ރައްޔިތުންގެ މަޖިލީހުގެ އިންތިހާބުގައި ވާދަ ކުރައްވާ ހުރިހާ ކެންޑިޑޭޓުންގެ ލޯގޯއާއި ފޮޓޯ، ވޯޓު ކަރުދާހުގައި ޖެހުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވީ ވޯޓް ކަރުދާހުގައި ފޮޓޯ ޖެހުމުގެ އިހްތިޔާރު ހުރިހާ ކެންޑިޑޭޓުންނަށް ވެސް އޮންނާނެ ކަމަށާއި ނަމަވެސް އެއީ މަޖުބޫރު ކަމެއް ނޫން ކަމަށެވެ. އަމިއްލަގޮތުން ވާދަ ކުރައްވާ ކެންޑިޑޭޓުންނަށް، އީސީން ފާސްކޮށްފައިވާ، އެ ކެންޑިޑޭޓަކު ހުށަހަޅާ ލޯގޯ އެއް ބޭނުން ކުރެވޭނެ ކަމަށް ހަބީބް ވިދާޅުވިއެވެ. ސިޔާސީ ޕާޓީތަކުގެ ކެންޑިޑޭޓުންގެ ލޯގޯ އަކަށް ވާނީ، އެ ކެންޑިޑޭޓަކު ނިސްބަތްވާ ޕާޓީއެއްގެ ލޯގޯއެވެ.
އަމިއްލަ ގޮތުން ވާދަކުރައްވާ ކެންޑިޑޭޓުންގެ ތެރެއިން، އެއް ކެންޑިޑޭޓެއް ހުށަހަޅާ ލޯގޯއެއް އަނެއް ކެންޑިޑޭޓަކަށް ބޭނުން ނުކުރެވޭނެ ކަމަށާއި ދެ ލޯގޯ އެއްގޮތް ވެއްޖެނަމަ ފުރުސަތު ލިބޭނީ ކުރިން ލޯގޯ ހުށަހެޅުއްވި ކެންޑިޑޭޓަކަށް ކަމަށް ހަބީބު ވިދާޅުވިއެވެ.
ރާއްޖޭގައި މިހާތަނަށް އަމަކުކުރަމުންދިޔަ އުސޫލުގެ ދަށުން ވޯޓް ކަރުދާހުގައި ލޯގޯ އަދި ފޮޓޯ ހިމެނުމުގެ ފުރުސަތު އޮންނަނީ ހަމައެކަނި ޕާޓީތަކުގެ ކެންޑިޑޭޓުންނަށެވެ. މީގެކުރީގެ ބައެއް އިންތިހާބުތަކުގައި ކެންޑިޑޭޓުންގެ ފޮޓޯ ޖެހުމުގެ ފުރުސަތު ދީފައިވެއެވެ. ނަމަވެސް އަމިއްލަ ކެންޑިޑޭޓުންނަށް ލޯގޯ ޖެހުމުގެ ފުރުސަތު ދޭ މިއީ ފުރަތަމަ ފަހަރެވެ.
މަޖިލިހުގެ އިންތިހާބުގައި ވާދަކުރުމުގެ ފުރުސަތު އިލެކްޝަންސް ކޮމިޝަނުން ހުޅުވާލާފައިވާ އިރު، އިންތިހާބުގައި ވާދަކުރުމުގެ މުއްދަތު ހަމަވާނީ މި މަހުގެ 14 ވަނަ ދުވަހުގެ މެންދުރު ފަހު 2:00 ޖަހާއިރުއެވެ.
