އާސެނަލް އެއްވަރުވެ އިތުރު ހުރަސްތަކެއް

އިނގިރޭސި ލީގުގައި އާސެނަލް ކުޅުނު މެޗު އެއްވަރުވެ އަނެއްކާވެސް ލީގުގައި ކުރިޔަށް ދިޔުމަށް އިތުރު ހުރަސްތަކެއް ކުރި މަތިވެއްޖެއެވެ.

އަމިއްލަ ދަނޑުގައި ކުޅުނު މެޗުން އާސެނަލް އެއްވަރުވީ ސައުތުހެމްޓަންއާ ވާދަކޮށް 1-1 ލަނޑުންނެވެ. މެޗުގެ ފުރަތަމަ ލަނޑުޖަހާ ކުރި ހޯދީ ސައުތުހެމްޓަން އިންނެވެ. މިލަނޑު އެޓީމަށް ކާމިޔާބުކޮށްދިނީ އާސެނަލްގެ ކުރީގެ ކުޅުންތެރިޔާ ތިއޯ ވޮލްކޮޓްއެވެ. މި ލަނޑާއެކު އާސެނަލްގެ އެމިރޭޓްސް ދަނޑުގައި ވޮލްކޮޓް ކާމިޔާބު ކުރި ލަނޑުގެ އަދަދު ވަނީ 38 އަށް އަރާފައެވެ. މި އަދަދާއި ކައިރިން ވާދަކުރަނީ އާސެނަލްގެ ކުރީގެ ދެ ކުޅުންތެރިންކަމަށްވާ އޮލިވާ ޖިރޫޑް ޖެހި 40 ލަނޑާއި ރޮބިން ވެންޕާސީ ޖެހި 46 ލަނޑެވެ. މިއީ އެމިރޭޓްސް ދަނޑުގައި ވޮލްކޮޓް އޭނާގެ ކުރީގެ ކުލަބާ ދެކޮޅަށް ސައުތުހެމްޓަންގެ ޖާޒީގަ ކުޅުނު ފުރަތަމަ މެޗެވެ.

އާސެނަލްއިން ނަތީޖާ ހަމަހަމަކުރީ ދެވަނަހާފްގައި އެމްރިކް އައުބަމަޔަން ކާމިޔާބުކުރި ލަނޑުންނެވެ. މެޗުގެ ދެވަނަ ހާފްގައި އާސެނަލްގެ ގެބްރިއަލް މަންގާޅީސް އަށް ވަނީ ދެވަނަ ރީނދޫކާޑާ އެކު ރަތްކާޑު ދައްކާ ދަނޑުން ފޮނުވާލާފައެވެ. އެންމެފަހުން ލީގުގައި ކުޅުނު 9 މެޗުގެ ތެރެއިން އާސެނަލް އަށް މޮޅުވީ އެންމެ މެޗަކުންނެވެ. ލީގުގައި މިހާތަނަށް ކުޅުނު 13 މެޗުގެ ތެރެއިން އާސެނަލްއަށް ހޯދުނީ 14 ޕޮއިންޓެވެ.

ރޭ ލީގުގައި ލީޑްސް ޔުނައިޓެޑު ވަނީ ނުއުކާސަލް އާ ވާދަކޮށް 5-2 މޮޅުވެފައެވެ. ރޭގައި މެޗުގައި ލީޑްސްގެ ފުރަތަމަ ލަނޑު ކާމިޔާބުކުރި ޕެޓްރިކް ބެންފޯޑް ވަނީ ބިއެލްސާގެ ކޯޗުކަމުގައި މިހާތަނަށް ލީޑްސް ޔުނައިޓެޑަށް 34 ލަނޑު ކާމިޔާބުކޮށްފައެވެ. ރޭގަ ކުޅެވުނު އެހެން މެޗުތަކަށް ބަލާއިރު އެވަޓަން ވަނީ ރަށުން ބޭރުގައި ލެސްޓާގެ މައްޗަށް 2-0 ލަނޑުން ކުރިހޯދާފައެވެ. ފުލަމް ބްރައިޓަން މެޗު ލަނޑެއް ނުޖެހި އެއްވަރުވިއިރު ކްރިސްޓަލް ޕެލޭސް ވެސްޓްހަމް ވާދަކުރި މެޗު ނިމުނީ 1-1 ލަނޑުން އެއްވަރުވެގެންނެވެ.

ރޭގެ ނަތީޖާ ތަކާއެކު އާސެނަލް ލީގުގެ 15 ވަނައަށް ވެއްޓުނުއިރު އެވަޓަން ވަނީ ރޭގެ ހޯދި މޮޅާއެކު 23 ޕޮއިންޓް ހޯދައިގެން 5 ވަނައަށް ކުރިޔަށް ޖެހިލާފައެވެ. އެއީ ހަތަރުވަނައިގަ އޮތް ލެސްޓާ ސިޓީއާއި ތިންވަނައިގަ އޮތް ސައުތުހެމްޓަންއަށް ވުރެ އެއްޕޮއިންޓް މަދު އަދަދެކެވެ. ރޭގަ ހޯދި މޮޅާއެކު ލީޑްސް ޔުނައިޓެޑު ވެސް ވަނީ 17 ޕޮއިންޓާއެކު ލީގުގެ 13ވަނައަށް ކުރިޔަށް ޖެހިލާފައެވެ. ރޭގެ މެޗު އެއްވަރުވުމުން ވެސްޓްހަމް ވަނީ 7 ވަނައަށް ވެއްޓިފައެވެ.