އުމުުރުން 65 އަހަރުން މަތީ މީހުންގެ އައިޑީ ކާޑުގެ މުއްދަތު ހަމަނުވާ ގޮތަށް ބަދަލު ކުރުމަށް މަސައްކަތް ކުރަމުން އަންނަ ކަމަށް ޑިޕާޓްމެންޓް އޮފް ނެޝަނަލް ރެޖިސްޓްރޭޝަން (ޑީއެންއާރް) އިން ބުނެފިއެވެ.
އެ ޑިޕާޓްމަންޓުން މިހެން ބުނެފައި ވަނީ ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން ދިރާސާ ކުރަމުން އަންނަ މައްސަލައަކާ ގުޅިގެން ކޮމިޓީއަށް ހާޒިރުވެ ވާހަކަދައްކަމުންނެވެ.
ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ބޭނުން ކުރެވޭނެ މުއްދަތުގެ ގޮތުގައި މިހާރު ކަނޑައަޅާފައިވާ މުއްދަތަކީ އެންމެ އެކަށީގެންވާ މުއްދަތެއް ނޫން ކަމަށް ބުނެ އެ މައްސަލަ މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު އީވާ އަބްދުﷲ އެވެ.
ކޮމިޓީގައި ވާހަކަދައްކަވަމުން ޑީއެންއާރްއާ ހަވާލުވެ ހުންނެވި ހޯމްލޭންޑް މިނިސްޓްރީގެ ސްޓޭޓް މިނިސްޓަރު ޔޫސުފް އަބްދުއްޣަފޫރު ވިދާޅުވީ، 10 އަހަރާއި 40 އަހަރާ ދެމެދުގެ މީހުންގެ ކާޑުގެ މުއްދަަތަކީ ފަސް އަހަރު ކަމަށާއި އޭގެ މަތީގެ މީހުންގެ މުއްދަތަކީ 10 އަހަރުގެ ކަމަށެވެ.
އަދި މިހާރު އޮންނަ ގޮތުން ދޮށީ އުމުރުގެ ބައެއް މީހުންގެ އައިޑީކާޑު މުއްދަތު ހަމަވެ އާ ކުރުމަށް ދަތިތަކާ ކުރިމަތިވާ ކަމުގެ ޝަކުވާތައް ލިބެމުން ދާތީ އުމުރުން 65 އަހަރުން މަތީ މީހުންގެ އައިޑީ ކާޑު މުއްދަތު ހަމަނުވާ ގޮތަށް ބަދަލު ކުރުމަށް މަސައްކަތް ކުރަމުން އަންނަ ކަމަށެވެ.
އޭނާ ވިދާޅުވީ މި ބަދަލު ގެނައުމުގެ ކުރިން ފަންނީ ގޮތުން ބަލަން ޖެހޭ ކަންކަން ބެލުމަށް ފަހު ކަރުދާހެއް ތައްޔާރުކޮށް ކެބިނެޓަށް ފޮނުވާފައިވާ ކަމަށެވެ. އަދި ކަރުދާސް ދިރާސާ ކުރުމަށް ފަހު އެކަމާމެދު ގޮތެއް ނިންމާނީ ކެބިނެޓުން ކަމަށްވެސް ޔޫސުފް ވިދާޅުވިއެވެ.
އެހެންކަމުން މި ބަދަލަށް އަމަލުކުރަން ފެށޭނެ ވަކި ތާރީޚެއް އަދި ނޭންގޭ ކަމަށް ކޮމިޓީގައި އޭނާ ވަނީ ބުނެފައެވެ.
ކޮމެންޓު ފޮނުވާ