ރަމަޝާން މަހުގެ ފަހު 10 އާއި ދިމާކޮށް ސަރުކާރު ބަންދުކުރި ނަމަވެސް އިމަޖެންސީ ހާލާތްތަކުގައި އައިޑީކާޑު ހެދުމުގެ ހިދުމަތް ދޭނެ ކަމަށް ޑިޕާޓްމެންޓް އޮފް ނެޝަނަލް ރެޖިސްޓްރޭޝަނުން ބުނެފި އެވެ.
ޑީއެމްއާރްއިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ ސަރުކާރު ބަންދުވާ މުއްދަތުގައި އިމަޖެންސީކޮށް އައިޑީ ކާޑު ހަދަން ޖެހޭ ފަރާތްތަކަށް އެހިދުމަތް ދޭން ނިންމާފައިވާކަމަށާއި ހިދުމަތް ހޯއްދެވުމަށް 7280368 ގުޅުއްވުމަށެވެ.
ރަމަޝާން މަހުގެ ފަހު 10 އެއް ސަރުކާރު ބަންދު ދުވަސްތައް ގޮތުގައި ކަނޑައަޅާފައިވަނީ ރައީސް ޑރ މުހައްމަދު މުއިއްޒު އެވެ. ރައީސް މިއަދު ވިދާޅުވީ ރަމަޟާންމަހުގެ ފަހު 10 ގެ ދުވަސްތައް ސަރުކާރު ބަންދުކުރައްވަން ނިންމެވީ، ރޭއަޅުކަމަށް ފުރުޞަތުދެއްވައި، މި ދުވަސްތަކުގައި އެންމެ ހެނދުނާ އޮފީހަށް ދިއުމުގެ ބުރަ ލުއިކޮށްދެއްވުމަށްކަމުގައި ކަމަށެވެ.
ނަމަވެސް ކޮންމެހެން ދޭން ޖެހޭ ހިދުމަތްތައް ދެވޭނެ އިންތިޒާމުތައް ސަރުކާރުން ވަނީ ހަމަޖައްސަވާފައި އެވެ. އަދި އެދުވަސްތަކުގައި ވަޒީފާއަށް ނުކުންނަ ސަރުކާރުގެ މުވައްޒަފުންނަށް ޚާއްސަ އެލަވެންސެއްވެސް ދޭން ސަރުކާރުން މިހާރު ވަނީ ނިންމާފައި އެވެ.
ކޮމެންޓު ފޮނުވާ