ހދ.ވައިކަރަދޫ ގައި ދިމާވެފައިވާ ކަރަންޓުގެ މައްސަލައަށް ހައްލެއް ހޯދުމަށް ކުރެވެމުންދާ މަސައްކަތުގެ ތެރެއިން އެރަށަށް ބޭނުންވާ 250ކވ ގެ އައު ޖަނަރޭޓަރު މިހާރު އެ ރަށަށް ފޮނުވުމުގެ މަސައްކަތް ކުރަމުންދާ ކަމުގައި ފެނަކައިން ބުނެފިއެވެ.
ފެނަކައިން ކުރި އެކްސް ޕޯސްޓެއްގައި ވިދާޅުވީ އެރަށަށް ގެންދެވޭ އައު ޖަނަރޭޓަރ ސެޓް އިންސްޓޮލޭޝަންގެ މަސައްކަތް މާދަމާ ކުރެވޭނެ ކަމުގައެވެ.
އަދި ފެނަކައިން ބުނެފައިވަނީ، މިދަނޑިވަޅުގައި، ރައްޔިތުންނަށް ދިމާވާ ދަތިތަކަށް ނިހާޔަތަށް މާފަށް އެދޭކަމަށާއި، ރައްޔިތުންގެ ފަރާތުން ލިބެމުންދާ އެއްބާރުލުމަށް ޝުކުރު ދަންނަވާކަމުގައެވެ.
ވައިކަރަދޫއަށް ޖެނެރޭޓަރ ސެޓެއް ގެންދިއުމަށް ހަމަޖައްސާފައިވާއިރު އެރަށުގައި 4 ދުވަސް ވަންދެން ކަރަންޓު ނެތްކަމަށް ބުނެ އެރަށު ރައްޔިތުން ރޭ ވަނީ މުޒާހިރާ ކޮށްފައެވެ.
ވައިކަރަދޫގައި މުޒާހިރާ ކުރި މީހުން ބުނެފައިވަނީ އެރަށުގެ ރައްޔިތުން ކަނު އަނދިރީގައި ތިބޭތާ 4 ދުވަސް ވެފައިވާ ކަމަށާއި، ފެނަކައިން އަބަދުވެސް ބުނަމުން ގޮސްފައިވަނީ އިންޖު ލޯޑު ކުރަނީ ކަމަށެވެ. އަދި ރޭ މުޒާހިރާ ކުރި މީހުން ބުނެފައިވަނީ އެމީހުން ގެއަށް ވަންނަނީ އެރަށުގެ ކަރަންޓުގެ މައްސަލައަށް ހައްލެއް އައުމުން ކަމަށެވެ.
އަދި އެގެ ތެރެއިން ބައެއް މީހުން ބުނީ އެމީހުންނަކީ ފާއިތުވި ރިޔާސީ އިންތިޚާބުގައި ރައީސް މުއިއްޒުއަށް ތާއީދުކުރި މީހުންކަމަށެވެ. އެހެންނަމަވެސް 4 ދުވަހު ކަނު އަނދިރީގައި ތިބެންޖެހުމުން މިސަރުކާރާ ދެކޮޅަށް މުޒާހިރާއަށް ނިކުންނަން ޖެހުނީކަމަށްވެސް ބުނެފައި ވެއެވެ.
ރޭ މުޒާހިރާ ކުރިން ބައެއް މީހުން ވަނީ ގައިގައި ސައިބޯނި ހާކައިގެން މުޒާހިރާގައި ބައިވެރިވެފައެވެ. އޭނާ ބުނެފައިވަނީ ކަރަންޓު ދިޔައީ ގައިގައި ސައިބޯނި ލާން ހުއްޓާ ކަމަށާއި، އެނޫން ހައްލެއް ބޭނުންވާ ކަމަށެވެ.
ކޮމެންޓު ފޮނުވާ