ފާއިތުވި ތިންއަހަރަށް ބަލާއިރު ފުލުހުންނާ ގުޅޭގޮތުން އެންމެ ގިނަ މައްސަލަ ހުށަހަޅާފައިވަނީ ފާއިތުވި 2023 ވަނަ އަހަރުކަމަށް ފުލުހުންގެ ތަފާސް ހިސާބުކުން ހާމަވެއްޖެއެވެ.
ފުލުހުން ބުނެފައިވަނީ ފާއިތުވި ތިންއަހަރު ފުލުހުންނާ ގުޅޭގޮތުން ހުށަހަޅާފައިވާ މައްސަލަތަކަށް ބަލާއިރު، 2021 ވަނަ އަހަރު 199 މައްސަލަ ހުށަހަޅާފައިވާއިރު 2022 ވަނަ އަހަރު 186 މައްސަލަ ހުށަހަޅާފައިވާ ކަމަށެވެ. އަދި ފާއިތުވި 2023 ވަނަ އަހަރު ފުލުހުންނާ ގުޅޭގޮތުން 239 މައްސަލަ ހުށަހަޅާފައިވާއިރު، މި މައްސަލަތަކުގެ ތެރެއިން 2021 ވަނަ އަހަރު 135، 2022 ވަނަ އަހަރު 100 އަދި 2023 ވަނަ އަހަރު 107 މައްސަލައާ ގުޅޭގޮތުން އިންޓާނަލް ތަހުގީގު ކުރިއަށް ގެންގޮސްފައިވާކަމަށްވެސް ފުލުހުން ބުނެފައި ވެއެވެ.
ފުލުހުން އިތުރަށް ބުނެފައިވަނީ، ދިވެހި ފުލުހުންނާ ގުޅޭގޮތުން ހުށަހަޅާފައިވާ މައްސަލަތަކާ ގުޅިގެން ޑިސިޕްލިނަރީ ބޯޑަށް ފޮނުވާފައިވާ މައްސަލަތަކުގެ ތެރެއިން 2021 ވަނަ އަހަރު 68 މައްސަލަ، 2022 ވަނަ އަހަރު 33 މައްސަލަ އަދި 2023 ވަނަ އަހަރު 36 މައްސަލައެއްގައި ފުލުހުންނަށް ފިޔަވަޅުއަޅާފައިވާ ކަމުގައެވެ.
ޑިސިޕްލިނަރީ ބޯޑުން އަޅާފައިވާ ފިޔަވަޅުތަކުގެ ތެރޭގައި، ކައުންސެލިންގ ދިނުން، ކައިރިންގ ސުޕަވައިޒްކުރެވޭ ގޮތަށް ވަޒީފާ އަދާކުރުވުން، ވަޒީފާއަދާކުރާ ތަން ބަދަލުކުރުން، ހާއްސަ ތަމްރީނެއް ފުރިހަމަކުރުވުން، ގާބިލުކަން އިތުރުވާފަދަ ހާއްސަ ކައުންސެލިންގ ދިނުން، މަގާމު ދަށްކުރުން، ޕްރޮމޯޝަން ނުދީ ހިފެހެއްޓުން، ރޭންކު ދަށްކުރުން، ވަޒީފާއިން ވަކިކުރަން ލަފާދިނުން އަދި އިންފޯމަލް ރެޒޮލިއުޝަން ހިމެނޭކަމަށްވެސް ފުލުހުން ބުނެފައި ވެއެވެ.
2021 އިން 2023 އަށް ފުލުހުންނާ ގުޅޭގޮތުން އެންމެ ގިނައިން ހުށަހަޅާފައިވާ މައްސަލަތަކަކީ ގަވާއިދާ ހިލާފުވުން، މާރާމާރީ، ފުލުހެއްގެ ކިބައިގައި ހުންނަންޖެހޭ އަހުލާގީ މިންގަނޑުތަކާ ހިލާފުވުމުގެ މައްސަލަތައް، ވަޒީފާއިން ފިލުމުގެ މައްސަލަތައް، އިހުމާލުވުން އަދި ފުލުހުންގެ ވާޖިބާއި މަސްއޫލިއްޔަތު އަދާކުރުމުގައި ފަރުވާކުޑަކުރުމުގެ މައްސަލަތަކެވެ.
ދިވެހި ފުލުހުންގެ ޚިދުމަތަކީ ޕްރޮފެޝަނަލް ޚިދުމަތެއްގެ ގޮތުގައި ދެމެހެއްޓުމަށް ކުރާ މަސައްކަތުގެ ތެރެއިން، ފުލުހުންނާއި ފުލުހުންގެ ޚިދުމަތުގައި މަސައްކަތްކުރާ އެހެނިހެން މުވައްޒަފުން ވެސް ގާނޫނުތަކާއި ގަވާއިދުތަކަށް އަހުލުވެރި ކުރުވުމަށް މައުލޫމާތު ދިނުމުގެ ތަފާތު ޕްރޮގްރާމްތައް މާލެއާއި އަތޮޅުތެރޭގައި ސިލްސިލާކޮށް ހިންގަމުންދާކަން ފުލުހުން ފާހަގަކޮށްފައި ވެއެވެ.
ފުލުހުން ބުނެފައިވަނީ، ދިވެހި ފުލުހުންގެ ޚިދުމަތުގެ ގާނޫނު، އެއްގަމު ދަތުރުފަތުރު ކުރުމުގެ ގާނޫނު، ކުޑަކުދިންގެ ހައްގުތައް ރައްކާތެރިކުރުމުގެ ގާނޫނު، ގެވެށި އަނިޔާ ހުއްޓުވުމުގެ ގާނޫނު، ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ގާނޫނު އަދި އާއްމު އިޖުތިމާއި މިންގަނޑާ ހިލާފު އަމަލުތައް ހުއްޓުވުމުގެ ގާނޫނާއި ފުލުހުންނާ ގުޅުންހުރި އެހެނިހެން ގާނޫނުތަކަށް އަހުލުވެރިކުރުވުމަށް މައުލޫމާތު ދިނުމުގެ ޕްރޮގްރާމްތައް ހިންގަމުންދާ ކަމަށާއި، އޭގެ އިތުރުން، ދީނީ ކަންކަމަށް ހޭލުންތެރިކަން އިތުރުކުރަމަށާއި ފުލުހުންގެ މަސައްކަތްތަކާ ގުޅޭ އެކި ދާއިރާތަކުން މައުލޫމާތު ދިނުމުގެ ޕްރޮގްރާމްތައް ވެސް ހިންގަމުން ދާކަމުގައެވެ.
ކޮމެންޓު ފޮނުވާ