ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ޓީސީ ސްޕޯޓްސް ކްލަބް އަތުން 3-0 އިން ދަ ގްރާންޑޭ ސްޕޯޓްސް ކްލަބް މޮޅުވެއްޖެ އެވެ.
ދަ ގްރާންޑޭ އިން ލީޑު ނެގީ 35 ވަނަ މިނެޓުގައި ކެޕްޓަން ޔަސްދާފު ހަބީބް (މުލަކޭ) ވައްދާލި ލަނޑުންނެވެ. އޭގެކުރިން ލަނޑުޖަހަން ގްރާންޑޭއަށް ރަނގަޅު ފުރުސަތެެއް ލިބުނެވެ. ދަ ގްރާންޑޭ އަށް ލިބުނު ޕެނެލްޓީ ގާސިމް ސައްމާމް ޖެހިއިރު، އެޕެންލްޓީ ޓީސީގެ ގޯލްކީޕަރު މަމަދޯފް އާޒާދް ވަނީ މަތަކޮށްފައެވެ.
ދަ ގްރާންޑޭ އިން ލީޑު ފުޅާކުރީ ފުރަތަމަ ހާފުގެ ފަހު މިނިޓުގައި އިބްރާހިމް ނޫރައްދީން އެވެ. އެ ޓީމުން ތިން ވަނަ ގޯލް 81 ވަނަ މިނެޓުގައި ޕެނަލްޓީއަކުން ޖެހީ މެޗުގެ މޮޅު ކުޅުންތެރިޔާގެ މަގާމް ހޯދި ހައިދަރޯފް އެވެ. މެޗަށްފަހު ވާހަކަދައްކަމުން ދަ ގްރާންޑޭގެ ކޯޗު އިސްމާއިލް މަހަފޫޒް (އިންމަ) ބުނީ ކުޅުމާ ނަތީޖާއާ މެދު ވަރަށް ބޮޑަށް ހިތްހަމަޖެހޭ ކަމަށާއި އެކަމަކު އަދިވެސް ރަނގަޅުކުރެވޭނެ ކަމަށެވެ.
ޓީސީގެ ކޯޗު މުހައްމަދު ޝާޒްލީ (ޝާޒް) ބުނީ މިއަދުގެ މެޗުގައި ތަފާތަކަށް ފެނިގެން ދިޔަޑއީ ދަ ގްރާންޑޭގެ ބިދޭސީ ދެ ކުޅުންތެރިން ކަމަށާއި އެ ކުޅުންތެރިންގެ ކުޅުން ޓީމެއްގެ ގޮތުގައި ކުރިން ފެނިފައި ނެތުމުން ހުއްޓުވަން އުނދަގޫވި ކަމަށެވެ.
ކޮމެންޓު ފޮނުވާ