އިނގިރޭސި ޕްރިމިއާ ލީގުގެ ރެލިގޭޝަން ޒޯނުގައި އޮތް ވެސްޓް ބްރޮމުގެ ކޯޗުގެ މަގާމުން ކްރޮއޭޝިއާގެ ސްލަވެން ބިލިޗް ވަކިކޮށްފިއެވެ.
ބިލިޗާއި އޭނާގެ ކޯޗިންގ ޓީމު އެއްކޮށް މަގާމުން ވަކިކުރިކަން ވެސްޓް ބްރޮމުން އިއުލާން ކުރިއިރު، އެ ކުލަބުން ނެރުނު ބަޔާނެއްގައި ވަނީ މިހާތަނަށް ބިލިޗް ވެސްޓް ބްރޮމަށް ކޮށްދިން ޚިދުމަތުގެ އަގުވަޒަންކޮށް އޭނާއަށް ޝުކުރުއަދާކޮށްފައެވެ.
ވެސްޓް ބްރޮމުން ބިލިޗް ވަކިކުރިއިރު، އެ ޓީމު އޮތީ ތާވަލުގެ ފުލުން ދެވަނައިގައި 13 މެޗުން ހަތް ޕޮއިންޓާއެކުއެވެ. ބިލިޗުގެ އިރުޝާދުގެ ދަށުން ކުޅުނު ވެސްޓް ބްރޮމުން މިހާތަނަށް ވަނީ މި ސީޒަނުގައި އަށް މެޗުން ބަލިވެފައެވެ. އެކަމަކު އަންގާރަ ދުވަހުގެރޭ އެ ޓީމުން ވަނީ ވަރުގަދަ މެންޗެސްޓާ ސިޓީއާ 1-1 ން އެއްވަރުކޮށްފައެވެ.
ވެސްޓް ބްރޮމުގެ ކޯޗުގެ މަގާމުން ބިލިޗް ވަކިކުރިއިރު، އެ މަގާމަށް އަންނާނެ ކަމަށް ބެލެވެނީ ރެލިގޭޝަނުން ޓީމުތައް ސަލާމަތް ކޮއްދިނުމުގައި މައްޝޫރުކަން ހޯދައިފަވާ އިނގިރޭސި ކޯޗު ސެމް އެލަޑައިސްއެވެ.
ކޮމެންޓު ފޮނުވާ