އއ. ތޮއްޑޫ ކައުންސިލް އިދާރާގެ ކައިރީ ހަމަނުޖެހުން ހިންގި ކަމުގެ ތުހުމަތުގައި 8 މީހަކު ހައްޔަރުކޮށްފިއެވެ.
މި މަހު 5 ވަނަ ދުވަހު ތޮއްޑޫ ކައުންސިލް އިދާރާ ދޮށަށް އެއްވެ، އެރަށު ބަޔަކު މުޒާހަރާ ކުރީ ދަނޑުވެރިކަމަށް ބިން ދޫކުރުން ލަސްވާ ކަމަށް ބުނެއެވެ. އެހެންވެ އެ މައްސަލައިގައި އެއްވެ ތިބި މީހުންނާއި ފުލުހުންނާ ދެމެދުގައި ބޮޑެތި ކުރިމަތިލުންތަކެއް ހިނގައި ފުލުހަކަށް އަނިޔާ ވެސް ވިއެވެ.
ފުލުހުން ބުނީ ތޮއްޑޫ ކައުންސިލް އިދާރާ ކުރިމަތީގައި މުޒާހަރާކޮށް އާންމު މަސްލަހަތު ނަގައިލުމަށް މަސައްކަތްކުރަމުން ދިއުމާ ގުޅިގެން އެސަރަހައްދުގައި ފުލުހުން ހަރަކާތްތެރިވެފައިވާ ކަމަށެވެ.
އެސަރަހައްދުގައި މުޒާހަރާ ކުރަމުންދިޔަ ބައެއް މީހުން ކައުންސިލް އިދާރާގެ ފުރާޅު މައްޗަށް ގައު އުކަމުންދާތީ އާއި މަސްލަހަތު ނަގައިލުމަށް މަސައްކަތްކުރަމުންދާ ދާތީ އެގޮތަށް އެކަން ނުކުރުމަށް ތަކުރާރުކޮށް ފުލުހުން ނަސޭހަތްތެރިވި ކަމަށް ބުނެފައިވެއެވެ.
ފުލުހުން މިއަދު ބުނީ ތޮއްޑޫ ކައުންސިލް އިދާރާގެ ފުރާޅަށް ގާއުކައި ހަމަނުޖެހުން ހިންގި މައްސަލައިގެ ތުހުމަތުގައި މިއަދު 8 މީހުން ހައްޔަރުކޮށްފައިވާ ކަމަށެވެ.
މި މައްސަލަ ތަހުގީގު ކުރަމުން އަންނަ ކަމަށް ވެސް ފުލުހުން ބުންޏެވެ.
