އިނގުރައިދޫ ދާއިރާގެ 2024ގެ މަޖިލިސް އިންތިޚާބުގެ ޕީޕީއެމް/ޕީއެންސީގެ ޕްރައިމަރީގައި ވާދަކުރުމަށް ނިންމާފައިވާ، އެދާއިރާގެ އެންބެ ބޮޑު ތާއީދެއް އޮތް އެއް ކެނޑިޑޭޓު ކަމުގައިވާ، ދާއިރާގެ އިނގުރައިދޫއަށް ނިސްބަތްވާ ހަސަން އިބުރާހިމް، އިނގުރައިދޫ ދާއިރާގެ ކުރީގެ މެމްބަރު އިބުރާހިމް ފަލާހުއަށް ތާއީދު ކުރަން ނިންމައިފިއެވެ.

ހަސަން އިބުރާހިމްއަކީ ޕީޕީއެމްސީގެ އިސް އެކްޓިވިސްޓެއްގެ އިތުރުން، ފާއިތުވެދިޔަ ތަނުގައި ދެ ޕާޓީގެ ސިޔާސީ ހަރަކާތްތަކުގައި ދާއިރާގައި އިސްވެ ލީޑްކޮށްފައިވާ ފަރާތެވެ. އަދި އޭނާއަކީ އޭނާގެ އުފަންރަށް ކަމުގައިވާ އިނގުރައިދޫގެ އިތުރުން މުޅި ދާއިރާގެވެސް ބޮޑު ތާއީދެއް އޮތް ބޭފުޅެއްކަން ފާހަގަ ކޮށްލެވެއެވެ.

ކުރިޔަށް އޮތް ޕީޕީއެމް/ޕީއެންސީގެ މަޖިލިސް ޕްރައިމަރީގައި ކުރީގެ މެމްބަރު ފަލާހުއަށް ތާއީދުކުރަން ނިންމެވިކަން އިއުލާން ކުރައްވަމުން ހަސަން ވިދާޅުވެފައިވަނީ އޭނާ އެގޮތަށް ނިންމެވީ ފާލާހުއަކީ އެއްދައުރު ރައްޔިތުންގެ މަޖިލިހުގެ މެމްބަރުކަން ކުރައްވާފައިވާ ބޭފުޅަކަށް ވުމުގެ އިތުރުން ފަލާހުއަކީ އޭނާގެ ދައުރުގައި ނަތީޖާ ނެރެދެއްވާފައިވާ ބޭފުޅަކަށް ވާތީއެވެ. އޭގެ އިތުރުން ފަލާހުއަކީ އާދަޔާ ޚިލާފު ހިންގުންތެރި ހިވާގި ބޭފުޅެއްކަންވެސް ހަސަން ފާހަގަ ކުރައްވާފައި ވެއެވެ.

ހަސަން ވިދާޅުވީ އޭނާ ދެކޭގޮތުގައި، މި އިންތިޚާބުގައި ވާދަކުރަން ތިއްބެވި ކެނޑިޑޭޓުންގެ ތެރެއިން މިފަހަރު ދާއިރާއަށް އޮތް ހަމައެކަނި ޗޮއިސްއަކީ ފަލާހުއެވެ. ހަސަން ވިދާޅުވީ ކުރިޔަށް އޮތް ޕީޕިއެމް/ޕީއެންސީގެ މަޖިލިސް ޕްރައިމަރީ ފަލާހު ބޮޑު ތަފާތަކުން ކާމިޔާބު ކުރައްވާނެ ކަމުގައެވެ.

ކުރިޔަށް އޮތް ރައްޔިތުންގެ މަޖިލިހުގެ އިންތިޚާބުގެ ޕީޕީއެމް/ޕީއެންސީގެ މަޖިލިސް ޕްރައިމަރީއަށް ފަލާހު ފޯމު ހުށަހަޅުއްވާފައިވާއިރު، މި ޕްރައިމަރީގައި ރައީސް މުއިއްޒުއާއި އަދި ސަރުކާރުގެ ތާއީދުވެސް އޮތީ ފަލާހުއަށްކަން ފެންނަ މަންޒަރުތަކުން ދަނީ ވަރަށްބޮޑަށް ވަޒަން ކުރެވެމުންނެވެ. މިގޮތުން ސަރުކާރުގެ ފަރާތުން މިހާރުވެސް ދާއިރާގެ ކަންކަމުގައި އެންމެ އިސްކޮށް ހަރަކާތްތެރިވަމުން ދަނީ ފަލާހުކަން ފާހަގަ ކޮށްލެވެއެވެ.

