިއަށްގެންދާނީ އެމްއެފްޑީއޭއިން ކަމަށެވެ. އަދި ކާބޯތަކެތީގެ ގިންތިތަކެއް ކަނޑައަޅައި، ހަ މަސްދުވަހުގެ ތެރޭގައި ކާބޯތަކެތީގެ ވިޔަފާރިކުރާ ތަންތަން ރަޖިސްޓްރީކުރަންޖެހޭނެ ކަމަށްވެސް އޭނާ ވިދާޅުވިއެވެ.
ހާލިސާ އިތުރަށް ވިދާޅުވެފައިވަނީ ފިހާރަތަކުގައި ކާބޯތަކެތި ބެހެއްޓޭނެ މިންގަނޑުތައް ކަނޑައަޅައި، އެއާ އެއްގޮތަށް އަމަލުކުރަމުންދޭތޯ ބަލާނެ ކަމަށެވެ. އަދި ކުރިން އެންގުމަކާ ނުލައި ކާބޯތަކެތި ތައްޔާރުކުރާ ގެތަކަށް ގޮސް އިންސްޕެކްޓްކުރުމުގެ ބާރުވެސް އެ އޮތޯރިޓީއަށް ލިބިފައިވާ ކަމަށެވެ.
އާންމު ފަރުދުންނާއި ކާބޯތަކެތީގެ ވިޔަފާރިކުރާ ފަރާތްތަކުން މިއީ މުޖުތަމައުގެ ރައްކާތެރިކަމަށްޓަކައި ކުރާ މަސައްކަތެއްގެ ގޮތުގައި ދެކި، އެއްބާރުލުން ދިނުމަށް ހާލިސާ ވަނީ އެދިވަޑައިގެންފައެވެ.
