ގައުމީ އަންހެން އަދި ފިރިހެން ބާސްކެޓްބޯޅަ ޓީމުގެ ސްކޮޑު ނެގުމުގެ ގޮތުން ޓްރައި އައުޓްތަކެއް ބާއްވާގޮތަށް ބާސްކެޓްބޯލް އެސޯސިއޭޝަން (އެމްބީއޭ) އިން ނިންމައިފި އެވެ.
ޓްރައި އައުޓްގައި ބަައިވެރިވާން ބޭނުންވާ ކުޅުންތެރިން ފުރިހަމަ ނަމާއި އުފަން ތާރީހާއި ގުޅޭނެ ފޯނު ނަމްބަރު އަދި އައިޑީ ކާޑު ނަމްބަރު އެނގޭނެ ގޮތަށް ޖެހުމަށް ފަހު އަންނަ ހޮނިހިރު ދުވަހު 13:30 ގެ ކުރިން އެމްބީއޭ އަށް މެއިލްކުރުމަށް އެ އެސޯސިއޭޝަނުން ވަނީ އަންގައިފައެވެ.
އެމްބީއޭ އިން ޓްރައި އައުޓްތަކެއް ބާއްވަން ނިންމީ އެއް ސަބަބަކީ ކޮވިޑް-19ގެ ސަަބަބުން ދިގު މުއްދަތަކަށް ގިނަ ކުޅުންތެރިންތަކެއް މެޗުތަކެއް ނުކުޅެ ތިބުމަށް ފަހު އަލުން ގައުމީ ސްކޮޑުތައް އެކުލަވާލާއިރު އާ ކުޅުންތެރިންނަށް ވެސް ފުރުސަތު ލިބޭ ގޮތަށް ރޭވުމުގެ ގޮތުންނެވެ.
މީގެ ކުރިން އެހެން ބައެއް ގައުމީ ކުޅިވަރު އެސޯސިއޭޝަންތަކުން ވެސް ވަނީ ގައުމީ ސްކޮޑު އެކުލަވާލުމަށްޓަކައި އާ ހުނަރުވެރި ކުޅުންތެރިން ހޯދުމުގެ ގޮތުން ޓްރައި އައުޓްތަކެއް ބާއްވައިފަ އެވެ. އާންމު ގޮތެއްގައި ޓްރައި އައުޓްތައް ބާއްވާ އެންމެ ބޮޑު އެއް ސަބަބަކީ އެ ވަގުތަކު އޮންނަ ގައުމީ ޓީމުގެ ސްކޮޑަށް އިތުރަށް ވަރުގަދަ ކުރުމުގެ ބޭނުމުގަ އެވެ. ޓްރަައި އައުޓްތަކުގައި ބައިވެރިވެގެން ގައުމީ ޓީމުތަކުގެ ސްކޮޑުން ފުރުސަތު ހޯދި ކުޅުންތެރިން ގިނަ އެވެ.
މިދިޔަ އަހަރު ރާއްޖޭން ބޭރުގައި ބާސްކެޓްބޯޅަ ޓީމުތަކުން ރަނގަޅު ޓްރެއިނިން ކޭމްޕްތަކެއް ފުރިހަމަކުރިއިރު، ގައުމީ އަންހެން ބާސްކެޓް ޓީމުން ވަނީ ސައުތު އޭޝިއަން ގޭމްސްގައި ލޯ މެޑަލް ހޯދައިފަ އެވެ.
ކޮމެންޓު ފޮނުވާ