އާމަޖިލިސް ހުވާކުރުމުން އެއްވެ އުޅުމުގެ ގާނޫނަށް އިސްލާހު ހުށަހަޅާނެ ސަރުކާރުން ވިދާޅުވެއްޖެއެވެ.
މިކަނަ ހާމަ ކޮށްފައިވަނީ ރައީސް އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ޗީފް ސްޕޯކްސްޕާސަން، ހީނާ ވަލީދުއެވެ.
މިއަދުގެ ޕްރެސްގައި ހީނާ ވަލީދު ވިދާޅުވީ އާ މަޖިލިސް ފެށިގެންދާއިރު އެއްވެ އުޅުމުގެ ގާނޫނަށް އިސްލާހުތައް ހުށަހެޅުމުގެ ވިސްނުން ސަރުކާރުގައި އެބަހުރި ކަމަށާއި ސަރުކާރުގެ އަމާޒަކީ ވީހާ ވެސް ބޮޑަށް އެއްވެ އުޅުން، ގާނޫނުއަސާސީގެ ހުދޫދުގެ ތެރެއިން ހުރިހާ ފަރާތްތަކަށް ވެސް އެ ފުރުސަތު ހުޅުވާލާފައި ބޭއްވުން ކަމަށެވެ.
އެހެންވީމަ، އަންނަ މަޖިލީހުގައި އެއްވެ އުޅުމުގެ ގާނޫނަށް އިސްލާހު އިރާދަކުރެއްވިއްޔާ ހުށަހެޅިގެންދާނެ.
ހީނާ ވިދާޅުވި އެވެ.
މިހާރު ގާނޫނު އޮންނަގޮތުން ހުއްދަ ނުނަގައި އެއްވެވޭނީ ސަރުކާރުން ކަނޑައަޅައި އިއުލާން ކުރާ ތަންތަނުގައި އެކަންޏެވެ. ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ކަނޑައަޅާފައި ވަނީ ހުއްދަ ނުނަގައި އެއްވެވޭނި ހަމައެކަނި ކާނިވާ ސަރަހައްދަށް ކަމަށެވެ.
އޭރު ގެނައި އިސްލާހަކީ ގާނޫނު އަސާސީއާ ހިލާފު އިސްލާހެއް ކަމަށް ރައީސް ސޯލިހު 2018 ވަނަ އަހަރުގެ ރިޔާސީ ކެމްޕޭނުގައި ވައުދުވެވަޑައިގަތެވެ. ނަމަވެސް އެމަނިކުފާނުގެ ވެރިކަމުގެ ދައުރު ނިމުނުއިރު، ރައްޔިތުންގެ މަޖިލީހަށް އިސްލާހު ހުށަހެޅިފައި އޮތް ނަމަވެސް ވެސް އެ ގާނޫނު އިސްލާހުކޮށްފައެއް ނުވެ އެވެ.
