ރާއްޖޭގެ އެކި ރަށްރަށުގައި ސްޕޯޓްސް އެރީނާތައް ގާއިމު ކުރުމުގެ ގިނަ މަސައްކަތްތަކެއް މި އަހަރު ކުރިއަށްދާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރާއްޖޭގެ އެކި ސަރަޙައްދުތަކުގައި ސްޕޯޓްސް އެރީނާތައް ގާއިމުކުރުމުގެ ވައުދާ ގުޅޭ ގޮތުން ކުރި ސުވާލަށް ޖަވާބު ދެއްވަމުން ރައީސް ޑރ. މުއިއްޒު ވިދާޅުވީ ކުޅިވަރު ދާއިރާއަކީ މި ސަރުކާރުން ވަރަށް އިސްކަން ދޭ ދާއިރާއެއް ކަމަށާއި އޭގެ ހެއްކަކަށް ސްޕޯޓްސް މިނިސްޓްރީ ނަމުގައި ވަކި ވުޒާރާއެއް އުފެއްދުން ހިމެނޭ ކަމަށެވެ.
ރައީސް ވިދާޅުވީ، ކުޅިވަރު ކުޅޭ އެކިއެކި ވަސީލަތްތައް ގާއިމްކޮށްދިނުމާއި ކުޅިވަރު ކުޅޭ އެކި ކަހަލަ ފަރާތްތަކަށް އެކި ކަހަލަ ކަންތައްތައް ފަހިކޮށްދިނުން އެއީ މި ސަރުކާރުގެ ވަރަށް ބޮޑު ސިޔާސަތެއް ކަަމަށެވެ.
"އެއީ ފަރުވާގެ ގޮތުން ވިޔަސް، ތަމްރީނުގެ ގޮތުން ވިޔަސް، އެކަންކަން ކޮށްދިނުމަކީ އަޅުގަނޑުމެން ވަރަށް ބޮޑު ސިޔާސަތެއް،". ރައީސް ވިދާޅުވިއެވެ.
ރައީސްގެ ޖަވާބު
3 އޭޕްރީލް 2024ނ.މާޅެންދޫ، ލައިފްހާޓް، މުޙައްމަދު ނިޝާމް، ރާއްޖޭގެ އެކި ސަރަޙައްދުތަކުގައި ސްޕޯޓްސް އެރީނާތައް ޤާއިމުކުރެއްވުމުގެ ވަޢުދާ ގުޅޭގޮތުން ދެންނެވި ސުވާލަށް ރައީސުލްޖުމްހޫރިއްޔާ ދެއްވި ޖަވާބު pic.twitter.com/OjFsyvpsNX
— Government of Maldives (@governmentmv) April 3, 2024
ރައީސް ވިދާޅުވީ، ސްޕޯޓްސް ކޮމްޕްލެކްސްތައް ގާއިމްކޮށްދިނުމާއި، ވަކިކަހަލަ ކޯޓުތައް އަޅާ ދިނުމަކީ އެމަނިކުފާނު ވެވަޑައިގެންނެވި ވައުދުތައް ކަމަށެވެ. މިހާރު ވެސް ބައެއް މަޝްރޫއުތަކުގެ އަމަލީ މަސައްކަތް ފެށުމަށް ތައްޔާރުވެފައިވާ އިރު، ބައެއް މަޝްރޫއުތައް ހިނގަމުންދާ ކަމަށް ވިދާޅުވިއެވެ.
"އެހެންވީމަ ސްޕޯޓްސް އެރީނާ އަދި ވަކިވަކި ކޯޓުތައް އެޅުމާއި، އިންޑޯ ކޯޓުތަކާއި އަންހެން ބޭފުޅުންނަށް ހާއްސަކޮށް ބޭނުންވޭ ހޭންޑްބޯލް ކޯޓު، މިހެންގޮސް އެކި ކަހަލަ ކޯޓުތައް އެޅުމަށް މި އަހަރު ތެރޭ ގިނަ މަސައްކަތްތަކެއް ހިނގާނެ،" ރައީސް ވިދާޅުވިއެވެ.
