ފެނަކަ ކޯޕަރޭޝަންއިން ކުރިޔަށް ގެންދިޔަ 60 ޕްރޮޖެކްޓެއް ހިންގި ގޮތް ތަހުގީގު ކުރުމަށްފަހު ފާހަކުރެވުނު 25 މައްސަލައެއް އޭސީސީއަށް ހުށަހަޅާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވެއްޖެ އެވެ.
ފުވައްމުލަކުން ކަރަންޓު ކެނޑުމުގެ މައްސަލައާއި، ގާނޫނާ ހިލާފަށް ވަޒީފާއިން ވަކިކޮށް، ފެނަކައަށް މުވައްޒަފުން ނެގުމާ ގުޅޭ ގޮތުން ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީ (އެސްއޯއީ ކޮމިޓީ) ގައި ވާހަކަ ދައްކަވަމުން މުއާޒް ވިދާޅުވީ ތަހުގީގު ކުރި 60 ޕްރޮޖެކްޓަށް ބޯޑުގެ ރުހުން ވެސް ލިބިފައި ނުވާ ކަމަށެވެ. އަދި އެ މަޝްރޫއުތައް ހުއްޓިފައިވާ ކަމަށްވެސް މުއާޒު ވިދާޅުވި އެވެ.
މުއާޒް ވިދާޅުވީ އޭސީސީއަށް ހުށަހަޅާފައިވާ 25 މައްސަލައަކީ ފެށުމުގެ ކުރިން ހަރަދުތަކުގެ އަންދާޒާވެސް ހަދާފަ ނުވާ މަޝްރޫޢުތައް ކަމުގައެވެ. އެގޮތުން މާކެޓް ވެލިއުއަށްވުރެ 50 އިންސައްތަ ބޮޑު އަގެއްގައި އިކުއިޕްމަންޓާއި ވަސީލަތްތައް ކަނޑައެޅުމުގެ ސަބަބުން ޕްރޮޖެކްޓްގެ ޚަރަދު ދެގުނަ ބޮޑުވެފައިވާކަމަށްވެސް މުއާޒް ވިދާޅުވިއެވެ.
މީގެ އިތުރުންވެސް މަޝްރޫއުތައް ނިމޭނެ ވަކި ތާރީޚެއް ނުވަތަ މަޝްރޫއުތައް ނިންމުމަށް ބޭނުންވާ ވަސީލަތްތަކާއި މުވައްޒަފުން ނެތުމުގެ ސަބަބުން ފެނަކައިން އަންނަނީ މަޝްރޫއުތަކުގައި މަސައްކަތް ކުރާ ފަރާތްތަކަށް މުސާރަ ދިނުމާއި އަދި އިތުރު ހަރަދުތައްވެސް ކުރަމުންކަމުގައި އޭނާ ވިދާޅުވިއެވެ.
މުއާޒް ވިދާޅުވީ އެ މައްސަލަތައް އޭސީސީއަށް ހުށަހެޅީ ތުހުމަތުކުރެވޭ ފަރާތްތަކާއި ދެކޮޅަށް ހެކި ހުރުމުން ކަމުގައެވެ. އޭނާ ވިދާޅުވީ އެ މައްސަލަތަކުގައި ފެނަކައިގެ ކުރީގެ އެމްޑީ އަހުމަދު ސައީދު މުހައްމަދާއެކު އެކި މީހުން ހިމެނޭ ކަމުގައެވެ.
ކޮމެންޓު ފޮނުވާ