ރަށްރަށުގައި ކޮންސްޓްރަކްޝަން މަސައްކަތްތަކަށް ޚާއްޞަކޮށްގެން ކޮންޓްރެކްޓް އުޞޫލުން ވަޒީފާ ދީފައިވާ މުވައްޒަފުން މި މަހުން ފެށިގެން ދޫކޮށްލުމަށް ނިންމާފައިވާކަންފެނަކަ ކޯޕަރޭޝަނުން މިއަދު ހާމަކޮށްފިއެވެ.
މީގެ ކުރިން، 2023 ވަނަ އަހަރުގެ ޑިސެމްބަރު މަހު، ފެނަކައިން ވަނީ އެކި ސަބަބުތަކާ ހުރެ ހުއްޓިފައިވާ ކޮންސްޓްރަކްޝަން މަސައްކަތްތަކަށް ނަގާފައިވާ "ކޮންޓްރެކްޓް ސްޓާފުން"ގެ މުއްދަތު ހަމަވުމުން އެފަދަ މުވައްޒަފުންގެ އެއްބަސްވުން އާ ނުކުރާނެކަން އަންގާފައެވެ.
ކުރީގެ މެނޭޖްމަންޓުން ވަކި މަސައްކަތްތަކަކަށް ޚާއްޞަކޮށްގެން "ކޮންޓްރެކްޓް ސްޓާފުން"ގެ ގޮތުގައި 2,000 މުވައްޒަފުން ވަނީ ނަގާފައެވެ. މީގެ ތެރެއިން 1,800 މީހުން ނަގާފައި ވަނީ ކުދިކުދި މަސައްކަތްތަކަށް ކަމަށާއި، އޭގެ ތެރޭގައި އިންޖީނުގެ އާއި އޮފީސް އިމާރާތްތައް ހެދުމަށް 731 މުވައްޒަފުން ހިމެނޭކަމަށް ކުންފުނިން ހާމަކޮށްފައިވެއެވެ.
2023 ވަނަ އަހަރުގެ ނޮވެމްބަރު 17 ގައި އައު ސަރުކާރުން ވެރިކަމާ ހަވާލުވިއިރު، 99% މަޝްރޫޢުތައް ހުއްޓިފައި އޮތް ނަމަވެސް، އެ މުވައްޒަފުންނަށް މަހުން މަހަށް މުސާރަ ދެމުން ގެންދިޔަކަމަށްވެސް ފެނަކައިން ބުނެފައިވެއެވެ.
ކޮންޓްރެކްޓް ސްޓާފުންގެ މުސާރައަށް މަހަކު 7-9 މިލިއަން ރުފިޔާ ޚަރަދުކުރަން ޖެހޭއިރު، ކުންފުނީގެ މާލީ ހާލަތަށް ބަލާއިރު މިއީ ކުރެވޭނެ ވަރުގެ ހޭދައަކަށް ނުވާތީ، މި މަހުން ފެށިގެން އެ މުވައްޒަފުން ދޫކޮށްލަން ނިންމާފައިވާ ކަމަށް ފެނަކައިން ބުނެފައިވެއެވެ.
މީގެ އިތުރުން، ކުންފުނިން ނިންމާފައިވަނީ ޕްރޮޖެކްޓްތަކަށް ކޮންޓްރެކްޓް އުޞޫލުން މުވައްޒަފުން ނެގުމުގެ ބަދަލުގައި އެ މަސައްކަތްތައް ކުރާނެ ފަރާތްތަކެއް ހޯދައިގެން އެކަން ކުރުމަށެވެ. މިގޮތުން، ބައެއް ޕްރޮޖެކްޓުތައް ހިންގާނެ ފަރާތްތަކެއް ހޯދުމަށް މިއަދު އިޢުލާނު ކުރާނެ ކަމަށްވެސް ކުންފުނިން ބުނެފައިވެއެވެ.
ކޮމެންޓު ފޮނުވާ