ޕީޕީއެމް/ޕީއެންސީގެ މަޖިލިސް ޕްރައިމަރީގައި ވާދަކުރުމަށް ފުރުސަތު ހުޅުވާލުމުން، ޕްރައިމަރީގައި ވާދަކުރުމަށް މުޅި ރާއްޖެއިންވެސް އެންމެ ފުރަތަމަ ފޯމު ހުށަހެޅުއްވި ކެނޑިޑޭޓަކީ ފަލާހުއެވެ.

ފަލާހުއަށް އިނގުރައިދޫ ދާއިރާގެ ބޮޑު ތާއީދެއް އޮންނައިރު އެދައިރާގެ ގިނަ އަދަދެއްގެ ބަޔަކުވެސް ދަނީ ވެރިކަންކުރާ ޕީއެންސީއާއި ގުޅެމުންނެވެ.

ދާދިފަހުން ވެރިކަންކުރާ މައި ޕާޓީ، ޕީއެންސީއާ ގުޅިވަޑައިގެންނެވުމަށްފަހު ފަލާހު ވިދާޅުވެފައިވަނީ، ރައީސް މުޢިއްޒުގެ ވެރިކަން ދިފާއުކުރަން މޭ އައްޑަނައަކަށް ހަދާނެކަމަށާއި، ސިޔަސީ ގޮތުންނާއި ހުރިހާ ގޮތަކުންވެސް ރައީސް މުޢިއްޒުގެ ސަރުކާރު ދިފާޢު ކުރުމުގައި ވަފާތެރިކަންމަތީ ދެމިހުންނަވާނެކަމުގެ ޔަޤީންކަން ދެއްވާކަމަށެވެ. އަދި މުޅި ރ. އަތޮޅުވެސް ވަނީ ރައީސް މުޢިއްޒުގެ ފަހަތްޕުޅުގައިކަމަށާއި، މުޅި ރ. އަތޮޅުގެ 15 ރަށުގެ ރައްޔިތުންވެސް ތިބީ ރައީސް މުޢިއްޒުގެ ސަރުކާރު ދިފާޢުކޮށް އެމަނިކުފާނުގެ ލަފަޔާ އިރުޝާދުގެ މަތިން ކުރިއަށް ދާންކަމަށްވެސް ފަލާހު ވިދާޅުވިއެވެ.

ފަލާހުވަނީ މީގެ މަހެއްހާ ދުވަސްކުރިން ރައްޔިތުންގެ މަޖިލިސް އިންތިޚާބުގެ ކެމްޕޭން ފައްޓަވާފައެވެ. މަޖިލިސް ކެމްޕޭން ފެއްޓެވުމަށްފަހު ފަލާހު ވިދާޅުވެފައިވަނީ މަޖިލިހުގެ ކުރިޔަށް އޮތް ދައުރަށް ކުރިމަތިލައްވަން ގަސްތު ކުރެއްވީ ދާއިރާގެ ގިނަ އަދަދެއްގެ ރައްޔިތުންގެ އެދުމުގެ މަތިންކަމަށާއި، ދާއިރާގެ ބޮޑު ތާއީދަކާއެކީ އިންތިޚާބުކުރި ޕީޕީއެމް/ޕީއެންސީގެ ސަރުކާރަށް ރައްޔިތުންގެ މަޖިލިހުގެ ތެރެއިން އެއްބާރުލުން ދިނުމަށްވެސް ރައްޔިތުން ބޭނުންވާ ކަމުގައެވެ.

ފަލާހު ކުރިޔަށް އޮތް ދައުރުގައި އިނގުރައިދޫ ދާއިރާގެ މަޖިލިސް އިންތިޚާބުގައި ވާދަކުރައްވަން ނިންމެވިއިރު އޭނާވަނީ ފާއިތުވި ރިޔާސީ އިންތިޚާބު ޑރ. މުއިއްޒުއަށް ކާމިޔާބު ކޮށްދިނުމުގައި އިސްދައުރެއް އަދާކޮށްފައެވެ. މިގޮތުން އޭނާވަނީ "ދިވެހީންގެ ރާއްޖެ" ކެމްޕޭންގެ ރ. އަތޮޅުގެ އެންމެ އިސްފަރާތެއްގެ ގޮތުގައި މަސައްކަތް ކޮށްފައެވެ.

18 ވަނަ ރައްޔިތުންގެ މަޖިލިހުގައި އިނގުރައިދޫ ދާއިރާގެ މެމްބަރުކަން ކުރެއްވި އިބުރާހިމް ފަލާހުއަކީ ރައީސް ޑރ. މުއިއްޒުގެ ވަރަށް އަރިސް ފަރާތެއްކަން ފާހަގަ ކޮށްލެވެއެވެ.