އިއްޔެ މާލެއަށް ކުރި ވިއްސާރައިގައި ވެހުނު ވާރެއާ ގުޅިގެން ހާލުގައި ޖެހުނު 41 މީހަކު މިހާރު ވަގުތީ ހިޔާތަކަށް ބަދަލުކޮށްފައިވާ ކަމަށް ނެޝަނަލް ޑިޒާސްޓާ އޮތޯރިޓީ (އެންޑީއެމްއޭ)އިން މިއަދު ބުނެފިއެވެ.
ފެން ބޮޑުވުމުގެ ހާދިސާއާއި ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެންޑީއެމްއޭގެ ޑެޕިއުޓީ ޗީފް އެގްޒެކެޓިވް މުހައްމަދު ފިކުރީ ވިދާޅުވީ، ވަގުތީ ހިޔާތަކުގައި ތިބީ 8 ގެއަކަށް ނިސްބަތްވާ 41 މީހުންކަމުގައެވެ.
އަދި އޭނާ ވިދާޅުވީ، މާލެއިން ފެންބިޑުވެގެން ރިޕޯޓު ކޮށްފައިވަނީ 180 ގެއަކުން ކަމުގައެވެ. އޭގެ ތެރޭގައި ޕްރައިވެޓް އޮފީސްތަކާއި، މީހުން ދިރިއުޅޭ ގެތަކާއި، ފިހާރަތަކާއި، ސަރުކާރު އޮފީސްތައް ހިމެނޭ ކަމަށެވެ. ފިކުރީ ވިދާޅުވީ ބެލި ބެލުމުން، މިގެތަކުގެ ތެރެއިން މީހުން ދިރިއުޅެނީ 164 ތަނެއްގައިކަން އެނގުނު ކަމަށެވެ. އެގެ ތަކުގެ ޚާއްސަ އެސެސްމަންޓެއް ހެދިކަމަށްވެސް ފިކުރީ ވިދާޅުވިއެވެ.
މި 164 ގެޔަށް އަޅުގަނޑުމެން ވާނި އިނީޝަލް ރެޕިޑް އެސަސްމަންޓް ހަދަން ޓީމުތައް ފޮނުވާފަ. އިނީޝަލް ރެޕިޑް އެސަސްމަންޓް ހަދަން ދިޔަ ޓީމު ތަކުން މި 164 ގެޔަށް ޒިޔާރަތްކޮށް، ވަގުތުން ވަގުތަށް އެ ބޭފުޅުންގެ ހުރި، ބޭނުންތައް ދެނެގަތުމުގެ މަސައްކަތްތައް ކުރި.
ފިކުރީ ވިދާޅުވިއެވެ.
އޭނާ އިތުރަށް ވިދާޅުވީ ހެދި އެސަސްމަންޓުތަކުން އެންގުނު ގޮތުގައި އޭގެ ތެރެއިން 12 ވަރަކަށް ގޭގެ މީހުންނަށް ކެއިން ބުއިމާއި ވަގުތީ ހިޔާ ފޯރުކޯށްދޭން ޖެހޭކަމަށެވެ. އެގޮތުން، 11 ގެޔަކަށް ކެއިން ބުއިމަށް ބޭނުންވާ ސާމާނު ފޯރުކޮށްދީ އޭގެ ތެރެއިން 8 ގެޔެއްގެ މީހުންނަށް ވަގުތީ ހިޔާވަހިކަން ފޯރުކޮށްދީވަކަމަށްވެސް މިއަދު ޕްރެސް ކޮންފަރެންސްގައި ފިކުރީ ވިދާޅުވެފައި ވެއެވެ.
ހާލުގައިޖެހުނު މީހުން ގެސްޓުހައުސްތަކަށް ބަދަލުކޮށްފައިވާއިރު، ގެސްޓުހައުސްތަކުން ހުރުމާއި ކެއުން ހަމަޖައްސައިދީފައިވަނީ ތިން ދުވަހުގެ މުއްދަތަކަށެވެ.
އެންޑީއެމްއޭއިން ބުނެފައިވަނީ ނަޖިސް ފެން ޖެހިގެން ގެއްލުންވެ، މުދާ ގަނެވޭނެ ހާލަތެއްގައި ނެތްނަމަ އެ އާއިލާތަކަށް އެނދު ގޮދަޑި ފަދަތަކެތި ފޯރުކޮށްދޭނެ ކަމުގައެވެ. އެހެންނަމަވެސް އެސަސްމަންޓަށްފަހު، ދޭ ފައިސާއިން، ކުރިން ކޮށްފައިވާ ޚަރަދު އުނިކުރާނެކަމަށްވެސް ބުނެފައި ވެއެވެ.
