މޯލްޑިވްސް ވިމެން އިން ޕޮލިސިންގ ކޮމިޓީގެ ދެވަނަ ދައުރު އިފްތިތާހުކޮށްފި

"މޯލްޑިވްސް ވިމެން އިން ޕޮލިސިންގ ކޮމިޓީ" ގެ ދެވަނަ ދައުރު އިފްތިތާހުކޮށްފިއެވެ.

މިކަމަށްޓަކައި ރޭ އިސްކަންދަރުކޮށީގައި ބޭއްވި ހަފުލާ ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދެވެ. މި ހަފުލާގައި ކޮމިޝަނަރ އޮފް ޕޮލިސް ޢަލީ ޝުޖާއު، ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން އަދި ފުލުހުންގެ އެގްޒެކެޓިވް އޮފިސަރުންނާއި ކޮމިޝަންޑު އޮފިސަރުންގެ އިތުރުން ދައުވަތު އެރުވިގެން ވަޑައިގެންނެވި އެހެނިހެން އިއްޒަތްތެރިން ބައިވެރިވެލެއްވިއެވެ.

މި ހަފުލާ ފެށުމުގެ ކުރިން، އިއްޔެ ނިޔާވި ޗީފް އިންސްޕެކްޓަރ އޮފް ޕޮލިސް އަލްމަރުޙޫމް މުޙައްމަދު ޒިޔާދުގެ ހަނދާނުގައި 1 މިނިޓުގެ ސުކޫތެއް ގެނެސްފައިވެއެވެ.

މި ހަފުލާ ޝަރަފުވެރިކޮށްދެއްވައި، ރައީސުލްޖުމްހޫރިއްޔާގެ އަނބިކަނބަލުން ދެއްކެވި ވާހަކަ ފުޅުގައި، ދިވެހި ފުލުހުންގެ ދައުރަކީ ވަރަށް މުހިންމު ދައުރެއްކަމަށާއި އޭގެ ތެރެއިންވެސް އަންހެން ފުލުހުންގެ ދައުރު އަދި ވަރަށް ބޮޑަށް މުހިންމުވާކަމަށް ވިދާޅުވިއެވެ. އަދި އަންހެނުންގެ ބާރު ހަރުދަނާވެ، އަންހެނުންގެ ދައުރު ފުޅާވުމުން މުއައްސަސާގެ މަސްއޫލިއްޔަތު އަދާކުރުމުގައި ހެޔޮ ނަތީޖާ ފެންނަކަމުގައި ވިދާޅުވިއެވެ. އެހެންކަމުން ފުލުންގެ މުއައްސަސާގެ އެކި ދާއިރާތަކުގައި އަންހެން ފުލުހުންގެ ބަހާއި ބައިވެރިވުމާއި އެ ކަނބަލުންގެ އިސްކަން ވަރަށް މުހިންމުކަމަށް ވިދާޅުވިއެވެ.

އޭގެ އިތުރުން، ދިވެހިރާއްޖެ ބެލެހެއްޓުމުގައި ދިވެހި އަންހެން ފުލުހުން އަދާކުރާ މުހިންމު ދައުރަށްޓަކައި އެކަމަނާ ފަހުރުވެރިވެވަޑައިގަންނަވާ ކަމަށް ވިދާޅުވެ އެ ގޮތުގައި ކުރިއަށް ދިއުމަށް އެކަމަނާ ގޮވައިލެއްވިއެވެ. ހަމަ އެއާއެކު އަންހެނުންގެ ބާރުވެރިކަން އިތުރުކުރެވޭނެ މަގު ހޯދުމުގެ މުހިންމުކަމާއި، އަންހެނުންގެ ގާބިލުކަން އިތުރުވި ވަރަކަށް މުޖުތަމައުގައި އަންހެނުންގެ ތަޖުރިބާތައް ހިމެނޭ މައްސަލަތަކަށް ހައްލު ލިބުމުގެ މަގު ފަހިވެގެންދާނެކަމުގައި ވިދާޅުވިއެވެ.

މި ހަފުލާގައި، ވިމެން އިން ޕޮލިސިންގ ކޮމެޓީގެ ރައީސް ޗީފް ސުޕްރިންޓެންޑެންޓް އޮފް ޕޮލިސް ފާތިމަތު ނަޝްވާ ދެއްކެވި ވާހަކަ ފުޅުގައި، ރާއްޖެއާއި ރާއްޖެއިން ބޭރުގައި ހިންގާ ތަމްރީނުތަކުގައި ބައިވެރިވުމުގެ ފުރުސަތު އަންހެން މުވައްޒަފުންނަށް ހޯދައި ދިނުމަށް މަސައްކަތްކުރުމާއި، އަންހެން ފުލުހުން އަދި މުވައްޒަފުން ބިނާކޮށް ފުލުހުންގެ ވަޒީފާގައި ދެމިތިބުމަށް ބާރުއަޅައި ކުރިއަށްށް ދިއުމުގެ ހިތްވަރުދީ، ކެރިއަރ ޕާތްވޭ އަދި ކެރިއަރ ގައިޑަންސް ދިނުމަށް ރޭވިފައިވާކަމަށް ވިދާޅުވިއެވެ. އެގޮތުން ކުރިއަށް އޮތް ދައުރުގައި އެމް.ޑަބްލިޔު.ޕީ ކޮމިޓީގެ މަސައްކަތުގެ މަގުޗާޓު ތައްޔާރުކުރުމުގައި މި މުއައްސަސާގެ އެކި ރޭންކުތަކުގެ އަދި އެކި ގިންތިތަކުގެ އަންހެން ފުލުހުންނާއި އަންހެން މުވައްޒަފުންގެ މަޝްވަރާޔާ ހިޔާލު އަދި އެހީތެރިކަމާއެކު މަސައްކަތް ފަށައިގަނެ ކުރިއަށް ގެންދާނެ ކަމުގެ ޔަގީންކަން ދެއްވިއެވެ.

މި ހަފުލާގައި ރައީސުލްޖުމްހޫރިއްޔާގެ އަނބިކަނބަލުން ވަނީ 'މޯލްޑިވްސް ވިމެން އިން ޕޮލިސިންގ މަންތްލީ ނިއުސް ލެޓަރ "ސްޕެޝަލް އިނައުގުރަލް އިޝޫ" ފޮތް އިފްތިތާހުކޮށްދެއްވާފައެވެ. މި ފޮތަކީ މޯލްޑިވްސް ވިމެން އިން ޕޮލިސިންގ ކޮމިޓީން އެކުލަވާލައި ޝާއިއުކޮށްފައިވާ ފޮތެކެވެ.