ކުރީގެ ރައީސް ޔާމިން އުފައްދަވާ ”ޕީޕަލްސް ނެޝަނަލް ފްރަންޓް“(ޕީއެންއެފް) ގެ މަސައްކަތްތައް ދެން ވަރަށް ބާރަށް ކުރިޔަށް ދާނެކަމުގައި، އެ ޕާޓީ އެފެއްދެވުމުގެ މަސައްކަތްތަކުގައި އިސްކޮށް އުޅުއްވާ ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޑރ. ޖަމީލް މިހެން ވިދާޅުވީ ޕީ.އެން.އެފް އުފެއްދުމަށް ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަނުން އިއްޔެ ދިނުމާއެކު، އެ ޕާޓީގެ މަސައްކަތްތަކާގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
މި ބައްދަލުވުމުގައި ވާހަކަދައްކަވަމުން ޑރ. ޖަމީލް ވިދާޅުވީ، ޕީ.އެން.އެފް ވެގެން ދާނީ ރައްޔިތުންގެ ހައްޤުތައް ރައްޔިތުންގެ މަޖިލިސް ތެރޭގައި ކަށަވަރު ކުރާނެ ޕާޓީއަކަށްކަމަށެވެ.
ޕާޓީގެ މަސައްކަތް ދެން ވަރަށް ބާރަށް ކުރިއަށް ދާނެ، އަޅުގަނޑުމެންގެ ޕާޓީ އުފެއްދުމަށް ފަހުގަ ޕާޓީގެ އެކި ގުނަވަންތަކާއި އަދި ހަމަ މެމްބަރޝިޕް ޑްރައިވަށް މި މަސައްކަތް ކުރިއަށްދާއިރުގަ، އަޅުގަނޑު ތިބޭފުޅުންނަށް ދަންނަވާލަން ބޭނުންވާ ވާހަކައަކީ، ޑިމޮކްރެޓިކް އުޞޫލުގެ މަތިން ޕާޓިއެއް އުފެދިގެން މިދަނީ، ދިވެހިރާއްޖޭގެ ޤާނޫން އަސާސީއާއި އެއްގޮތްވާ ގޮތުގެ މަތިން ރާއްޖޭގަ މިއޮތް ގަވަރނެންސަށް މަގުފައިކޮށްދިނުމަށްޓަކައޭ.
ޑރ. ޖަމީލް ވިދާޅުވިއެވެ.
އޭނާ އިތުތަށް ވިދާޅުވީ އެ ޕާޓީ ވެގެންދާނީ ރައީސް ޔާމިންގެ ފިކުރާ އެއްގޮތަށް ކުރިޔަށް ދާނެ ޕާޓީއަކަށް ކަމަށެވެ.
އިލެކްޝަންސް ކޮމިބަން (އީސީ)ން އިއްޔެ ކުރި އެކްސް ޕޯސްޓެއްގައި ބުނެފައިވަނީ ސިޔާސީ ޕާޓީގެ ޤާނޫނުގެ 12 ވަނަ މާއްދާގައިވާ ގޮތުގެ މަތިން “ޕީޕަލްސް ނެޝަނަލް ފްރަންޓު”ގެ ނަމުގައި ސިޔާސީ ޕާޓީއެއް އުފެއްދުމަށް ބޭނުންވާ 3000 (ތިންހާސް) މީހުންގެ ސޮއި ކޮމިޝަނަށް ހުށަހަޅާފައިވާތީ، މއ.ކާމިނީހުޅަގުގެ، ޒެއިން ޔާމީން ޢަބްދުލްޤަައްޔޫމަށް ސިޔާސީ ޕާޓީ އުފެއްދުމަށް ބާއްވާ ބައްދަލުވުން ބޭއްވުމުގެ ހުއްދަ ކޮމިޝަނުން ދީފައިވާ ކަމުގައެވެ.
ޕީއެންއެފް ރަޖިސްޓްރީ ކުރުމަށް އިލެކްޝަންސް ކޮމިޝަނަށް އެޕާޓީން ހުށަހެޅި ފޯމުތަކުގެ ތެރެއިން ސައްޙަ ނޫންކަމަށް ކަނޑައެޅި ފޯމުތަކުގައި ހުރި މައްސަލަތައް ރަގަޅު ކޮށްފަ ވަރަށް އަވަހަށް ހުށަހަޅާނެކަމަށް އެޕާޓީން މީގެކުރިން ވަނީ ބުނެފައެވެ.
ޕީއެންއެފް އުފެއްދުމުގައި އިސްކޮށް އުޅުއްވާ މުހައްމަދު މަލީހު ޖަމާލް ބައެއް މީޑިއާތަކަށް މައުލޫމާތު ދެއްވަމުން ވިދާޅުވީ އިލެކްޝަންސް ކޮމިޝަނުން ސައްހަ ނޫންކަމަށް ކަނޑައެޅި އެއްވެސް ފޯމެއް ބާތިލް ކޮށްފައި ނުވާކަމަށާއި ހުރިހާ ފޯމެއްގައިވެސް ހުރީ އިދާރީ މައްސަލަތައް ކަމުގައެވެ.
ރައީސް ޔާމީން އިސްވެ އުފައްދަވަން ނިންމެވި ޕާޓީ އުފައްދަން ބޭނުންވާ 3000 ފޯމް ހަމަކޮށް 24 ގަޑިއިރުތެރޭ ހުށަހަޅާނެކަމަށް އެ ޕާޓީ އުފެއްދުމަށް އިސްކޮށް އުޅުއްވި މަލީހް ޖަމާލް މީގެކުރިން ވަނީ ވިދާޅުވެފައެވެ.
ނަމަވެސް ފޯމްތައް ހަމަކޮށް އީސީއަށް ހުށަހެޅުނީ އޭގެ އެތައް މަހެއްފަހުންކަން ފާހަގަކޮށްލެވެއެވެ.
