ފުލުހުންގެ މުއައްސަސާގެ ބޭނުމަށް ބިދޭސީން ގެނެސްދޭނެ ބަޔަކު ހޯދަން ކުރި އިއުލާން ބާތިލުކޮށްފިއެވެ.
ފުލުހުން މިއަދު ވަނީ ރާއްޖެއިން ބޭރުން ބިދޭސީން ގެނައުމާއި ބިދޭސީންނާ ގުޅޭގޮތުން ސަރުކާރު އިދާރާތަކުން ކުރަންޖެހޭ އެންމެހައި ކަންކަން ކޮށްދޭނެ ފަރާތެއް ހޯދުމަށް ބޭނުންވާތީ އެ މަސައްކަތަށްް ބީލަން ހުށަހެޅުމުގެ ފުރުސަތު ހުޅުވާލައި އެކަން އިއުލާންކޮށްފައެވެ.
ނަމަވެސް ފުލުހުންގެ ތަރުޖަމާނު ޗީފް ސްޕްރިންޓެންޑެންޓް އޮފް ޕޮލިސް އަހުމަދު ޝިފާން މީޑިއާތަކަށް މިރޭ ފޮނުއްވި މެސެޖެއްގައި ވިދާޅުވީ އެ އިއުލާން މިހާރު ބާތިލުކޮށްފައިވާ ކަމަށެވެ. އެ އިއުލާނަކީ ފުލުހުންގެ އިދާރާގެ ޑިޕާޓްމެންޓުތަކުގައި ބިދޭސީން ލައްވާ ކުރުވަމުން އައި މަސައްކަތް ކުރުމަށް، ބިދޭސީން ހޯދުމަށް ކުރި އިއުލާނެއް ކަމަށެވެ.
އިއުލާން ބާތިލުކުރެވުނީ ދިވެހިންނަށް ވަޒީފާ ދިނުމުގައި އިސްކަން ދެވޭގޮތަށް (އެފަދަ ވަޒީފާތަކަށް މީހުން ހޯދުމުގައި) ފުލުހުންގެ ހިދުމަތުން އަމަލު ކުރުމަށް ނިންމާފައިވާތީ.
ޝިފާން ވިދާޅުވިއެވެ.
ފުލުހުންގެ ބޭނުމަށް ބިދޭސީން ގެންނާނެ ފަރާތެއް ހޯދުމަށް އެ މުއައްސާސަ އިން އިއުލާންކުރި އިރު، މިދިޔަ ހަފުތާގައި ބޭއްވި "އަހާ ފޯރަމް" ގައި ހޯމް މިނިސްޓަރު އަލީ އިހުސާން ވަނީ ދިވެހި ރައްޔިތުން ވަޒީފާއަށް ނެގޭނެ ތަނެއްގައި ބިދޭސީން ގެންގުޅުމަކީ ސަރުކާރުގެ ވިސްނުމެއް ނޫން ކަމަށް ވިދާޅުވެފައެވެ.
"ވަކިން ހާއްސަކޮށް ސަލާމަތާ ރައްކާތެރިކަމާ ގުޅޭ ހިދުމަތް ފޯރުކޮށްދޭ ހިދުމަތްތަކުގެ ތެރޭގައި އެއްވެސް ހާލެއްގައި ބިދޭސީއަކު ހުރުމަކީ އެއީ އަޅުގަނޑުމެން ބޭނުންވާ ގޮތެއް ނޫން" އިހުސާން ވިދާޅުވެފައިވެއެވެ.
ކޮމެންޓު ފޮނުވާ