އެންޑީއެމްއޭއިން ކުރި އެކްސް ޕޯސްޓެއްގައި ބުނެފައިވަނީ ވިއްސާރައިގެ ސަބަބުން ލިބުނު ގެއްލުން ދެނެގަތުމަށް 87 ތަނެއްގެ އެސެސްމަންޓު ހަފާފައިވާ ކަމުގައެވެ. އޭގެތެރެއިން 19 ތަނަކީ އެކިއެކި ވިޔަފާރި ކުރާ ތަންތަން ކަމަށް ބުނެފައިވެއެވެ.
ވިއްސާރައިގެ ސަބަބުން ލިބުނު ގެއްލުން ދެނެގަތުމަށް 154 ތަނެއްގެ އެސެސްމަންޓު ހެދުމަށް އެންޑީއެމްއޭއިން ނިންމި ނަމަވެސް، އެ އޮތޯރިޓީން އާންމު ކުރި މައުލޫމާތުގައި ވާގޮތުން އެ އަދަދު 87 އަކަށް މަދުވީ އެސެސްމަންޓު ހަދަން ބޭނުން ނުވި 27 ގެއަކާއި އެކި ސަބަބުތަކާ ހުރެ ނުވަދެވުނު 21 ގެއެއް އުނިކުރުމުންނެވެ.
އެންޑީއެމްއޭގެ ތަފާސްހިސާބުގައި ވާގޮތުން ވިއްސާރައިގެ ސަބަބުން 34 އިމާރާތައް ގެއްލުން ލިބުނެވެ. އެ ގެއްލުންތަކުގެ އަގު 248،382ރ. އަށް އަރައެވެ.
އެންޑީއެމްއޭއިން ބުނެފައިވަނީ، 65 ގޭބިސީއެއްގެ ހިފާގެންގުޅޭ ތަކެއްޗަށް ގެއްލުންވެފައިވާ ކަމަށާއި، ގެއްލުމުގެ އަގު 1،044،308 އަށް އަރާ ކަމަށެވެ.
ސްޓްރަކްޗަރަލް ގެއްލުންތަކުގެ ބަދަލު އެއްކޮށް ދިނުމަށް އެންޑީއެމްއޭއިން ވަނީ ނިންމާފައެވެ. އެހެންނަމަވެސް ހިފާ ގެންގުޅޭ ތަކެއްޗަށް ލިބުނު ބަދަލުގެ ގޮތުގައި ދޭން ނިންމާފައިވަނީ ގެއްލުމުގެ 20 އިންސައްތަ އެވެ.
އެންޑީއެމްއޭއިން ބުނެފައިވަނީ ވިއްސާރައިގެ ސަބަބުން ފެންބޮޑުވެގެން 164 ފަރާތަކުން އެދުވަހު ރިޕޯޓު ކުރިއިރު، އޭގެތެރެއިން 8 ގެއަކުން 42 މީހުން ވަގުތީ ބޯހިޔާވަހިކަމަށް ގެންދަންޖެހުނު ކަމަށެވެ. ވަގުތީ ބޯހިޔާވަހިކަމާއި އިކުއިޕްމަންޓުތަކުގެ ހަރަދަށް މިއަދާއިހަމައަށް 179،275ރ. ހަރަދުވެފައި ވާކަމަށްވެސް ބުނެފައި ވެއެވެ.
