މިއަހަރު ހައްޖުގެ އަޅުކަން އަދާކުރި މީހުންގެ ޖުމްލަ އަދަދަކީ 1,833,164 މީހުން ކަމުގައި ސައުދީ ސަރުކާރުން ހާމަކޮށްފިއެވެ. ސައުދީގެ ކަމާއި ގުޅުންހުރި އިދާރާތަކުން ބުނެފައިވަނީ މިއީ މިއަހަރު ހައްޖުގެ އަޅުކަން އަދާކުރި އަންހެން ހައްޖާޖީންނާއި ފިރިހެން ހައްޖާޖީންވެސް ހިމަނައިގެން ހައްޖުގެ އަޅުކަމަށް މައްކާއަށް ޒިޔާރަތްކުރި މީހުންގެ އަދަދު ކަމުގައެވެ.
ކޮންމެ އަހަރަކުވެސް ހައްޖުގެ އަޅުކަން އަދާކުރުމަށް ދެ މިލިއަނެއްހާ މީހުން ދުނިޔޭގެ އެކި ކަންކޮޅުތަކުން އަރަފާތު ބިމަށް ހާޒިރު ވެއެވެ.
އިއްޔެ ހައްޖުވެރިންވަނީ އަރަފާތު ބިމުގައި ވަގުތު ހޭދަކޮށްފައެވެ. އަރަފާތު ބިމުގައި ތިބުމަކީ ހައްޖުގެ އެންމެ މުހިންމު ރުކުނެވެ. އަރަފާތު ބިމުގައި ތިބުމުގެ ފުރުސަތު ނުލިބިއްޖެނަމަ ހައްޖު ނުލިބޭނެއެވެ.
އަރަފާތު ބިމުގައި ވަގުތު ހޭދަކުރުމަށް ފަހު ރޭ ހައްޖުވެރިން ވަގުތު ހޭދަކުރީ މުޒުދަލިފާގައެވެ. އަދި މިއަދު ޖަމްރާއަށް ހައްޖުވެރިން ހިލަ އުކާނެއެވެ.
ހައްޖުގެ އަޅުކަން އަދާކުރުމަކީ އެކަމަކަށް ކުޅާދާނަވެގެންވާ ކޮންމެ މުސްލިމަކުވެސް އުމުރުން އެއްފަހަރު އަދާކުރުން ވާޖިބު އަޅުކަމެކެވެ.
