މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)އިން ހިއްސާއަކަށް 60 ލާރި ބަހަން ނިންމައިފިއެވެ.
އެމްޓީޑީސީން މިގޮތައް ނިންމާފައިމިވަނީ، ރޭ ކުރިއަށްގެންދިޔަ އެ ކުންފުނީގެ އަހަރީ އާންމު ޖަލްސާ (އޭޖީއެމް)ގައި ލެވުނު ވޯޓަކުންނެވެ. އެގޮތުން، އެ ބައްދަލުވުމުގައި ބައިވެރިވެވަޑައިގެން އެ ކުންފުނީގެ ހުރިހާ ހިއްސާދާރުންގެ ތެރެއިން 99 އިންސައްތަ އެ ނިންމުމަށް ތާއީދުކޮށްފައިވެއެވެ.
އެމްޓީޑީސީން މިދިޔަ އަހަރުގެ ފައިދާއިން ހިއްސާގެ ފައިދާގެ ގޮތުގައި ހިއްސާއަކަށް 60 ލާރި ބަހަން ނިންމާފައިވާއިރު، 2022 އިން ފަށައިގެން ކޮންމެ އަހަރަކު އެ ކުންފުނިން ފައިދާއިން ހިއްސާގެ ފައިދާގެ ގޮތުގައި ހިއްސާއަކަށް ބަހަމުން އައިސްފައިވަނީވެސް 60 ލާރިއެވެ.
އަދި މީގެ އިތުރުން، އެމްޓީޑީސީގެ އޭޖީއެމްގައި ހިއްސާދާރުންނަށް 60 ލާރީގެ މަގުން 20.4 މިލިއަން ރުފިޔާ ބަހަންވެސް ނިންމާފައިވެއެވެ.
އެ ކުންފުނީގެ މާލީ ހިސަބުތަކަށް ބަލާއިރު، މިދިޔަ އަހަރަކީ އެ ކުންފުނީގެ މާލީ ހާލަތު އެންމެ ދަށަށް ގޮސްފައިވާ އެއް އަހަރެވެ. އެގޮތުން މިދިޔަ އަހަރު އެ ކުންފުންޏަށް 103 މިލިއަން ރުފިޔާ ލިބިފައިވެއެވެ.
