އިޓާލިއަން ސެރިއާގައި އޭސިމިލާން އެއްވަރުވެ ލީގުގެ ކުރީގައި ޕޮއިންޓް ފަރަގު ކުޑަވެއްޖެއެވެ.
ރަށުން ބޭރުގައި މިލާން އެއްވަރުވީ ޖެނޯވާ އަތުން 2-2 ލަނޑުންނެވެ. މެޗުގައި މިލާން އަށް ލަނޑުތައް ކާމިޔާބުކޮށްދިނީ ޑޭވިޑޭ ކަލަބްރިއާ އާއި ޕިއެރީ ކަލުލޫއެވެ. ރޭގައި އިންޓަމިލާން ވަނީ ނަޕޯލީ ބަލިކޮށް ތާވަލުގެ ދެވަނައިގަ ހިފަހައްޓައިފައެވެ. މެޗުގައި ހަމައެކަނި ލަނޑު އިންޓަމިލާނަށް ކާމިޔާބުކޮށްދިނީ ލިބުނު ޕެނެލްޓީއަކުން ރޮމަލޫ ލުކާކޫއެވެ.
ރޭގެ ޔުވަންޓަސް ވަނީ ލިގުގައި އެޓްލާންޓާ ވާދަކޮށް 1-1 ލަނޑުން އެއްވަރުވެފައެވެ. މެޗުގައި ފެޑްރީސިއޯ ޗީސާ ޔުވެންޓަސްއަށް ކުރި ހޯދައިދީފަ ވަނިކޮށް އެޓްލާންޓާއިން އެއްވަރުކުރީ ރެމޯ ފްރެއުލާ ކާމިޔާބުކުރި ލަނޑުންނެވެ. މި ލަނޑަށްފަހު ލީޑު ނަގަން ޔުވެންޓަސްގެ ކްރިސްޓިއާނޯ ރޮނާލްޑޯއަށް ލިބުނު ފުރުސަތު ވަނީ ނަގާލާފައެވެ. ރޮނާލްޑޯ ޖެހި ޕެނެލްޓީ ވަނީ ކާމިޔާބުކުރެވޭ ގޮތް ނުވެފައެވެ.
މިމެޗާއެކު އެންމެފަހުން ލީގުގައި ކުޅުނު 12 މެޗުގެ ތެރެއިން ޔުވެންޓަސް ވަނީ 6 މެޗުން އެއްވަރުވެފައެވެ. ވިދިވިދިގެން 9 ފަހަރު ލީގުގައި ކާމިޔާބުކޮއްފަވާ ޔުވެންޓަސް ޕިރްލޯ ކޯޗުކަމުގައި އެންމެފަހުން ކުޅުނު 12 މެޗުން އެޓީމު ބަލިވެފައެއް ނުވެއެވެ. ރޭ ލީގުގައި ލާޒިޔޯ އާއި ބެންވެންޓޯ 1-1 ލަނޑުން އެއްވަރުވި އިރު ފިއެރޮންޓީނާ އާއި ސަސުލޯ ވެސް ވަނީ 1-1 ލަނޑުން އެއްވަރުވެފައެވެ.
މި ނަތީޖާ އެކު ލީގު ކުރީގައި މިލާން އޮތީ 28 ޕޮއިންޓާއެކު ދެވަނާއިގަ އިންޓަމިލާން މިލާނަށް ވުރެ އެއްޕޮއިންޓް މަދުން ހޯދައިގެން އޮތްއިރު ތިންވަނައިގަ ޔުވެންޓަސް އޮތީ 24 ޕޮއިންޓާއެކުއެވެ. ނަޕޯލީ ހަތަރުވަނައިގަ އޮތީ 23 ޕޮއިންޓާއެކުއެވެ.
ކޮމެންޓު ފޮނުވާ