ދިރާގުގެ މިއަހަރުގެ ދެވަނަ ކުއާޓަރުގެ މާލީ ތަފްސީލުތަކުން ދައްކާ ގޮތުގައި، އެންމެ ބޮޑު އާމްދަނީއެއް ދިރާގަށް އެ މުއްދަތުގައި ލިބިފައިވަނީ މޯބައިލް ހިދުމަތްތަކުންނެވެ.

އެ ގޮތުން މޯބައިލް ހިދުމަތްތަކުން 358.9 މިލިއަން ރުފިޔާގެ އާމްދަނީއެއް އެކުންފުންނަށް ލިބިފައި ވެއެވެ. އެއީ ފިކްސްޑް، ބްރޯޑްބޭންޑް އަދި އެންޓަޕްރައިސް ހިދުމަތްތަކުން 307 މިލިއަން ރުފިޔާގެ އާމްދަނީއަކާއި، އެހެނިހެން ހިދުމަތްތަކުން 21 މިލިއަން ރުފިޔާގެ އާމްދަނީއެކެވެ.

ދިރާގުގެ މާލީހިސާބުތައް ދައްކާ ގޮތުން ޓެކުހަށް ކެނޑުމުގެ ކުރިން މި އަހަރުގެ ދެވަނަ ކުއާޓަރުގެ 277.1 މިލިއަން ރުފިޔާގެ ފައިދާއެއް ލިބިފައިވާއިރު، ޓެކުހަށް ކެނޑުމުގެ ކުރިން އަދި ޓެކުހަށް ކެނޑުމަށްފަހު މިއަހަރުގެ ދެވަނަ ކުއާޓަރުގައި ލިބުނު ފައިދާ ވަނީ މިދިޔަ އަހަރުގެ ދެވަނަ ކުއާޓަރާއި ފުރަތަމަ ކުއާޓަރަށްވުރެވެސް އިތުރުވެފައި ވެއެވެ. މި އަހަރުގެ ފުރަތަމަ ކުއާޓަރުގައި ޓެކުހަށް ކެނޑުމުގެ ކުރިން ލިބުނު އާމްދަނީ  ހުރީ 254.9 މިލިއަން ރުފިޔާގަ އެވެ.

ފާއިތުވި އަހަރުގެ ދެވަނަ ކުއާޓަރުގައި ޓެކުހަށް ކެނޑުމަށްފަހު ލިބިފައިވަނީ 267 މިލިއަން ރުފިޔާގެ ފައިދާއެކެވެ.

ޓެކުހަށް ކެނޑުމަށްފަހު މި އަހަރުގެ ދެވަނަ ކުއާޓަރުގައި ދިރާގަށް ފައިދާގެ ގޮތުގައި 240.4 މިލިއަން ރުފިޔާ ލިބުނުއިރު މި އަދަދު މި އަހަރުގެ ފުރަތަމަ ކުއާޓަރުގައި ހުރީ 218.1 މިލިއަން ރުފިޔާގަ އެވެ. މި އަދަދު މިދިޔަ އަހަރުގެ ދެވަނަ ކުއާޓަރުގައި ހުރީ 227.6 މިލިއަން ރުފިޔާގަ އެވެ.