ކުރިއަށް އޮތް ރައްޔިތުންގެ މަޖިލިސް އިންތިހާބު އަންނަ އޭޕްރީލް 21 ވަނަ ދުވަހު ބޭއްވުމަށް އިލެކްޝަންސް ކޮމިޝަން (އީސީ) އިން ކަނޑައަޅާފައިވާތީ އެ ދުވަހަކީ ބަންދު ދުވަހެއްގެ ގޮތުގައި ކަނޑައަޅާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރ. އަތޮޅަށާއި ބ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި ރ. އުނގޫފާރަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ އިންތިހާބާ ބެހޭ އާންމު ގާނޫނު މިހާރު އޮތް ގޮތުން އޭޕްރީލް 21 ވަނަ ދުވަހު އިންތިހާބު ބާއްވަން އީސީ އަށް މަޖުބޫރުވެފައިވާ ކަމަށެވެ. އަދި އެ ދުވަހަކީ އާދިއްތަ ދުވަހަކަށްވާތީ، އެ ދުވަހު އިންތިހާބު ބާއްވަން ނިންމުމުން އެކަމާ މެދުގައި ސުވާލު އުފެދުނު ކަމުގައި ރައީސް ވިދާޅުވިއެވެ.
"އިދިކޮޅު ޕާޓީގެ ބޭފުޅުން އަޅުގަނޑު ބަދުނާމްކޮށް ވާހަކަ ދައްކަން ފަށައިފި އަޅުގަނޑު ރައްޔިތުން ވޯޓުލިޔަ ނުދޭންވެގެން ބަންދު ނޫން ދުވަހަކަށް އެ ދުވަސް ހަދައިފި ކަމަށް. ދެން އަޅުގަނޑު އިލެކްޝަންސް ކޮމިޝަންގައި އަހައިފިން ކިހިނެއް ހޭ މިވަނީ. އެބޭފުޅުން ވިދާޅުވަނީ މަޖިލިހުން ގާނޫނު ފާސް ކުރި ގޮތުން ތިމަންނަމެންނަށް ބޭއްވެން އޮތް ދުވަހަކީ އެއީއޭ. ހޮނިހިރު ދުވަހަކަށް ހެދޭކަށް ނެތޭ، ރޯދަ މަސް ނިމި 10 ދުވަސް ފަހުންނޭ ބޭއްވެން އޮތީ،" ރައީސް ވިދާޅުވިއެވެ.
"އެ ބޭފުޅުން އާދިއްތަ ދުވަހަށް ހެދީ އަޅުގަނޑަކާ މަޝްވަރާކޮށްފައެއް ނޫން. ގާނޫނުގައި އޮތް ގޮތްވީމަ، ދެން އަޅުގަނޑު ދަންނަވާފައި އޮންނާނީ ތިޔަބޭފުޅުން ތިގޮތަށް އިއުލާންކޮށް ނިންމާފައިއޭ ތިއޮތީ. އެހެންވެ އަޅުގަނޑު އެ އެ ދުވަސް ބަންދު ކުރާނަމޭ."
ރައްޔިތުންގެ މަޖިލިސް އިންތިހާބު ބޭއްވުމަށް އީސީން އެންމެ ފުރަތަމަ ނިންމީ މި މަހުގެ 17 ގައެވެ. އެއީ މި އަހަރުގެ ރޯދަ މަހުގެ ފުރަތަމަ ހަފްތާއެވެ. އީސީން އެގޮތަށް ކަނޑައަޅާފައި ވަނިކޮށް އިންތިހާބުތައް ރޯދަ މަހާ ދިމާވާ ނަމަ، ރޯދަ މަސް ނިމޭތާ 10 ދުވަސް ފަހުން ބޭއްވުމަށް އިންތިހާބުތަކާ ބެހޭ ގާނޫނަށް އިސްލާހު ގެނައުމުގެ ބިލް މަޖިލިހުން ވަނީ ފާސްކޮށްފައެވެ. އެ ބިލް މަޖިލިހުން ދެ ފަހަރެއްގެ މަތިން ފާސް ކުރިއެވެ.
އަދި ބަންޑާރަ ނައިބު އަހުމަދު އުޝާމްގެ ލަފައާ އެކުގައި ރައީސް ބިލް ތަސްދީގު ކުރެއްވިއެވެ.
އީސީން ހާމަކުރި ގޮތުގައި އޭޕްރީލް 21 ގައި މަޖިލިސް އިންތިހާބު ބާއްވަން ނިންމީ، އެއީ ރޯދަ މަސް ނިމި، ފަހު 10 ދުވަސް ދޫކޮށް އަންނަ ފުރަތަމަ ދުވަސް ކަމަށްވާތީއެވެ.މިހާރު ކަނޑައަޅާފައި އޮތް ތާރީހަށް ވުރެން މަޖިލިސް އިންތިހާބު ލަސްކޮށްފި ނަމަ، މިހާރު އޮތް މަޖިލިސް އުވުމުގެ އެއް މަސް ދުވަސް ކުރިން އާ މަޖިލިސް ނުހޮވިދާނެ ކަމަށް އީސީން ބުނެފައިވެއެވެ.
