ކުރިއަށް އޮތް ރައްޔިތުންގެ މަޖިލީހުގެ އިންތިޚަބުގއި ޖުމްހޫރީ ޕާޓީގެ ޓިކެޓުގައި ވާދަކުރަން ބޭނުންވާ ފަރާތްތަކަށް ކުރިމަތިލުމަށް ހުޅުވާލައިފިއެވެ. ޖުމްހޫރީ ޕާޓީން ވަނީ ހުރިހަ ދާއިރާއަކަށް ވާދަކުރުމަށް ހުޅުވާލާފައެވެ. އެޕާޓިން ބުނީ، މަޖިލީހުގެ މެމްބަރުންގެ ޝަރުތުހަމަވާ އަދި އެކަމަށް ގާބިލު މީހުންނަށް ކުރިމަތިލާން ހުޅުވާލާފައިވާ ކަމަށެވެ.
ޖުމްހޫރީ ޕާޓީން ބުނީ، މަޖިލީހުގެ އިންތިޚާބުގައި ވާދަކުރުމަށް ހުށައަޅާ ފަރާތްތަކުގެ ތެރެއިން ކެންޑިޑެސީ ކަށަވަރު ކުރާނީ ޕާޓީގެ ކައުންސިލުން ނުވަތަ ކައުންސިލުން ކަނޑައަޅާ ހާއްސަ ކޮމެޓީއަކުން ބެލުމަށްފަހުގައިކަމަށެވެ.
އެޕާޓިގެ ޓިކެޓަށް އެދި މިމަހުގެ 26 ވަނަ ދުވަހުގެ މެންދުރުފަހު 14:00އާއި ހަމައަށް ވަނީ ހުޅުވާލާފައެވެ.
އަންނަ އަހަރު ކުރީކޮޅު އޮންނަ 20 ވަނަ ރައްޔިތުންގެ މަޖިލީހުގެ އިންތިޚާބުގައި 93 ދާއިރާއަކަށް މެންބަރުން އިންތިޚާބުކުރާނެއެވެ. މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގައި ޖުމްހޫރީ ޕާޓީ ތަމްސީލްކުރަނީ ދެ މެންބަރުންނެވެ. އެއީ ޖުމްހޫރީ ޕާޓީގެ ލީޑަރ އަދި މާމިގިލީ ދާއިރާގެ މެންބަރުން ޤާސިމް އިބްރާހީމާއި، ކެންދޫ ދާއިރާގެ މެންބަރު ޢަލީ ޙުސައިންނެވެ.
ޖޭޕީގެ އިތުރުން ޕީޕީއެމް/ޕީއެންސީއާއި އެމްޑީޕީންވެސް ވަނީ ޕްރައިމަރީއަށް ހުޅުވާލާފައެވެ.
