ހަނިމާދޫ އެއާޕޯޓުގެ ޖުމްލަ 67.5 އިންސައްތަ މަސައްކަތް މިހާރު ނިންމާލެވިފައި ވާކަމަށާއި، މުޅި އެއަރޕޯޓު އަންނަ އަހަރު މާރޗް މަހަށް ނިމާލެވޭނެ ކަމުގައި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ އިން ބުނެފި އެވެ.
އެމިނިސްޓްރީން މިހެން ބުނީ ހަނިމާދޫ އެއާޕޯޓުގެ މަސައްކަތްތައް ކުރިއަށްދާ ގޮތް ބައްލާވާލެއްވުމަށް އިންފްރާސްޓްރަކްޗާ މިނިސްޓަރު އަބްދުﷲ މުއްތަލިބާއި، ޓްރާންސްޕޯޓު މިނިސްޓަރު މުހައްމަދު އަމީން އަދި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރް އިއްޔެ އެ އެއަރޕޯޓަށް ވަޑައިގެންނެވުމަށްފަހު އެ މިނިސްޓްރީން ނެރުނު ނޫސް ބަޔާނެއްގައެވެ.
ހަނިމާދޫ އެއަރޕޯޓު މަޝްރޫއަކީ 2022 ގައި އިންޑިއާގެ ޖީއެމްސީއާ ހަވާލުކޮށްގެން ކުރިއަށް ގެންދާ މަޝްރުއޫ އެކެވެ. މި މަޝްރުއޫގެ ދަށުން އެއާޕޯޓުގެ އާ ޕްރޮޖެކްޓާ އެކު 2.7 ކިލޯ މީޓަރުގެ ރަންވޭ އަކާއި 1.3 މިލިއަން ފަސިންޖަރުންނަށް ހިދުމަތް ދެވޭ ޓާމިނަލެއްގެ އިތުރުން ޖެޓް ފިއުލް ސްޓޯރޭޖެއް ވެސް ގާއިމް ކުރާނެ އެވެ.
ހަނިމާދޫ އެއާޕޯޓު އިންޓަނޭޝަނަލްކުރުމުގެ މަޝްރުއޫގެ ތެރެއިން ގާއިމްކުރާ 2400 މީޓަރުގެ ރަންވޭ އަދި އޭޕްރަންގެ 97 އިންސައްތަ މަސައްކަތް މިހާރު ނިމިފައިވާކަމަށް އިންފްރަސްޓްރަކްޗާ މިިނިސްޓްރީން ބުނެ އެވެ. މި ރަންވޭ މިހާރު ވަނީ ބޭނުންކުރަން ވެސް ފަށާފަ އެވެ. މި މަޝްރުއޫގެ ދަށުން ގާއިމްކުރާ ފިއުލް ފާމް އާއި ފިއުލް ޖެޓީގެ 44.5 އިންސައްތައިގެ މަސައްކަތް ނިމިފައިވާއިރު، ފަސިންޖާ ޓާމިނަލްގެ 51.4 އިންސައްތަ އަދި އެއާ ޓްރެފިކް ކޮންޓްރޯލް ޓަވަރުގެ 75 އިންސައްތަ މަސައްކަތް ވަނީ ނިންމަލާފަ އެވެ.
މި މަޝްރުއޫއާ އެކު އެއާޕޯޓަށް މުހިންމު މަގުތައް ހެދުމުގެ މަސައްކަތް ކުރަމުން އަންނަ އިރު، އެ މަސައްކަތުގެ 50 އިންސައްތަ ނިމިފައިވާކަމަށް އިންފްރާސްޓްރަކްޗާ މިނިސްޓްރީން ބުނެ އެވެ.
މި އެއާޕޯޓު ތަރައްގީ ކުރަނީ އޭ 320 މަރުކާގެ ބޯޓު ޖެއްސޭ ގޮތަށެެވެ. މި އެއާޕޯޓުން އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭނެ އެވެ.
