ވިލިމާލޭގައި 500 ހައުސިން ޔުނިޓް ގާއިމު ކުރުމުގެ އަމަލީ މަސައްކަތް އަންނަ އޭޕްރީލް މަހުގެ ތެރޭގައި ފައްޓަވާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
މާލޭގެ އާ މޭޔަރު އާދަމް އާޒިމާއި މާލެ ސިޓީ ކައުންސިލްގެ ތިން ކައުންސިލަރުން ހުވާ ކުރުމަށް ދަރުބާރުގޭގައި ބޭއްވި ރަސްމިއްޔާތުގައި ރައީސް މުއިއްޒު ވިދާޅުވީ ވިލިމާލެ އަށް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަ ކަމަށެވެ.
މާލެ ސިޓީގެ މޭޔަރަކަށް ކުރިން ހުންނެވި އިރުގައި އެ މައްސަލަ އަށް ހައްލު ހޯދައި ދިނުމަށް އުޅުއްވި ނަމަވެސް ސަރުކާރުގެ އެއްބާރުލުން އެކަމުގައި ނުލިބުނު ކަމަށް އެމަނިކުފާނު ވިދާޅުވިއެވެ.
އެކަމަކު، މި ސަރުކާރުން އެ މަސައްކަތް ފެއްޓެވުމަށް ހަމަޖެހިފައިވާ ކަމުގައި ރައީސް ވިދާޅުވިއެވެ. އަދި އަމާޒަކީ ފަސް އަހަރުގެ ތެރޭގައި އެ މަސައްކަތް ނިންމުން ކަމަށް ވިދާޅުވިއެވެ.
"ވިލިމާލޭގައި އެންމެ ބޮޑު މައްސަލައަކީވެސް ހައުސިންގއަށްވާތީ، ވިލިމާލޭގައި 500 ހައުސިންގ ޔުނިޓް ގާއިމުކުރުމުގެ މަސައްކަތްވެސް، ހުއްދަ ނުދިނުމުން ނުފެށި އޮވެފައި، މިހާރު އެވަނީ ފެށޭގޮތަށް ހަމަޖެހިފައި. އެ މަސައްކަތްވެސް، އަޅުގަނޑު ދެންމެ ދެންނެވި މުއްދަތުގައި އިރާދަކުރެއްވިއްޔާ ފެށިގެންދާނެ،" ރައީސް ވިދާޅުވިއެވެ.
