ކުރީގެ ނައިބުރައީސް ފައިސަލް ނަސީމް އެމްޑީޕީއަށް ސޮއިކުރައްވައިފިއެވެ.
ފައިސަލް ނަސީމު އެމްޑީޕީއަށް ސޮއި ކުރައްވާފައިވަނީ މިއަދު އެމްޑީޕީގެ އޮފީހުގައެވެ.
މި ރަސްމިއްޔާތުގައި ކުރީގެ ރައީސް ސާލިހުގެ އިތުރުން އެމްޑީޕީގެ ރައީސްކަމާއި ދާދިފަހުން ހަވާލުވެވަޑައިގެންނެވި ޝާހިދުގެ އިތުރުން އެމްޑީޕީގެ ޗެއަރޕާސަން ފައްޔާޒު އިސްމާއިލްވެސް ބައިވެރިވެވަޑައިގެންނެވިއެވެ.
ފައިސަލް އެމްޑީޕީއަށް ސޮއި ކުރެއްވުފަހު ފޯމު ހަވާލުކުރެއްވީ ކުރީގެ ރައީސް ސާލިހުއާއެވެ.
އެމްޑީޕީއަށް ސޮއި ކުރެއްވުމަށްފަހު ފައިސަލް ވިދާޅުވީ އެމްޑީޕީއާއި ގުޅުމަކީ ލިބުނު އުފަލެއް ކަމަށާއި، ގުޅިގެން އެކީގައި މަސައްކަތް ކުރަން ޖެހޭކަމަށެވެ. އަދި އެމްޑީޕީގެ ގައުމީ މަޖިލިހުގައި ކުރިންވެސް ހުންނެވިކަމަށް ވިދާޅުވަމުން ފައިސަލް ވިދާޅުވީ ފިކުރަށް ބަދަލު ނާންނަ ކަމަށާއި ސިޔާސަތުތަކަށް ބަދަލު ނާންނަ ކަމަށެވެ.
މިއަދު އަޅުގަނޑުމެން އެންމެން އެކުގައި މަސައްކަތްތަކެއް ކުރަން އެބަޖެހޭ، އެނގިވަޑައިގަންނަވާނެ އެމްޑީޕީ އަކީ ރައްޔިތުންނާއި ގާތުން ރައްޔިތުންނަށް މަސައްކަތް ކޮށްދޭ ޕާޓީއަކީ، މަޖިލީހުގެ އިންތިޚާބުގެ އަޤުލަބިއްޔަތު ހޯދައިދޭން މަސައްކަތްތަކެއް ކުރަންޖެހޭ، ޒިންމާތައް ދޫކޮށްލެވޭކަށް ނެތް. ރައްޔިތުންނަށް ހިދުމަތް ކުރުމުގައި ނޫން ގޮތެއްގައި އެއްވެސް ވަގުތެއް ހޭދައެއް ނުކުރާނަން. ޕާޓީގެ ލީޑަރޝިޕަށް ދޭންޖެހޭ ހުރިހާ އެއްބާރުލުން އަޅުގަނޑު ދޭނަން.
ފައިސަލް ވިދާޅުވިއެވެ.
ފެށުނީއްސުރެ ޖުމުހޫރީ ޕާޓީގައި އުޅުއްވުމަށްފަހު ކުރީގެ ނައިބު ރައީސް ފައިސަލް ނަސީމް ޖޭޕީން ވަކިވެވަޑައިގަތީ މީގެ މަހެއްހާ ދުވަސް ކުރިންނެވެ.
ފައިސަލް ނަސީމު އެމްޑީޕީގެ ވެރިކަމުގެ 5 އަހަރުގެ ދައުރުގައިވެސް އެހެން ޕާޓީއަކާއި ގުޅިވަޑައިގެންފައެއް ނުވެއެވެ. އެހެންނަމަވެސް ފާއިތުވި ރިޔާސީ އިންތިޚާބުގައި ރައީސް ސާލިހުގެ ރަނިންމޭޓަކަށް އޭނާ އިޚްތިޔާރު ނުކުރި ހިސާބުން އޭނާ ރައީސް ސާލިހުގެ ކެމްޕޭންގައި އުޅުއްވާފައެއް ނުވެއެވެ.
އެއަށްފަހު ފައިސަލްވަނީ ފާއިތުވި، މާލޭ ސިޓީގެ ބައި އިލެކްޝަންގައި އެމްޑީޕީގެ ކެނޑިޑޭޓް އާދަމް އާޒިމްގެ ކެމްޕޭންގައި އުޅުއްވާފައެވެ.
ފައިސަލް އެންމެ ފުރަތަމަ ސިޔާސީ މައިދާނަށް ނިކުންނެވީ 2004 ވަނަ އަހަރު ފުވައްމުލަކު މެންބަރެއްގެ ގޮތުގައި ހާއްސަ މަޖިލީހަށް އިންތިޚާބު ވެވަޑައިގެންނެވި ހިސާބުންނެވެ.
އެއަށްފަހު 2008 ވަނަ އަހަރު ޖޭޕީ އުފެދިގެން އައިސް ޤާސިމް އިބްރާހިމް ރިޔާސީ އިންތިހާބުގައި ވާދަކުރައްވަން ނިންމެވުމުން ފައިސަލް ވަނީ ޖޭޕީއައި ގުޅިވަޑަިއގެންފައެވެ. އެއަށްފަހު މިހާތަނަށްވެސް ފައިސަލް ހުންނެވީ ޖޭޕީ މެންބަރެއްގެ ގޮތުގައެވެ.
2014 ވަނަ އަހަރުގެ މަޖިލިސް އިންތިޚާބުގައި ކާށިދޫ ދާއިރާއަށް އޭނާ ހޮވިވަޑައިގަތެވެ. އެއަށްފަހު 2018 ވަނަ އަހަރު ރިޔާސީ އިންތިހާބުގައި ރައީސް ސާލިހުގެ ރަނިންމޭޓެއްގެ ހައިސިއްޔަތުން އޭނާވަނީ ރާއްޖޭގެ ނާއިބު ރައީސް މަގާމަށް ހޮވިވަޑައިގެންފައެވެ.
