ކުރީގެ ރައީސް އިބްރާހިމް މުހައްމަދު ސޯލިހް "އިންޑިއާ އައުޓް" ކެމްޕެއިން ހުއްޓުވުމުގެ ގޮތުން ނެރުއްވި ގަރާރު އަދިވެސް ބާތިލް ނުކުރާތީ ކުރީގެ ރައީސް އަބްދުﷲ ޔާމީން ވަރަށް ބޮޑަށް ކަންބޮޑުވުން ފާޅުކުރައްވައިފިއެވެ.

ޕީއެންއެފް އޮފީހުގައި ރޭ ބޭއްވި ބައްދަލުވުމުގައި ޔާމީން ވިދާޅުވީ "އިންޑިއާ އައުޓް" ނަމުގައި މަސައްކަތްތަކެއް ހިންގީ ވަރަށް ބޮޑަށް ކަންބޮޑުވާ މައްސަލައަކަށް ވާތީ ކަމަށާއި އެކަމުގައި އެކަށީގެންވާ މަސައްކަތްތަކެއް ކުރެވުނު ކަމަށެވެ.

ނަމަވެސް, އޭރުގެ ރައީސް ނެރުއްވި ގަރާރަކާ އެކު އެކަން ހުއްޓުވެން އޮތް ގޮތަކަށް ހުއްޓުވުމުގެ މަސައްކަތް ސަލާމަތީ ބާރުތަކުން ފެށި ކަމަށާއި ސަލާމަތީ ބާރުތަކާ ކުރިމަތިލާން ބޭނުން ނުވާތީ ކެމްޕެއިން ކުރިއަށް ނުގެންގޮސް މަޑުޖައްސާލެއްވި ކަމަށް ޔާމީން ވިދާޅުވިއެވެ.

ސޯލިހް ނެރުއްވި ގަރާރަކީ ގާނޫނާ ހިލާފު "ބޭގަރާރެއް" ކަމަށާއި އަދި އެ ގަރާރު ރައީސް ޑރ. މުހައްމަދު މުއިއްޒުގެ ސަރުކާރުން ބާތިލްނުކޮށްގެން އުޅެނީ ކީއްވެތޯ ސުވާލު އުފެދޭ ކަމަށް ވެސް ޔާމީން ވިދާޅުވިއެވެ.

"ކީއްވެގެންތޯ މި ސަރުކާރަށް ޖަސްޓް ސްޓްރޯކް އޮފް ޕެން އެ ގަރާރު ބާތިލުކޮށް ނުލެވިގެން މި އުޅެނީ. ބާތިލު ކުރީމަ ދެއްތޯ މާދަމާ ވެސް އަޅުގަނޑު ގޭގައި ހަމަ އިންޑިއާ އައުޓްގެ ބެނާ ހުންނާނީ. އަދި އިންޑިއާ އައުޓް މަސައްކަތުގައި މަގުމައްޗަށް ވެސް ނުކުމެވޭނީ. އެކަމު އަދިވެސް އެ ގަރާރު ބާތިލެއް ނުކުރޭ," ޔާމީން ވިދާޅުވިއެވެ.

އެމްޑީޕީގެ ސަރުކާރުގެ ވާދަވެރިންގެ ގޮތުން އިދިކޮޅުގެ ތިބެ މަގުމަތީގައި އިހުތިޖާޖު ކުރީ އެ ގަރާރު ގޯސްކަމަށް ބުނަމުން ކަމަށާއި އަދި އިންޑިއާ އައުޓް ހަރަކާތް ހުއްޓުވަން ސަރުކާރުން މަސައްކަތް ކުރުން ވެސް އިހުތިޖާޖުގެ ސަބަބަކަށް ވި ކަމަށް ޔާމީން ވިދާޅުވިއެވެ.

"އެކަމަކު މިކަންކަމަށް ގޮވެލިފަތި ގޮވަމުން އައި ސަރުކާރެއް އަދިވެސް މި އުޅެނީ އެ ބާތިލުކޮށްނުލައިގެން. ކޮބައިތޯ މީގެ ސިއްރަކީ," ޔާމީން ސުވާލު ކުރެއްވިއެވެ.

ޔާމީން އިސްކޮށް ހުންނަވައި "އިންޑިއާ އަައުޓް" ނަމުގައި ފެށި ކެމްޕެއިނަކީ ރާއްޖޭގައި ތިބި އިންޑިއާ ސިފައިން ބޭލުމަށް ގޮވާލައި މިދިޔަ ސަރުކާރުގައި ފެށި ކެމްޕެއިނެކެވެ. މި ކެމްޕެއިން ރާއްޖޭގެ އެކިކަންކޮޅުތަކުގައި ކުރިއަށް ދިޔައިރު، ޔާމީން ވެސް ރަށްރަށަށް ވަޑައިގެން ކެމްޕެއިން ކުރެއްވިއެވެ.

ކެމްޕެއިން ވަރަށް ވަރުގަދަ އަށް ކުރަމުންދަނިކޮށް "އެކިއެކި ޝިއާރުތަކުގެ ދަށުން ވަކިވަކި ގައުމުތަކާ މެދު ނަފުރަތު އުފެއްދުމަށް ރާވައިގެން ހިންގާ ހަރަކާތްތައް ހުއްޓުވުން" ނަމުގައި ސޯލިހް ވަނީ ގަރާރެއް ނެރުއްވި އެ ހަރަކާތް ހުއްޓުވައިފައެވެ. "އިންޑިއާ އައުޓް" އެ ހަރަކާތަކީ އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ގައުމަކާ ދެކޮޅަށް ރޭވިގެން ހިންގާ ކެމްޕޭނެއްގެ ގޮތުގައި ސިފަކޮށް އެ ގަރާރު އެމަނިކުފާނު ނެރުއްވީ އެޕްރީލް 21, 2022 ގަ އެވެ.

އެ ގަރާރާ އެކުގައި "އިންޑިއާ އައުޓް" ގެ ހަރަކާތްތައް ރާއްޖޭގައި އެއްކޮށް ހެން ހުއްޓި މާލޭގެ ގޭގެ އާއި އެ ނޫން ވެސް ތަންތަނުގައި ދަމާފައި ހުރި ބެނާތައް ވެސް ނެގިއެވެ.