ޣައްޒާގައި އިސްރާއީލުން ގަތުލުއާންމެއް ހިންގުން ހުއްޓުވުމަށް އިޒްރޭލުން އަޅަންޖެހޭ ހުރިހާ ފިޔަވަޅެއް އަޅަން ޖެހޭ ކަމަށް އދ.ގެ އެންމެ މަތީ ކޯޓުން އަމުރު ކޮށްފިއެވެ.
އިސްރާއީލުން ޣައްޒާގައި ހިންގަމުންދާ އުދުވާންތައް ހުއްޓުވުމަށް ދެކުނު އެފްރިކާއިން ބައިނަލް އަގުވާމީ ކޯޓަށް ހުށަހެޅި މައްސަލާގައި ވަގުތީ އަމުރެއް ނެރެމުން ޔޫއެންގެ ބައިނަލްއަގުވާމީ ކޯޓުން މިއަދު ކުރިން އަމުރުގައި، ޢައްޒާގައި އިސްރާއީލުން ކުރަމުންދާ ހަނގުރާމަ ވަގުތުން ހުއްޓާލުމަށް އަމުރު ނުކުރި ނަމަވެސް، އެ ކޯޓުގެ ފަނޑިޔާރުން ވަނީ، ޣައްޒާގައި ފޯރުކޮށްދޭން ޖެހޭ އިންސާނީ އެހީތެރިކަން ފޯރުކޮށްދިނުމަށްވެސް އިސްރާއީލުން ހުރަސް އަޅާއިގެން ނުވާނެ ކަމަށްވެސް ބުނެފައެވެ.
އަދި ކޯޓުން ބުނެފައިވަނީ ދެކުނު އެފްރިކާއިން ހުށަހެޅި މައްސަލަ ގަތުލުއާންމު ހުއްޓުވުން މަނާކުރާ މުއާހަދާގެ ދަށުން އެކޯޓަށް ބެލޭނެކަމަށާއި، ގަތުލުއާންމެއް ކަމަށް ތުހުމަތު ކުރެވޭ އެއްވެސް ހެއްކެއް އިސްރާއީލުން ނައްތާލައިގެން ނުވާނެ ކަމުގައެވެ.
ބައިނަލް އަގުވާމީ ކޯޓުގެ މި ހުކުމަށްފަހު، ފަލަސްތީނުގެ ޚާރިޖީ ވަޒީރު ރިޔާދު އަލް މާލިކީ ވިދާޅުވެފައިވަނީ ކޯޓުގެ ފަނޑިޔާރުން ނިންމެވީ އިންސާނިއްޔަތާއި ބައިނަލްއަގްވާމީ ގާނޫނުތަކަށް ތާއީދުކުރައްވައިގެންނެވެ.
އެހެންނަމަވެސް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ ބައިނަލްއަގްވާމީ ގާނޫނުތަކަށް ބޯލަނބައި އިސްރާއީލުން އަމިއްލަ ނަފްސާއި ރައްޔިތުންގެ ދިފާއުގައި ދެމިތިބޭނެ ކަމަށެވެ.
ސައުތު އެފްރިކާއިން ބައިނަލް އަގުވާމީ ކޯޓަށް އިސްރާއީލާ ދެކޮޅަށް ހުށަހެޅި މައްސަލާގައި މިއަދު އިއްވާފައިވަނީ ވަގުތީ އަމުރެކެވެ. އަދި މިމައްސަލާގެ ދާއިމީ ހުކުމަކާ ހަމައަށް ދިއުމަށް އަދި އެތައް އަހަރެއް ވާނެއެވެ. ދެކުނު އެފްރިކާއިން ކޯޓަށް ހުށަހަޅާފައިވާ މައްސަލާގައި ކޮށްފައިވާ، ގަތުލުއާންމުގެ ތުހުމަތުތަކަށް އިސްރާއީލުން ވަނީ ދެކޮޅު ހަދާފައެވެ.
އިސްރާއީލުން ޣައްޒާއަށް ދެމުންދާ އުދުވާނީ ހަމަލާތަކުގައި ފަލަސްތީނުގެ 25،900 މީހުން މިހާރުވަނީ ޝަހީދު ވެފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށް ހަމާސް އިން ހިންގާ ސިއްހަތާ ބެހޭ ވުޒާރާއިން ބުނެފައި ވެއެވެ.
ޣައްޒާގައި މިހާރު ހިނގަމުންދާ ހަނގުރާމަ ފެށުނީ އޮކްޓޯބަރު މަހުގެ 7 ވަނަ ދުވަހު ހަމާސް ޖަމާއަތުން އިސްރާއީލުގެ ދެކުނުގެ ސަރަހައްދަށް ދިން ޙަމަލާއެއްގައި ގާތްގަނޑަކަށް އިސްރާއީލުގެ 1،300 މީހުން މަރުވުމާއި ގުޅިގެންނެވެ.
