ރާއްޖޭގެ އެންމެ ބޮޑު އާބާދީއެއް އުޅެމުންދާ މާލޭގެ ކުލި ކޮންޓްރޯލް ކުރުމުން މާލޭގެ އިމާރަތްތައް ބޮޑު ލޯން ނަގައިގެން ހަދާފައިވާ އޯނަރުންނަށް ގެއްލުން ވާނެ ކަމަށާއި، ކުލި އޮންނަންވާނީ މާކެޓަށް ދޫކޮށްލާފައިކަމަށް ހައުސިން މިނިސްޓަރ ހައިދަރު ވިދާޅުވެއްޖެއެވެ.
ވީޓީވީން ގެނެސްދިން ޕްރޮގްރާމެއްގައި ވާހަކަ ދައްކަވަމުން ހައިދަރު ވިދާޅުވީ އޯޕެން މާކެޓް އިކޮނޮމީއެއް އޮންނަ ގައުމެއްގައި ކުލި ކޮންޓްރޯލް ކޮށްފައި ބޭއްވުމަކީ ރަގަަޅުކަމެއް ނޫންކަމަށް އިގްތިސާދީ މާހިރުންވެސް ގަބޫލު ނުކުރައްވާ ކަމުގައެވެ.
އެހެންވީމަ އެއީކީއެއް ހުޅުވާލެވިފައި އޮންނަ މާކެޓެއް އޮންނަ ގައުމެއްގައި ކުރަން ކަމުދާ ކަމެއް ކަމަކަށް އިކޮނޮމިސްޓުން ވެސް ގަބޫލެއް ނުކުރޭ އިނގޭތޯ. އެހެންވީމާ އަޅުގަނޑަކަށް ހިއެއް ނުވޭ އެއީ ކުލި ކޮންޓްރޯލް ކުރުމަކީ އެއީ އަޅުގަނޑުމެން ކުރަން ކަމުދާ ކަމެއް ކަމަކަށް.
މިނިސްޓަރު ވިދާޅުވި އެވެ.
ހައިދަރު ވިދާޅުވީ އޭނާ ގަބޫލުކުރައްވާ ގޮތުގައި ކުލި އޮންނަން ޖެހޭނީ މާކެޓަށް ދޫކޮއްލާފައި ކަމުގައެވެ. އޭގެ ބަދަލުގައި ސަރުކާރުން ކުލި ކޮންޓްރޯލް ކުރަން ފަށައިފިނަމަ، ބޮޑެތި ލޯނުތައް ނަގައިގެން އިމާރާތްތައް ހަދާފައިވާ ފަރާތްތަކަށް އޭގެ ގެއްލުމާއި ކުރިމަތިކާން ޖެހޭކަމަށްވެސް ހައިދަރު ވިދާޅުވިއެވެ.
އަޅުގަނޑު ގަބޫލު ކުރާ ގޮތުގައި ކުލި އޮންނަން ޖެހޭނީ މާކެޓަށް ދޫކޮށްލާފަ. އެހެން ނޫނީވިއްޔާ ވާ ގޮތަކީ ކުލި ކޮންޓްރޯލް ކުރަން ފަށައިފިއްޔާ ބޮޑެތި ލޯނުތަކާ އެއްޗެހި ނަގައިގެން އިމާރާތްކޮށްފައި ހުންނަ ބަޔަކަށް ލިބޭ ގެއްލުންތަކެއް ވެސް އުޅޭނެ.
ހައިދަރު ވިދާޅުވިއެވެ.
މާލެ ސަރަހައްދުގައި ކުލީގެ އަގުބޮޑުވުމުގެ ޝަކުވާ އަބަދު ވެސް އާންމުން ކުރެއެވެ. އެހެންވެ ކުލި ކޮންޓްރޯލް ކުރެވޭނެ ނިޒާމެއް އެކުލަވާލުމަށް ހުރިހާ ސަރުކާރެއްގައިވެސް ބައެއް ފަރާތްތަކުން މަސައްކަތް ކޮށްފައިވެއެވެ. އެގޮތުން މީގެކުރިން 800 އަށް ވުރެ ގިނަ މީހުންގެ ސޮޔާ އެކު މާލޭ ޓެނަންޓްސް ޔޫނިއަނުން ކުލި ކޮންޓްރޯލު ކުރުމަށް ގޮވާލައި، ރައްޔިތުންގެ މަޖިލީހަށް ޕެޓިޝަނެއް ވެސް ހުށަހެޅިއެވެ.
މުޅި ރާއްޖެ އަށް ވެސް ބޯހިޔާވަހިކަމުގެ މައްސަލަ ބޮޑުވެފައިވާ އިރު، ހުރިހާ ހިދުމަތެއް ރަނގަޅު ފެންވަރުގައި ލިބެން އޮތް މާލެ ސަރަހައްދުގައި ދިރިއުޅުމުގެ ހަރަދު ވަރަށް ބޮޑެވެ. ހާއްސަކޮށް ކުއްޔަށް ހޭދަކުރަން ޖެހޭ މިންވަރު އިންތިހާ އަށް ބޮޑެވެ.
ރައީސް ޔާމިންގެ ދައުރުގައި ހިޔާ ފްލެޓް އަޅާ އެތަނަށް އެތައްހާސް ބަޔަކު ބަދަލުވި ނަމަވެސް، މާލޭ ކުއްޔަށް މާބޮޑު ބަދަލެއް އައިސްފައެއް ނުވެއެވެ. އަދި މިހަރުވެސް މިހާތަނަށް ރާއްޖެތެރޭ ސްކޫލްތަކުން 800 އާއި ގާތް ކުރާ އަދަދަކަށް މިހާތަނަށް ދަރިވަރުން ބަދަލުވެފައިވާކަމަށް އެޑިއުކޭޝަން މިނިސްޓްރީން ބުނެފައި ވެއެވެ.
